Read Kalanga Kutangisa 7 Bible Online

Kutangisa 7 - Kalanga bible

Kutangisa 7

¹Ipapo Yahwe bakadwa Nuwa bakati, “Ngina mu araka, iwe ne nsha uwo ngoti iwe ndawana wakalulwama mu bathu be tjibaka itjetji.

²Ungine ne phuka ndume dzili kutendeka, imwe ne imwe ina nkwinya wayo hadzi dze ludzi gumwe ne gumwe gwe phuka mbuyanana. Mu phuka dzisi mbuyanana utole mbili mu ludzi gumwe ne gumwe ili ndume ne hadzi,

³ne nyuni utole ndume dzili kutendeka ne hadzi dzadzo dzili kutendeka dze njudzi dzose kuti njudzi dzose dzitjile mu shango.

⁴Ngoti shule kwe mazhuba ali kutendeka ndowonisa vula mu shango mazhuba ali makumi manna ne masiku ali makumi manna, ngono ndowokuba tjimwe ne tjimwe tjinotjila tjandakabumba mu shango.”

⁵Nuwa kathama kose kwaakadwiwa ndi Yahwe.

⁶Nuwa wakabe ana makole ali mazana ali matathatu (600) ha nkubila we vula uzha mu shango.

⁷Nuwa ne nkadzi uwe ne bakololo babo ne bakadzi babo bakangina mu araka kutizha vula dze nkubila.

⁸Phuka dzose mbuyanana ne phuka dzose dzisi mbuyanana ne nyuni ne zwitjili zose zwinokambayila mu shango,

⁹bubili ne bubili ili ndume ne hadzi, zwikangina mu araka kuna Nuwa, Ndzimu sekwa wakadwa Nuwa.

¹⁰Ngono shule kwe mazhuba ali kutendeka vula dze nkubila dzikazha mu shango.

¹¹Nuwa wakati ana makole ali mazana ali matathatu (600), mu mwedzi we bubili ushwa zhuba le bugumi lina mazhuba ali kutendeka (17), muna ilelo zhuba koga, misenya i pasi ikaphutuka ikazhulika ne kudzimu kukazhulika,

¹²ngono vula ikana siku ne sikati mu shango mazhuba ali makumi manna ne masiku ali makumi manna (40).

¹³Muna ilelo zhuba Nuwa ne bakololo babe Shemu na Hamu na Jafeti, kang'ompela ne nkadzi uwe ne bakadzi be bakololo babe bakangina mu araka.

¹⁴Imomo bakabe bana phuka imwe ne imwe ye shango kuyenda nge ludzi gwayo ne zwithuwo zose nge njudzi dzazo ne tjimwe ne tjimwe tjinokambayila mu shango nge ludzi gwatjo ne nyuni imwe ne imwe nge ludzi gwayo, tjimwe ne tjimwe tjina mapapilo.

¹⁵Bubili nge bubili gwe zwitjili zose zwina meya ye butjilo muzwili zwakazha kuna Nuwa zwikangina mu araka.

¹⁶Phuka dzose dzakabe dzingina mukati yakabe ili ndume ne hadzi, Ndzimu sekwa wakabudza Nuwa. Ipapo Yahwe bakanzhalilila mukati.

¹⁷Nkubila ukadwilila mu shango mazhuba ali makumi manna (40), ngono vula ikati ipaphidzika ikamilidza araka ikayenda pezhugwi.

¹⁸Vula ikapaphidzika kwazo mu shango, araka ikaangama pezhugwi kwe vula.

¹⁹Vula ikamilidzika kwazo mu shango ikakwididza matombo wose malefu.

²⁰Vula ikamilidzika ikakwitidza matombo, bulefu gungabe thambo dzili kutendeka pezhugwi kwe matombo.

²¹Zwibumbiwa zose zwimu shango zwikafa: Nyuni ne zwithuwo ne phuka dze shango ne zwikonyana zwinonyewula mu shango nenge bathu bose.

²²Zose zwina meya ye bupenyu mu zwimilo zwazo mu shango zwikafa.

²³Ndizo Yahwe bakakuba tjimwe ne tjimwe tjinotjila mu shango, bathu ne phuka ne zwitjili zwinokambayila mu shango ne nyuni, zose zwakakubiwa mu shango. Nuwa koga ndiye wakasala ne bakabe banaye mu araka.

²⁴Vula ikasala yakakwididza shango mazhuba ali zana lina mazhuba ali makumi ali mashanu (150).