Read Kalanga Kutangisa 5 Bible Online

Kutangisa 5 - Kalanga bible

Kutangisa 5

¹Ogu lukwalo ngekwe zwizekugwana zwa Adamu. Mu zhuba Ndzimu lawakabumba nthu wakambumba mu ifano tje Ndzimu.

²Wakababumba ali nthu tjilume ne nthu tjikadzi, ngono ukabakombolela ukabadana uti, “Bathu” mu zhuba lawakababumba.

³Adamu kati atjila makole ali zana ling'ompela lina makumi matatu (130), kazwala mwana we tjilisana unofanana naye, ali mu ifano tjitje, ngono kantumila zina kati Seti.

⁴Shule kwe asinozwala Seti, Adamu katjila makole ali mazana ali zhanakadzi (800), ngono kazwala bakololo ne bakololokadzi.

⁵Makole wose a Adamu aakatjila, makole ali mazana ali zhanalume ana makole ali makumi matatu (930), ndizo ekofa.

⁶Seti kati atjila makole ali zana ling'ompela lina makole ali mashanu (105), kazwala Enoshi.

⁷Shule kwe asinozwala Enoshi, Seti katjila makole ali mazana ali zhanakadzi ana ali kutendeka (807), ngono kazwala bakololo ne bakololokadzi.

⁸Makole wose a Seti aakatjila makole ali mazana ali zhanalume ana makole ali gumi lina mabili (912), ndizo ekofa.

⁹Enoshi kati atjila makole ali makumi ali zhanalume (90), kazwala Kenani.

¹⁰Shule kwe asinozwala Kenani, Enoshi katjila makole ali mazana ali zhanakadzi ana makole ali gumi lina ali mashanu (815), ngono kazwala bakololo ne bakololokadzi.

¹¹Makole wose a Enoshi aakatjila, makole ali mazana ali zhanakadzi ana makole ali makumi manna (840), ndizo ekofa.

¹²Kenani kati atjila makole ali makumi ali kutendeka (70), kazwala Mahalaleli.

¹³Shule kwe asinozwala Mahalaleli, Kenani katjila makole ali mazana ali zhanakadzi ana makumi manna (840), ngono kazwala bakololo ne bakololokadzi.

¹⁴Makole wose a Kenani aakatjila makole ali mazana ali zhanalume ana makole ali gumi (910), ndizo ekofa.

¹⁵Mahalaleli kati atjila makole ali makumi ali tathatu ana ali mashanu (65), kazwala Jaredi.

¹⁶Shule kwe asinozwala Jaredi, Mahalaleli katjila makole ali mazana ali zhanakadzi ana makole ali makumi matatu (830), ngono kazwala bakololo ne bakololokadzi.

¹⁷Makole wose a Mahalaleli aakatjila makole ali mazana ali zhanakadzi ana makole ali makumi ali zhanalume ana mashanu (895), ndizo ekofa.

¹⁸Jaredi kati atjila makole ali zana ling'ompela lina makumi ali tathatu ana mabili (162), kazwala Enoki.

¹⁹Shule kwe asinozwala Enoki, Jaredi katjila makole ali mazana ali zhanakadzi (800), ngono kazwala bakololo ne bakololokadzi.

²⁰Makole wose a Jaredi aakatjila makole ali mazana ali zhanalume ana makumi ali tathatu ana mabili (962), ndizo ekofa.

²¹Enoki kati atjila makole ali makumi ali tathatu ana ali mashanu (65), kazwala Methusela.

²²Shule kwe asinozwala Methusela, Enoki wakayenda ne Ndzimu makole ali mazana matatu (300), ngono kazwala bakololo ne bakololokadzi.

²³Makole wose a Enoki aakatjila makole ali mazana matatu ana makumi ali tathatu ana mashanu (365).

²⁴Enoki wakabe eyenda ne Ndzimu, ngono kukawanika asitjipo, ngoti Ndzimu wakantola.

²⁵Methusela kati atjila makole ali zana ling'ompela lina makole ali makumi ali zhanakadzi ana kutendeka (187), kazwala Lameki.

²⁶Shule kwe asinozwala Lameki, Methusela katjila makole ali mazana ali kutendeka ana makumi ali zhanakadzi ana mabili (782), ngono kazwala bakololo ne bakololokadzi.

²⁷Makole wose a Methusela aakatjila, makole ali mazana ali zhanalume ana makole ali makumi ali tathatu ana zhanalume (969), ndizo ekofa.

²⁸Lameki wakati atjila makole ali zana ling'ompela lina makole ali makumi ali zhanakadzi ana mabili (182), kazwala mwana we tjilisana.

²⁹Wakantumila zina kati Nuwa, ngono kabe eti, “Unowotinyalulusa mu nshingo unolema watinodzulana nawo tishinga nge maboko, wakabangiwa nge pasi pakalongwa bhiso ndi Yahwe.”

³⁰Shule kwe asinozwala Nuwa, Lameki katjila makole ali mazana mashanu ana makole ali zhanalume ana mashanu (595), ngono kazwala bakololo ne bakololokadzi.

³¹Makole wose a Lameki aakatjila, makole ali mazana ali kutendeka ana makumi ali kutendeka ana kutendeka (777), ndizo ekofa.

³²Nuwa kati atjila makole ali mazana ali mashanu (500) kazwala Shemu na Hamu na Jafeti.