Read Kalanga Kutangisa 9 Bible Online

Kutangisa 9 - Kalanga bible

Kutangisa 9

¹Ndzimu ukakombolela Nuwa ne bakololo babe ukati, “Ibeni ne mbeleko muwande muzhale shango.

²Phuka dzose dze shango ne nyuni dzose dza pezhugwi na zose zwinokambayila ne hwobe dze gungwa zose zowomutja zwikamutizha. Zose ndazwilonga mu maboko enyu.

³Tjimwe ne tjimwe tjinotjila tjiyendayenda tjowobe zojiwa zwenyu. Sekwa ndakamupa milibo minyolo, ngwenu ndomupa tjimwe ne tjimwe.

⁴Koga musitongoja nyama ina butjilo gwayo, hwuti ina malopa.

⁵Nge malebeswa ndowoloba phuka kene nthu unotebula malopa enyu emubulaya. Ndowoloba nge lufu mmwe ne mmwe unobulaya mmwe.

⁶Kene ali ani unotebula lopa le nthu, na iyebo lopa lile lowotebugwa nge nthu, ngoti Ndzimu wakathama nthu mu ifano tjawo.

⁷Imwi, ibeni ne mbeleko mupaphidzike muwande mu shango.”

⁸Ipapo Ndzimu ukadwa Nuwa ne bakololo babe ukati,

⁹“Bonani, ndothama tjidumano tjangu namwi ne zwizekugwana zwenyu,

¹⁰ne tjibumbiwa tjimwe ne tjimwe tjinamwi, nyuni ne zwithuwo ne phuka dzose dze shango, zose zwakabhuda mu araka.

¹¹Ndothama tjidumano tjangu namwi, tjekuti, akutjina nkubila unowolobesa zwitjili zose, naiko akutjina nkubila utjawokolomodza shango.”

¹²Ndizo Ndzimu ukabe uti, “Tjilakidzo tje tjidumano tjandinothama pakati kwangu namwi ne tjimwe ne tjimwe tjinotjila tjinamwi, tjidumano tje zwizekugwana zose, etji,

¹³ndabiga nlalabungu wangu mu makole, ngono unowobe tjilakidzo tje tjidumano pakati kwangu ne shango.

¹⁴Kowoti ndimilidzila makole pezhugwi, nlalabungu uboneka mu makole,

¹⁵ndowokumbula tjidumano tjangu pakati kwangu namwi ne zwitjili zose zwe njudzi dzose. Vula adzitowofa dzabe nkubila kakale kulobesa zwitjili zose.

¹⁶Nlalabungu mu makole, ndowoulinga akumbula tjidumano tjisingapele pakati kwe Ndzimu ne zwibumbiwa zose zwinotjila zwe ludzi gumwe ne gumwe mu shango.”

¹⁷Ndzimu ukabe uti kuna Nuwa, “Etji nditjo tjilakidzo tje tjidumano tjandathama pakati kwangu ne zwitjili zose mu shango.”

¹⁸Bakololo ba Nuwa bakabhuda mu araka ndi Shemu na Hamu na Jafeti. Hamu ndi tate ba Kanana.

¹⁹Ibaba batatu bakabe bali bana ba Nuwa, ndibo bobatategulu be bathu bose mu shango.

²⁰Nuwa, nlume wakabe ali nlimi, ndiye we kutanga kulima nnda we mizhambi.

²¹Kang'wa nkumbi kalaladza, ngono kalala mu nshasha asakasungila.

²²Hamu, tate ba Kanana kabonela tate babe, ngono kanobudza bakulu babe kuzhe.

²³Ipapo Shemu na Jafeti bakatola ngubo bakaibiga mu mathudzi abo, bakayenda nge ku shule bakafukidza tate babo. Njiso dzabo dzakabe dzakalinga ntome kuyita kuti basibonele tate babo.

²⁴Nuwa kati emuka mu kulaladza kukwe, kaziba tjaakabe ashingigwa nge nkololo uwe ntukunu,

²⁵ngono kati, “Kanana ngaabe ne bhiso! Unowobe nlanda we balanda ku bana ba mmeyabe.

²⁶Ngakukudziwe Yahwe Ndzimu wa Shemu! Kanana unowobe nlanda wa Shemu.

²⁷Ndzimu ngautalabudze ntuthu wa Jafeti. Jafeti ngaagale mu mishasha ya Shemu, Kanana unowobe nlanda uwe.”

²⁸Shule kwe nkubila Nuwa katjila makole ali mazana matatu ana makole ali makumi mashanu (350).

²⁹Makole wose Nuwa aakatjila, makole ali mazana ali zhanalume ana makole ali makumi mashanu (950), ngono kafa.