Read Kalanga Kutangisa 45 Bible Online

Kutangisa 45 - Kalanga bible

Kutangisa 45

¹Ipapo Josefa kasitjatubule kuzwibhata mbeli kwe baakabe anabo, ngono kamilidza hwi kati, “Mmwe ne mmwe ngaadwe pandili!” Ndizo kwakabe kusina nthu pana Josefa tjibaka tjaakazwizibisa bakulu babe ne banung'una babe.

²Ngono kalilila pezhugwi Baegipiti ne be nsha wa Faro bakan'hwabo.

³Josefa kabe eti ku bakulu babe, “Ndimi Josefa. Apa tate bangu batjatjila kene?” Koga bakulu babe bakakong'wa kun'dabila ngoti bentja.

⁴Ndizo Josefa kabe eti ku bakulu babe, “Sedzelani pejo nami.” Bakati basedzela kati ku bali, “Ndimi nnung'una wenyu Josefa wamakatengesa ku Egipiti.

⁵Musinyale moyo kene kuli kuzwigwadzila moyo ngobe makanditengesa ngeno, Ndzimu ndiwo wakanditumila ngeno mbeli kwenyu kutjengeta bupenyu gwe bathu.

⁶Ngoti kwabe makole mabili kuna bhamba mu shango, ngono mu makole mashanu anozha kowobe kusingalimwe kusingavungwe.

⁷Ndzimu wakanditumila mbeli kuti mube ne limbelimbe mu shango kutjengeta bupenyu gwenyu.

⁸Ndizo ate muli imwi makandizhisa ngeno, Ndzimu ndiwo wakandizhisa. Wakandithama kuti ndibe tate kuna Faro, ndibe she we ng'umba iye, ndibe mbusi we Egipiti yose.

⁹“Tjilibilidzani muyende kuna tate bangu, mubadwe muti Josefa nkololo wenyu kati, ‘Ndzimu wakandithama mbusi we shango yose ye Egipiti, buyani ngeno kundili musinonoke.

¹⁰Mowogala mu ntuthu we Gosheni mukabe pejo nami, imwi ne bana benyu ne zwizekugwana zwenyu ne zwithuwo zwenyu na kose kwamunako.

¹¹Ndowomutjengeta muli ikoko, ngoti kutjina makole ali mashanu anozha e bhamba. Kusajalo imwi ne ng'umba yenyu na bose bamunabo mungadwa mube bashayi.’ ”

¹²“Ngwenu mobona mose ne nnung'una wangu Bhenjamini kuti ndimi Josefa unolebeleka namwi.

¹³Mubudze tate bangu sekwa ndinokudziwa mu Egipiti nenge tjimwe ne tjimwe tjamabona.”

¹⁴Ipapo kagumbatila nnung'una uwe Bhenjamini kalila, Bhenjamini kan'gumbatilabo elila.

¹⁵Kaputa bakulu babe bose kalila. Shule kwa ipapo bakulu babe bakalebeleka naye.

¹⁶Thawu dzikati dziswika ku ng'umba ye bushe ya Faro dziti bakulu ba Josefa bazha, Faro ne hadzasha dzidze bakashatha.

¹⁷Faro kadwa Josefa kati, “Idwa bakulu babo uti, ‘Belesani madonki enyu mubgwilile ku shango ye Kanana,

¹⁸munobuya na tate benyu ne misha yenyu kundili. Ndowomupa magalo mabuya kupindisa mu shango ye Egipiti ngono mowobe pakati kwe bhokonyogwa le shango iyeyi.’ ”

¹⁹Ubadwe uti, “Tolani koloyi mu Egipiti munotola bana benyu ne bakadzi benyu na tate benyu mubuye nabo bose.

²⁰Musiyitile hanya thundu dzenyu, nge kuti, zwakanaka zwe Egipiti zowobe zwenyu.”

²¹Bana ba Iziraela bakashinga sa ikoko. Josefa kabapa dzikoloyi sekwa lebgwa ndi Faro, kabapa ne mbuba ye gwendo gwabo.

²²Josefa kapa mmwe ne mmwe we bakulu babe hazu tshwa, koga Bhenjamini kampa mazana ali matatu e shekele dze siliva (300) ne hazu dzili shanu.

²³Katumila kuna tate babe madonki ali gumi akabelesa zwithu zwakanaka zwe mu Egipiti ne madonki makadzi ali gumi akabelesa mathunde ne tjiwunga ne mbuba ye gwendo gwabo.

²⁴Ipapo kawonekana ne bakulu babe ngono bakati bemilika beyenda kabe eti ku bali, “Musitongo kakabadzana mu zila.”

²⁵Ndizo bakabhuda mu Egipiti bakanoti kuna tate babo Jakubo mu shango ye Kanana.

²⁶Bakababudza beti, “Josefa utjatjila! Ndiye unobusa shango yose ye Egipiti.” Jakubo kakaabala koga ngono kasidume tjabanoleba.

²⁷Koga bakati banlondesedza tjimwe ne tjimwe Josefa tjaakababudza, kakale ebona koloyi dzaakatumila kunsenga, meya ya Jakubo tate babo ikabe ne bupenyu kakale.

²⁸Iziraela kabe eti, “Kwalizana ikoku mwanangu Josefa mpenyu! Ndoda kunombona ndisathu afa.”