Read Kalanga 2 Samuele 10 Bible Online

2 Samuele 10 - Kalanga bible

2 Samuele 10

¹Kwakati shule kwa ikoku, mambo we Baamoni kafa, ngono nkololo uwe Hanuni kan'gala thaka.

²Dafite kabe eti, “Ndowothamila Hanuni nkololo wa Nahashi buthu, sekwa tate babe bakandithamila buthu.” Ndizo Dafite katuma batumwa kunomila mu bumo gugwe kunfumidza ngekwa tate babe. Kwakati bamilili ba Dafite baswika mu shango ye Baamoni,

³batungamili be Baamoni bakadwa Hanuni tetshi wabo bakati, “Apa mokumbula kuti Dafite unoteta tate benyu, ngotumila batumwa kuwomila kumuli kene? Apa aazobatumila kuwoshola nzi bali shodzi kuti baukulile kene?”

⁴Ndizo Hanuni kabe ebhata batumwa ba Dafite, ebatesela ndedu lushaya gumwe gwe mmwe ne mmwe wabo, ebe etjeka zwiambalo zwabo kuma muthunji, ebe ebatata.

⁵Kwakati Dafite abudziwa ngekwako, katuma batumwa kunobashanganidza, ngobe bakabe balengudzika kwazo. Mambo bakabadwa bakati, “Mugale ku Jerikho kuswikila ndedu dzenyu dzikula ndizo mukobuya.”

⁶Kwakati Baamoni batjibona kuti bazwigwisanya na Dafite, bakatapa babhayani be makumbo bali zwiwulu zwili makumi mabili (20 000) be Baaramu kudwa ku Bhetirehobhu ne Baaramu be Zoba, na Mambo we Maakha ana balume bali tjiwulu (1 000), nenge balume bali zwiwulu zwili gumi lina kubili (12 000) banodwa ku Tobi.

⁷Kwakati Dafite ehwa ikoku, katuma Joabu ne goko lose le babhayani.

⁸Baamoni bakabhuda bakama bali mu ndongoloso ye ngwa pa nkoba we nzi wabo, koga Baaramu be Zoba ne be Rehobu ne balume be Tobi ne Maaka bakabe bali kupoga ku shango.

⁹Kukati Joabu ebona kuti ngwa yankomba mbeli na shule, kashalula bamwe be babhayani banogalikabgwe, kabalingisanya ne Baaramu.

¹⁰Bamwe balume bakasala kabalonga mu maboko Abishayi nnung'una uwe kube pasi kukwe, kabalingisanya ne Baamoni.

¹¹Kabe endwa eti, “Ha Baaramu bangandikulila, unowozha kuwondibhatsha, ngono ha Baamoni bangakukulila, ndowozha kuwokubhatsha.

¹²Ube ne tjilopa, tigwe takasima tigwila bathu bedu ne mizi ye Ndzimu wedu, Yahwe ngabathame tjabanobona tjakabalulwamila.”

¹³Ndizo Joabu ne baakabe anabo bakasedzela mu ngwa kugwa ne Baaramu, Baaramu bakantizha.

¹⁴Kwakati Baamoni bebona Baaramu betizha naibobo bakatizha Abishayi bakangina mu nzi. Ndizo Joabu kabgwilila ku Jerusalema.

¹⁵Shule kwe Baaramu basinobona kuti bakundiwa ne Baiziraela bakazwikubunganya.

¹⁶Hadadezeri kadusa hwi kudana Baaramu bakabe bali seli kwe Gwizi gwe Yufuratesi, ngono bakazha ku Helamu, Shobaki nlauli we babhayani ba Hadadezeri akabatungamilila.

¹⁷Kwakati Dafite ebudziwa ngekwako, kakubunganya Baiziraela bose, bakatjuluka Jorodani bakayenda ku Helamu. Baaramu bakazwilulwamisila ngwa bakashanganidza Dafite kugwa naye.

¹⁸Koga Baaramu bakamadzuka betizha Baiziraela, Dafite kabulaya bayendisi be koloyi dze ngwa bali mazana ali kutendeka (700) ne babhayani be makumbo bali zwiwulu zwili makumi manna (40 000), bakaloba bakakubadza Shobaki nlauli we ngwa yabo, kafila ipapo.

¹⁹Kwakati bomambo bose bakabe bali makulukota a Hadadezeri bebona kuti bakundiwa nge Iziraela, bakathama tjidumilano nabo bakabe balanda babo. Ndizo Baaramu bakatja bakasitjafe babhatsha Baamoni kakale.