Read Kalanga Kutangisa 47 Bible Online

Kutangisa 47 - Kalanga bible

Kutangisa 47

¹Josefa kayenda kanobudza Faro eti, “Tate bangu ne bakulu bangu ne pkhwizi dzabo ne ng'ombe ne tjimwe ne tjimwe bazha bedwa ku shango ye Kanana ngono baku Gosheni.”

²Katola bali bashanu be bakulu babe kabayisa kuna Faro.

³Faro kababhuzwa kati, “Nshingo wenyu ini?” Ibo bakadabila beti, “Ti bathuwi be pkhwizi ne mbudzi sa botate bedu bakabe bali bathuwi.”

⁴Bakabe beti kuna Faro, “Tazha kowokumbila kugala mu shango yenyu ngoti bhamba ligulu ku Kanana, zwithuwo zwedu azwina mafulo. Ndizo tomukumbila muletje tigale mu Gosheni.”

⁵Faro kadwa Josefa kati, “Tate babo ne bakulu babo bazha ku kuli,

⁶ngono shango ye Egipiti unoibona, gadza tate babo ne bakulu babo mu ntuthu mbuya we shango. Ubagadze mu Gosheni. Ha ili kuti unoziba kuna bamwe mu bali banotubula bali majatu uthame kuti babe batjengeti be zwithuwo zwangu.”

⁷Ipapo Josefa kazhisa tate babe Jakubo kuna Faro. Jakubo kakombolela Faro,

⁸Faro kambhuzwa eti, “Muna makole mangana?”

⁹Jakubo kadabila Faro eti, “Makole e kutjila kwangu ndiyenda yenda mu shango i zana lina makumi matatu (130), makole angu mafupi muna a bobatategulu bangu koga akabe makole akasima anolema.”

¹⁰Jakubo kakombolela Faro kabhuda kayendazwe.

¹¹Ndizo Josefa kagadza tate babe mu shango ye Egipiti, kabapa thundu mu magalo mabuya e shango, mu ntuthu we Ramesesi sekwa akabe adwiwa ndi Faro.

¹²Josefa kapa tate babe ne bakulu babe ne phuli yose ye nsha wa tate babe zojiwa kuyenda nge kuti bangana.

¹³Kwakabe kusina zojiwa mu shango yose ngoti bhamba lakabe lili gulu, shango ye Egipiti ne Kanana dzakabe dzapaladziwa nge bhamba.

¹⁴Josefa kakubunganya mari wose akabe angawang'wa mu Egipiti ne mu Kanana kutenga mathunde ngono kaayisa ku ng'umba ya Faro ye bushe.

¹⁵Kukati mari e bathu be Egipiti nebe Kanana abapelela, Baegipiti bose bakazha kuna Josefa bakati kunli, “Utipe zojiwa. Apa tingafa wakatilinga? Mari edu apela.”

¹⁶Josefa kabadabila eti, “Zhisani zwithuwo zwenyu, ndowotenganya zojiwa nge zwithuwo zwenyu se mari enyu apela.”

¹⁷Ndizo bakazhisa zwithuwo zwabo kuna Josefa, iye kabapa zojiwa etetshanya nge mbizi dzabo ne pkhwizi dzabo ne mbudzi ne ng'ombe dzabo ne madonki. Kapitsha gole ilelo ebapa zojiwa etenganya nge zwithuwo zwabo.

¹⁸Gole ilelo likati lapela, bakazha kunli muna linolitobela bakati, “Atingasumbikile tetshi zibo yekuti mari edu akapela ne zwithuwo zwedu zwabe zwenyu, akutjina tjatisalila tetshi wedu kuzhe kwe mibili yedu ne minda yedu.

¹⁹Tingafa ne bana bedu ne minda yedu ingabe makula makatilinga kene? Mutitenge iswi ne minda yedu, mutetshanye nge zojiwa, iswi ne minda yedu towobe balanda ba Faro. Mutipe mbewu kuyita kuti titjile tisife nge zhala ne kuti minda isibe makula.”

²⁰Ndizo Josefa katenga minda yose mu Egipiti ikabe ya Faro. Baegipiti bose bakatengesa minda yabo ngoti bhamba lakabe lakababangalalila. Minda yose ikabe ya Faro.

²¹Josefa kathama bathu bakabe balanda mu mizi Egipiti yose.

²²Ne kwakajalo minda yaasakatenga nge ye bapirisiti ngoti ibo bakabe bana gobe kudwa kuna Faro, ndizo bakabe bana zojiwa zwakalizana. Ndizo basakatengesa minda yabo wali.

²³Ipapo Josefa kadwa bathu kati, “Nasi ndamutenga ndimutengela Faro, mbewu eyi dzwalani mu minda.

²⁴Ngono nge tjibaka tje kuvuna, saka le bushanu mu masaka ali mashanu mulipe Faro. Manna asala mubige mbewu, kumwe zwibe zojiwa zwenyu ne be misha yenyu.”

²⁵Bathu bakashandula beti, “Matitjidza, nge kube ne ngoni mutili, ha kushathisa tetshi wedu, towobe balanda ba Faro.”

²⁶Ndizo Josefa kathama kuti kube nlayo mu Egipiti, na nasi utjashinga, saka le bushanu mu masaka ali mashanu nge la Faro. Minda dze bapirisiti koga ndidzo dzakabe dzisidza Faro.

²⁷Baiziraela bakagala mu shango ye Egipiti mu ntuthu we Gosheni. Bakathama fumwa ikoko bakabe ne mbeleko bakawanda kukulu kwazo.

²⁸Jakubo wakagala makole ali gumi lina ali kutendeka mu shango ye Egipiti. Makole wose e bupenyu gugwe makole ali zana lina makumi manna ana ali kutendeka (147).

²⁹Tjibaka tjekuti Iziraela afe tjikati tjiswika kadana nkololo uwe Josefa kandwa kati, “Ha ndiamutjilika mukuli milidza luboko gugo utune kuti unowondithamila buthu ne lebeswa. Usindibiganye mu Egipiti.

³⁰Ha ndifa nditobela botate bangu, undisenge undiduse mu Egipiti, unondibiganya pabakabiganyiwa.” Josefa kashandula eti, “Ndowothama sekwa maleba.”

³¹Iziraela kabe eti, “Tuna.” Ipapo Josefa katuna. Iziraela kakotamisa nsholo uwe pa bulawo gugwe.