Read Kalanga 2 Samuele 1 Bible Online

2 Samuele 1 - Kalanga bible

2 Samuele 1

¹Shule kwe lufu gwa Saulo, Dafite asinobuya edwa kukunda Baamaleki, Dafite kagala mazhuba mabili mu Zikilagi.

²Kukati mu zhuba le butatu, kukazha nlume edwa ku bukotokelo gwa Saulo, zwiambalo zwizwe zwakapaluka ana mavu mu nsholo. Kukati eswika pana Dafite, kawila pasi nge kunteta.

³Dafite kambhuzwa kati, “Unodwa ngayi?” Kadabila eti, “Ndatizha asiya ku bukotokelo gwe Iziraela.”

⁴Dafite kati kunli, “Apa kwayenda tjini kene? Undibudze!” Kadabila eti, “Babhayani batizha ku ngwa, ngono bathu banjinji bawa bafa. Kose na Saulo ne nkololo uwe Jonatani bafabo.”

⁵Dafite kabhuzwa nzhuzha wambikila eti, “Waziba tjini kuti Saulo ne nkololo uwe Jonatani bafa?”

⁶Nzhuzha kadabila eti, “Kwakashingikala kuti ndibe ndili pezhugwi kwe Dombo le Gilibhowa, ipapo awila Saulo akanaila thumo lile, koloyi dze ngwa ne batathi be mbizi bakabe bantatamila bansedzelela.

⁷Ndizo katjebuka kandibona, kabe endidana, adabila nditi, ‘Tetshi.’

⁸Kandibhuzwa eti, ‘Ndiwe ani?’ Ndakan'dabila nditi, ‘Ndi N'amaleki.’

⁹Ipapo kandidwa kati, ‘Izha ngeno, undibulaye, ndimu zwibhayo zwe lufu, ngono meya yangu inolambila mundili.’

¹⁰Ndizo ndakama panli ambulaya, ngobe ndakaziba kuti aangatjile shule kwe asinowa. Ndakatola tjiala tje bushe mu nsholo uwe ne linga lakabe lili mu luboko gugwe, ngono ndazha nazo kuna tetshi wangu.”

¹¹Ipapo Dafite kabhata zwiambalo zwizwe kazwipalula ne balume bose baakabe anabo bakathamabo beijalo.

¹²Bakabe mu tjililo, bakalila, kakale bakazwinyima zojiwa kunoswika madekwana belilila Saulo ne nkololo uwe Jonatani ne bathu ba Yahwe ne ng'umba ye Iziraela, ngobe bakabe bawa nge thumo.

¹³Dafite kadwa nzhuzha wambikila eti, “Unodwa ngayi?” Kadabila eti, “Imi ndi mwana we ntaya, ndi N'amaleki.”

¹⁴Dafite kambhuzwa kati, “Apa ini wakabe usingatje kumilidza luboko gugo kupeleledza nzhodziwa wa Yahwe kene?”

¹⁵Ipapo Dafite kadana mmwe we babhayani babe kandwa kati, “Izha ngeno umbulaye.” Kabe enloba enligila pasi ebe efa.

¹⁶Dafite kati kunli, “Malopa awo abe mu nsholo uwo, ngobe waleba nge nlomo uwo sekwa wathama uti, ‘Ndabulaya nzhodziwa wa Yahwe.’ ”

¹⁷Dafite kamba lumbo gwe tjililo ngekwa Saulo ne nkololo uwe Jonatani.

¹⁸Kalaula kuti bathu be Juda badiyiwe lumbo gwe dati, bonani gwakakwagwa mu Lukwalo gwa Jashari.

¹⁹“Gudzo lilo, Iziraela, lilele lakafa mu mituthu yakatuthumala! Bahali bawa seni!

²⁰Musitongo kuleba mu Gati, Musitongo kusumikila mu zila dze Ashikeloni, kungadwa kushathisa bakololokadzi be Bafilisitiya, kungadwa kushathisa bakololokadzi be basakathumbigwa.

²¹“Imwi matombo e Gilibhowa, ngakusibe ne khawa kene vula pezhugwi kwenyu, kusibe ne minda ingavung'wa! Ngobe ikweno kwaka temapadziwa tjivikisi tjaanovikisa tje nhali, tjivikisi tja Saulo atjitjowofa tjazhodziwa mafuta ndodwa.

²²“Kudwa mu malopa e bakabulawa kudwa mu mafuta e bahali nsebe wa Jonatani hauzoshanduka koga, ne thumo la Saulo lakabelisina ngoni.

²³“Saulo na Jonatani, badiwa banodika! Mu butjilo ne mu lufu abazotongo thubukana, bakabe bemadzuka kupinda madzu, bakabe bakasima kupinda shumba.

²⁴“Imwi bakololokadzi be Iziraela lililani Saulo, wakamumbadza ne matyila mashaba, emunakisa, wakanakisa zwiambalo zwenyu nge minakiso ye golide.

²⁵“Bahali bawa seni pakati kwe ngwa! Jonatani wabulawa ku matuthu.

²⁶“Ndimu buyendasi nge kuko, gamu langu Jonatani, kukulu kwazo sekwa ndabe ndikuda ndiko, ludo gugo mundili gwabe guli gunotjenamisa, gutjenamisa kupinda ludo gwe betjikadzi.

²⁷“Bahali bawa seni ne zwibhayano zwe ngwa zwaloba!”