Read Kalanga 2 Samuele 11 Bible Online

2 Samuele 11 - Kalanga bible

2 Samuele 11

¹Kukati mu tjilimo, nge tjibaka tja bomambo bebhuda beyenda ku ngwa, Dafite katuma Joabu ne makombgwa awe ne ngwa yose ye Iziraela. Bakalobesa Baamoni, bebuya bekomba Rabha nge ngwa. Koga Dafite iye wakabe asala ku Jerusalema.

²Kukati limwe zhuba kuli matewuko Dafite emuka pa bulawo gugwe, kabe eyendayenda pezhugwi kwe denga le ng'umba iye ye bushe. Kati ali pezhugwi kwe ng'umba kabona nkadzi engula, nkadzi mbuya kwazo.

³Dafite katuma ntumwa kunobhuzwisisa ngekwe nkadzi iwoyo. Kukalebgwa kuyi, “Ndi Bhatisheba nkololokadzi wa Eliamu, nkadzi wa Uriya we Nhiti.”

⁴Ndizo Dafite katuma batumwa kunon'dana, nkadzi kazha, Dafite kalala naye. (Bhatisheba wakabe atjadwa mu kuzwitjenapadza shule kwe mazhuba awe e mangulilo.) Shule kwa ipapo kabgwilila ku nzi uwe.

⁵Ngono nkadzi kazwisenga katumila dama kuna Dafite eti, “Ndakazwisenga.”

⁶Ndizo Dafite katumila dama kuna Joabu eti, “Tumila Uriya we Nhiti kundili.” Ngono Joabu katumila Uriya kuna Dafite.

⁷Kwakati Uriya eswika kuna Dafite, kambhuzwa kuti Joabu ne babhayani bamuka tjini nenge ngwa kuti inoyenda tjini.

⁸Ipapo Dafite kadwa Uriya kati, “Yenda ku ng'umba iyo, unonyatutuka.” Uriya kadwa mu ng'umba ye bushe kayenda, ngono katobedziwa tjipo ku ng'umba iye tjidwa kuna mambo.

⁹Koga Uriya kayizela pa nkoba we ng'umba ye bushe ne balanda bose ba tetshi uwe, kasitongoyenda ku nzi uwe.

¹⁰Kukati Dafite ehwa kuti Uriya aazoyenda ku nzi uwe, kambhuzwa kati, “Apa ateiko kwawabe utjaswika wagala usipo, ini usayenda ku nzi uwo kene?”

¹¹Uriya kashandula Dafite eti, “Balume be Iziraela ne Juda ba mu ngwa ku shango, ne Bhokisi le Tjidumano banalo ikoko na tetshi wangu Joabu ne makombgwa awe bagele mu shango pa liteya njelele. Apa ndingayenda ku nzi wangu ndinoja nding'wa ndibuya ndilala ne nkadzi wangu kene? Ndolebesa ndotuna, se mutjatjila, andingafe ndathama kuthu kwakajalo.”

¹²Ndizo Dafite kadwa Uriya kati, “Ushwe ipapa kakale nasi, ngono mangwana ndowokuletja ukabgwililazo.” Ndizo Uriya kashwa mu Jerusalema zhuba ilelo nenge tjimuka.

¹³Dafite kankoka kunoja ebuya eng'wa naye, ngono kanlaladzisa, kukati madekwana Uriya kabhuda kanoyizela pa thobo dzidze ne balanda ba tetshi uwe, koga kasitongoyenda ku nzi uwe.

¹⁴Tjimuka mangwanana Dafite kakwalila Joabu lukwalo, kagupa Uriya kunompa igo.

¹⁵Mu lukwalo wakakwala eti, “Mutungamidze Uriya mu ngwa kwainolema kwazo, mube muntshedukila kuti abhaiwe afe.”

¹⁶Kukati Joabu ekomba nzi nge ngwa, kadwa Uriya kunongina paakabe eziba kuti zwita zwakasima.

¹⁷Balume be nzi iwoyo bakabhuda kuwobhayana na Joabu, bamwe be babhayani, balanda ba Dafite bakafa na Uriya we Nhiti kabulawabo.

¹⁸Joabu wakatuma ntumwa kunobudza Dafite nge buzhalo ngekwe ngwa.

¹⁹Kadwa ntumwa kati, “Ha usinopedza kubudza mambo thawu dzose ngekwe ngwa,

²⁰ha mambo bangazhala bushongola, ha bangakubhuzwa beti, ‘Ini makangina kusi kwe nzi kwazo kugwa? Apa makabe musingazibe kuti banowoposa misebe betjuludza guma kene?

²¹Apa ndiyani wakabulaya Abimeleki nkololo wa Jerubesheti kene? Apa nkadzi azoposa gwiyo katjuludza guma likan'wila, kabe efa ku Thebesi? Ini makabe musedzela kusi kwe guma?’ Ube udwa mambo uti, ‘Ne nlanda wenyu Uriya we Nhiti wafabo.’ ”

²²Ndizo ntumwa kayenda, ngono wakati eswika kabudza Dafite zose zwaakabe adwiwa ndi Joabu kuti azwilebe.

²³Ntumwa wakabudza Dafite eti, “Balume ibabaje bakatikulila, bakabhuda bakagwa naswi mu shango, koga takabatutudzila shule tikanobasiya pa nkoba we nzi.

²⁴Ipapo Baposi be misebe bakaposela misebe ku balanda benyu balipezhugwi kwe guma, ngono bamwe be balanda ba mambo bakafa ne nlanda wenyu Uriya we Nhiti wakafabo.”

²⁵Dafite wakadwa ntumwa kati, “Udwe Joabu uti, ‘Kuthu ikoku kusikugwadzise moyo, ngobe thumo lobhaya walinobe lalingisana naye. Igwani makasima mukolomodze nzi iwoyu.’ Ulebe uijalo kusimisa Joabu tjilopa.”

²⁶Kwakati nkadzi wa Uriya ehwa kuti nlume uwe wafa, akanlilila.

²⁷Kukati tjibaka tje tjililo tjapinda, Dafite kabe eti nkadzi wa Uriya azhisiwe ku ng'umba iye, ngono kanlobola, akawanila Dafite mwana we tjilisana. Koga kuthu ikoku kwakathamwa ndi Dafite kukasishathise Yahwe.