Read Kalanga Kutangisa 49 Bible Online

Kutangisa 49 - Kalanga bible

Kutangisa 49

¹Jakubo kadana bakololo babe kati ku bali, “Kubunganani kuti ndimubudze tjinowoshingikala mu mazhuba anozha.

²“Kubunganani mubhulutane, imwi bakololo ba Jakubo, hwililani tate benyu Iziraela.

³“Rubheni, iwe u mbano yangu, u simba langu ne ntjelo we kuzwihwa kwangu unopinda bose nge mamo ne simba.

⁴Unokubhungana se vula, autowobe utji nkulu, ngoti wakatatha bulawo gwa tate babo, ukatemapadza malalo angu.

⁵“Simiyoni na Levi bana be nkadzi, mathumo abo zwibhayano zwe phipiti.

⁶Ngandisiwanike mu nlangano wabo, meya yangu usishangane ne gubungano labo, ngoti mu kugwadza moyo kwabo bakabulaya bathu, bakathubula ngabe makanyu besudza.

⁷Kugwadza moyo kwabo ngakube bhiso, ngoti kotjisa, ne bushongola gwabo, ngoti gwakabipa. Ndowobakobanya muna Jakubo, abapaladza mu Iziraela.

⁸“Juda, bana ba tate babo banowokukudza, tjiazha tjitjo tjowobe pa hwulo dze zwita zwizo, bana ba tate babo banowokuthigamila.

⁹Juda i shumbana, unoshandukila ku guwu lilo wabulaya. Unolala pasi, kazwitambunudza se shumba. Unonga shumbakadzi, ndiani ungammusa kene?

¹⁰Ludozo gwe bushe agutowobhuda muna Juda, ne swimbo ye bushe aingabhude pakati kwe bana babe, kuswikila wakagulingisana ezha, njudzi dzose dzowonteedza.

¹¹Unosungilila donkana iye pa nzhambi, donkana e isungilila pa nzhambi washalugwa. Unosuka zwiambalo zwizwe nge nkumbi, jasi lile unolisuka nge nkumbi nshaba se malopa.

¹²Mesho awe mashabashaba ngo laladzisa, meno awe matjena ngo ng'wisa nkaka.

¹³“Zebuluni unowogala mu tjekelo dze gungwa, unowobe maswikilo e zwikepe, n'gathu uwe unowobe ku Sidoni.

¹⁴“Isakari i donki yakasima, ilele pakati kwe matanga.

¹⁵Wakabona kuti magalo e kunyaluluka mabuya, ne kuti shango yakanaka, ndizo kaduma kupika ntolo kabe nlanda unoshingisiwa zwakasima.

¹⁶“Dani unowosumikilisa bathu babe, se tjimwe tje itjaba tje Iziraela.

¹⁷Dani unowobe nyoka i pa hwunde ye zila, ipakupaku tji mu zijana, tjinoluma mbizi mu itshitshino, ntathi wayo kawila pasi.

¹⁸“Ndakalindila jidzo lenyu, Yahwe.

¹⁹“Gadi unowonginiligwa nge gupo le batoleli, koga unowobalonda kabanginilila.

²⁰“Asheri unowobe ne zojiwa zwi pezhugwi, unowobe ne zojiwa zwakafanila mambo.

²¹“Nafutali i phala hadzi yakasununguka, inozwala phalana dzakanaka.

²²“Josefa lutabi gunozwala, lutabi gunozwala gupa nsenya, thabi dzidze dzotatha guma.

²³Babhayani nge misebe bakan'nginilila kunotjisa, bakamposa bakammanikidza.

²⁴Koga dati lile likasitongozunguzika, ne maboko awe akathamiwa majatu, nge maboko a Masimbawose wa Jakubo, nge zina le Nlisi, Shongwe ye Iziraela.

²⁵Ndzimu wa botate benyu unomubhatsha, Masimbawose banowomukombolela, nge makombolelo e vula kudwa kudzimu, nenge makombolelo nge vula i pasi, nge makombolelo e zwithuwo ne bana.

²⁶Makombolelo a tate babo makulu pa makombolelo e matombo agelile tjose, kupinda bubuya gose gwe matuthu amile nge kusingapele, atshene angabe makombolelo a Josefa, iye wakathamiwa ntungamili we bakulu babe.

²⁷“Bhenjamini i phele inopalulanya, mu mangwanana inoja tjayabhata, madekwana inokoba tjaatolela.”

²⁸Bose ibaba i njudzi dzili gumi lina mbili dze Iziraela. Matama iyawa ndiwo akalebgwa ndi tate babo tjibaka tjabakabe bebakombolela, bekombolela mmwe ne mmwe nge tjakanlingisana.

²⁹Ipapo kabalaya eti, “Ndabe pejo ngofa. Mundibiganye pakabiganyiwa botate bangu mu guwu li mu nnda wa Efuroni we Nhiti,

³⁰mu guwu li mu nnda ku Makipela, pejo ne Mamure mu shango ye Kanana, mu ntuthu wakatengwa ndi Abhurahama kuna Efuroni we Nhiti kube zwikumbu.

³¹Abhurahama ne nkadzikulu uwe Sara bakabiganyiwako, Isaki ne nkadzikulu uwe bakabiganyiwako Ribeka wakabiganyiwako, nami ndakabiganya Liya ko.

³²Ntuthu iwoyo ne guwu li imomo zwakatengwa mu Bahiti.”

³³Kwakati Jakubo epedza kulaya bakololo babe kalala pa bulawo kafema gwe bupelo ngono kafa.