Read Kalanga Kutangisa 46 Bible Online

Kutangisa 46 - Kalanga bible

Kutangisa 46

¹Ndizo Iziraela katola kose kwaakabe anako katola gwendo kanoti ku Bheerisheba, ipapo kapisila Ndzimu wa tate babe Isaki zwibhayilo.

²Ndzimu ukalebeleka na Iziraela nge mbono mu busiku ukati, “Jakubo! Jakubo!” Kadabila eti, “Ndipano.”

³Ndzimu ukabe uti, “Ndimi Ndzimu, Ndzimu wa tate babo. Usitje kuyenda ku Egipiti, ngoti ndowokuthama ukabe itjaba tjikulu ikweno.

⁴Ndowoyenda nawe ku Egipiti ngono ndowokubuza ngeno kakale. Tjiazha tja Josefa tjowozhalila mesho awo nsi waunowofa.”

⁵Ipapo Jakubo kamilika mu Bheerisheba kawila mu zila. Bana babe bakantathisa ne bana babo ne bakadzi babo mu dzikoloyi dzakabe dzatumigwa ndi Faro kubasenga.

⁶Bakayenda ne zwithuwo zwabo ne thundu dzabo dzabakashaba mu Kanana, ngono Jakubo ne bana babe bose bakayenda ku Egipiti.

⁷Katola bakololo babe ne zwizekugwana zwizwe ne bakololokadzi, bose be ludzi gugwe.

⁸Mazina e bana ba Iziraela bakayenda ku Egipiti ndiawa: Rubheni mbano ya Jakubo.

⁹Bakololo ba Rubheni ndi Hanoki na Phalu na Hezironi na Khami.

¹⁰Bakololo ba Simiyoni ndi Jemuyele na Jamini na Ohadi na Jakini na Zohari na Shawulu mwana we nkadzi we Tjikanana.

¹¹Bakololo ba Levi ndi Geshoni na Kohati na Merari.

¹²Bakololo ba Juda ndi Eri na Onani na Shela na Perezi na Zera (koga Eri wakafila mu shango ye Kanana). Bakololo ba Perezi ndi Hezironi na Hamuli.

¹³Bakololo ba Isakari ndi Tola na Lobe na Puva na Shimironi.

¹⁴Bakololo ba Zebuluni ndi Seredi na Eloni na Jahileeli.

¹⁵Ibaba ndibo bakololo bakazwagwa ndi Liya na Jakubo batji ku Padani Aramu ne nkololokadzi uwe Dina. Bakololo ne bakololokadzi ibaba bose, bakabe bali makumi matatu ana bali batatu (33).

¹⁶Bakololo ba Gadi ndi Zefoni na Hagi na Shuni na Ezibhoni na Eri na Arodi na Areli.

¹⁷Bakololo ba Asheri ndi Imuna na Ishuva na Ishivi na Bheriya. Hazwadzi yabo yakabe ili Sera. Bakololo ba Bheriya ndi Heberi na Malekhieli.

¹⁸Ibaba bakabe bali bana ba Jakubo na Zilipa, iye wakabe apiwa Liya ndi Labani. Bakabe bali gumi lina bali tathatu bose.

¹⁹Bakololo ba Jakubo ne nkadzi uwe Rahele ndi Josefa na Bhenjamini.

²⁰Mu Egipiti Josefa na Asenati nkololokadzi wa Potifera mpirisiti we Oni bakazwala Manase na Ifureimi.

²¹Bakololo ba Bhenjamini ndi Bhela na Bhekeri na Ashebheli na Gera na Naamani na Ehi na Roshi na Mupimu na Hupimu na Aridi.

²²Ibaba bali gumi lina bali banna ndibo bakololo ba Jakubo na Rahele.

²³Nkololo wa Dani ndi Hushimu.

²⁴Bakololo ba Nafutali ndi Jahitsaeli na Guni na Jezeri na Shilemu.

²⁵Ibaba bakololo ba Jakubo na Bhiliha iye Labani waakapa nkololokadzi uwe Rahele, bose bali kutendeka.

²⁶Bose bakayenda ku Egipiti na Jakubo, ibabo bakabe bali bana babe kusingabagwe bakadzi be bana babe, bakabe bali makumi matathatu ana bali tathatu (66).

²⁷Bana ba Josefa bakazwaligwa mu Egipiti bakabe bali babili. Ndizo be nsha wa Jakubo bose bakayenda ku Egipiti, bakabe bali makumi ali kutendeka (70).

²⁸Jakubo katuma Juda kuyenda mbeli kuna Josefa kunokumbila Josefa kunobashanganidza ku Gosheni. Kwakati beswika mu ntuthu we Gosheni,

²⁹Josefa katatha koloyi iye kayenda ku Gosheni kunoshanganidza tate babe Iziraela. Kati eswika kagumbatila tate babe katola tjibaka elila akabagumbatila.

³⁰Iziraela kadwa Josefa kati, “Ngwenu ndingatjifa zwangu ngoti ndakuzwibonegwa kuti utjatjila.”

³¹Josefa kabe elebeleka ne bakulu babe ne nnung'una uwe na bose be nsha wa tate babe eti, “Ndowoyenda anolebeleka na Faro nditi, ‘Bakulu bangu ne banung'una bangu ne nsha wa tate bakabe begala mu shango ye Kanana bazha kundili.

³²Ibaba bathu bathuwi, bana zwithuwo, bazha ne pkhwizi dzabo ne ng'ombe ne tjimwe ne tjimwe tjabanatjo.’

³³Ha Faro emudana emubhuzwa eti, ‘Nshingo wenyu ndiwupi?’

³⁴Mudabile muti, ‘Balanda benyu bakakula bali bathuwi be zwithuwo kudwila mu butukununu gwedu kuswikila ngwenu, sa botate bedu.’ Ha majalo mowodumigwa kugala mu ntuthu we Gosheni.” Josefa wakaleba ikoku ngoti Baegipiti banoyilana ne balisi.