Read Kalanga Kutangisa 50 Bible Online

Kutangisa 50 - Kalanga bible

Kutangisa 50

¹Josefa kazwilashila pezhugwi kwa tate babe kabalilila, kabaputa.

²Josefa kadwa ng'anga dzakabe dzili pasi kukwe kuti dziwomese itumbu tja tate babe. Ndizo ng'anga dzikawomesa Jakubo.

³Bakatola mazhuba ali makumi manna ngoti tjili itjo tjibaka tjakalizana kuwomesa itumbu. Baegipiti bakatola mazhuba ali makumi ali kutendeka belilila Jakubo.

⁴Kukati mazhuba e kunlilila apela, Josefa kalebeleka ne be ng'umba ya Faro eti, “Ha mundihwila ngoni ndomukumbila kuti mundikumbilile kuna Faro muti,

⁵‘Tate bangu bakati babe pejo ngofa, bakathama kuti nditune kudumana ngekuti ndowobabiganya mu ikumbu tjabakazwitshila mu shango ye Kanana. Ndizo mundiletje ndiyende ndinobiganya tate ndikobuya zwangu.’ ”

⁶Faro kadabila eti, “Yenda unobiganya tate babo sekwa wakatuna kuti unowothama.”

⁷Ndizo Josefa kayenda kunobiganya tate babe. Hadzasha dza Faro dzose dzikayenda naye ne makombgwa e ng'umba iye ne bakulu bose be shango ye Egipiti.

⁸Nsha wa Josefa na iwo ukayenda wose ne bakulu babe ne ng'umba ya tate babe yose. Kwakasala bana koga ne zwithuwo mu shango ye Gosheni.

⁹Koloyi dze ngwa ne babhayani bakatatha mbizi bakayenda naye. Lakabe lili goko gulu gulu.

¹⁰Bakati beswika pa lutombo gwe Atadi pa hwunde ye Jorodani bakalila kunogwadza ngono Josefa kagala nabo ipapo mazhuba ali kutendeka elilila tate babe.

¹¹Kwakati bagali be Kanana bebona tjililo itjetjo pa lutombo bakati, “Etji tjililo tjinohwisa zogwadza tje Baegipiti.” Ndizo bakatumila magalo iyawo beti Abelemizirayimu. Magalo iyawa apa hwunde ye Jorodani.

¹²Ndizo bana ba Jakubo bakanthamila sekwa akabadwa.

¹³Bakansengela ku shango ye Kanana bakambiganya mu guwu limu nnda ku Makipela pejo ne Mamure, wakatengwa ndi Abhurahama muna Efuroni we Nhiti kube zwikumbu.

¹⁴Josefa kabgwilila ku Egipiti ne bakulu babe na bose bakabe bayenda naye kunobiganya tate babe.

¹⁵Bakulu ba Josefa bakati be bona tate babo bafa bakalebesana beti, “Towotini ha ili kuti pamwe Josefa utjakatibhata nge moyo ngono ebe etibgwilizila mbipo yatakanthamila?”

¹⁶Ndizo bakayenda kuna Josefa bakati kunli, “Tate babo bakafa besiya bati,

¹⁷tidwe Josefa titi: ‘Ndokukumbila, uzwiibhatigwe bakulu babo nlandu ne mbipo yabakakuthama.’ Ndizo ngwenu wali tokumbila, uzwiibhatigwe balanda be Ndzimu wa tate babo.” Bakati ipapo belebeleka na Josefa kalila.

¹⁸Bakulu babe bakathigama mbeli kukwe, ngono bakati kunli, “Iswi ti balanda benyu.”

¹⁹Koga Josefa kati ku bali, “Musitje. Apa imi ndi mu tjimo tje Ndzimu kene?

²⁰Nenguba makabe mazwimisila kundithama tjakabipa, Ndzimu wakathama kuti tjibe tjakanaka kutjidza bathu banjinji sekwa unothama sangwenu.

²¹Ndizo musitje, imi ndowomutjengeta imwi ne bana benyu.” Josefa kabanyaladza nge matama iyawa, elebeleka nabo nge buthu.

²²Josefa kagala mu Egipiti ne ng'umba ya tate babe ngono katjila makole ali zana lina makole ali gumi (110).

²³Josefa katjila kabona tjizekugwana tje butatu tje bana ba Ifureimi. Kabona ne bana ba Makiri nkololo wa Manase.

²⁴Josefa kadwa bakulu babe kati, “Imi ndabe pejo ngofa, koga Ndzimu unowomubhatsha ukamudusa mu shango iyeyi kumuyisa ku shango yawakagadzabgwe Abhurahama na Isaki na Jakubo.”

²⁵Ndizo Josefa kadwa Baiziraela kati tunani kuti, “Ndzimu unowoti umudusa mu shango iyeyi, mukasenga mafupa angu mukayenda nawo.”

²⁶Josefa kafa ana makole ali zana lina makole ali gumi (110). Wakawomisiwa kalongwa mu bhokisi mu Egipiti.