Read Kalanga Kutangisa 6 Bible Online

Kutangisa 6 - Kalanga bible

Kutangisa 6

¹Kwakati bathu betangisa kuwanda mu shango, bezwala bakololokadzi,

²bakololo be Ndzimu bakabona kuti bakololokadzi be bathu bakanaka, ngono bakashalula babakada bakabalobola.

³Ipapo Yahwe bakabe beti, “Meya yangu aingagale mu nthu nge kusingapele, ngoti nthu unofa. Mazhuba awe anowobe makole ali zana ling'ompela lina makole ali makumi mabili (120).”

⁴Mu misi iyeyo kwakabe kuna bathu balefu, bakasima mu shango ne mu misi yakaitobela, pakati bakololo be Ndzimu bakawalilana ne bakololokadzi be bathu ngono bakathama bana nabo. Bakabe bali balume be babhayani bakulu ba ntolo, balume bakabe bezibika.

⁵Yahwe bakabona kuti mbipo ye nthu yakula mu shango ne kuti zwabanokumbula mu moyo yabo i mbipo zwibaka zose.

⁶Yahwe bakazwisola kube bakathama nthu mu shango, ngono bakahwa zogwadza.

⁷Ndizo Yahwe bakabe beti, “Ndowolobesa bathu bandakabumba ndibadusa mu shango, bathu ne phuka ne zwibumbiwa zwinokambayila mu shango ne nyuni dzinowuluka, ngoti ndozwisola kube ndakabathama.”

⁸Koga Nuwa kahwigwa ngoni ndi Yahwe.

⁹Edzi i thawu ngekwa Nuwa. Nuwa wakabe ali nthu wakalulwama, asina nlandu pakati kwe bathu be tjibaka tjitje, wakabe eyenda ne Ndzimu.

¹⁰Nuwa wakabe ana bakololo bali batatu, Shemu na Hamu na Jafeti.

¹¹Ngono shango ikalingika yakabola nge jinyo mu kubona kwe Ndzimu, ili zhele kumukilana.

¹²Ndzimu ukalinga shango ngono ukabona yakabola nge jinyo, ngoti mipanga ye bathu bose yakabodziwa nge jinyo.

¹³Ndizo Ndzimu ukati kuna Nuwa, “Ndazwimisila kuzhisa bheledzo le bathu bose, ngoti shango izhele kumukilana nge kwabo. Ndowobalobesa kose ne shango.

¹⁴Ndizo uzwithamigwe araka nge makwasayile akasima, uthame ng'umbana dzakathubukana muili, uidzile nge ikontiri mukati na kuzhe.

¹⁵Oku ndiko sekwa unowoithama: Bulefu gwayo ngagube matshambo ali zana ling'ompela lina matshambo ali makumi matatu ana matatu (133), bupabi gube matshambo ali makumi ali mabili ana matshambo ali mabili (22), bulefu kuyenda pezhugwi gube matshambo ali gumi lina matshambo ali matatu (13).

¹⁶Uithamile denga, usiye fesitere bulefu gungapa gaswa le thambo kudwa pezhugwi. Uthame nkoba pa ntumbu wayo, uithame ng'umba thatu dzakatathikana.

¹⁷Ngoti ndowozhisa nkubila we vula mu shango kulobesa zwitjili zose zwina meya ye bupenyu, tjimwe ne tjimwe mu shango tjowofa.

¹⁸Koga ndowothama tjidumano tjangu nawe, iwe unowongina mu araka, iwe ne bakololo babo ne nkadzi uwo ne bakadzi be bakololo babo.

¹⁹Ungine ne bubili gwe zwitjili zose mu araka, tjilume ne tjikadzi mu ludzi gumwe ne gumwe kuti zwitjile nawe.

²⁰Mu ludzi gumwe ne gumwe gwe nyuni ne mu ludzi gumwe ne gumwe gwe phuka ne ludzi gumwe ne gumwe gwe zwitjili zwinokambayila mu shango zwili zwibili zwinginile ku kuli kuzwitjengeta kuti zwitjile.

²¹Utolebo zojiwa zwinojiwa zwakasiyana siyana uzwibiganye kube zojiwa zwizo ne zwazo.”

²²Nuwa kakuthama ikoku, kathama kose Ndzimu kwawakandwa.