Read Kalanga 2 Samuele 12 Bible Online

2 Samuele 12 - Kalanga bible

2 Samuele 12

¹Yahwe bakatuma Nathani kuna Dafite. Wakati eswika kunli kandwa kati, “Kwakatongobe ne balume babili mu mmwe nzi, mmwe akafuma mmwe ali nshayi.

²Nlume we nfumi wakabe ana pkhwizi ne mbudzi njinji kwazo ne ng'ombe,

³koga nlume we nshayi wakabe asina tjaanatjo aisi pkhwizana hadzi ing'ompela yaakabe atenga. Wakailela, ikakulila munli ne bana babe. Yakabe ija naye mu ndilo ing'wa mu bhepe lile ibuya ilala mu maboko awe. Yakabe inga nkololokadzi munli.

⁴Limwe zhuba nlume we nfumi kakumbiwa nge mwezi mu nzi uwe, koga nlume we nfumi katjiba kutola imwe ye pkhwizi kene mbudzi kene ng'ombe iye kuibhaya ethamila mwezi uwe zojiwa. Mu bumo gwa ikoku, wakatola pkhwizana hadzi ye nlume we nshayi kaibhaya kathamila mwezi uwe zojiwa.”

⁵Ipapo Dafite kazhala bushongola kwazo ngekwe nlume iwoyo, ngono kadwa Nathani kati, “Ndolebesa ndotuna na Yahwe banotjila, nlume wakathama ikoku wakafanigwa ngofa!

⁶Wakafanila lipa pkhwizana iyeyi kwakatiliyana kanna, ngobe wakathama kuthu ikoku kakale asina ngoni.”

⁷Ndizo Nathani kadwa Dafite kati, “Iwoyo nlume ndiwe! Ngono Yahwe Ndzimu we Iziraela bakati, ‘Ndakakubiga mambo we Iziraela, abuya akugwila kukudusa mu maboko a Saulo.

⁸Ndaka kupa ng'umba ya tetshi uwo, akupa bakadzi ba tetshi uwo mu maboko. Abuya akupa ng'umba dze Iziraela ne Juda. Ngono ha kuli kuti ikoku kwakabe kuli kushomanana, ndabe ndinga kupaphidzila kunjinji kakale.

⁹Hwutini walengudza dama la Yahwe ngothama mbipo mbeli kwabo kene? Wakabulaya Uriya we Nhiti nge thumo ku ngwa, ubuya utola nkadzi uwe unthama uwo, wakambulaya nge thumo le Baamoni.

¹⁰Ndizo ngwenu thumo alitjowobhuda mu ng'umba iyo, ngobe wandilengudza, ubuya utola nkadzi wa Uriya we Nhiti unthama uwo!’

¹¹“Yahwe bakaleba beti, ‘Ndokumusila mbatsha kudwa mukati kwe ng'umba iyo. Ndowotola bakadzi babo mbeli kuko abapa ikamu tjitjo, ngono unowowalilana ne bakadzi babo kuli masikati.

¹²Iwe wakakuthama wakabgwata, koga imi ndowothama kuthu ikoku masikati mbeli kwe Baiziraela bose.’ ”

¹³Kadwa Nathani kati, “Ndakatjinyila Yahwe.” Nathani kanshandula eti, “Yahwe bakuzwiibhatigwa jinyo lilo, autjowofa.

¹⁴Nekwakajalo, ngobe wakalengudza Yahwe kwazo ngothama ikoku, iwoyo mwana uwo unowozwagwa unowofa.”

¹⁵Shule kwaikoku Nathani ebe eyenda ku nzi uwe. Yahwe bakaloba mwana wa Dafite waakazwala ne nkadzi wa Uriya kagwala kwazo.

¹⁶Dafite kathigamila Yahwe ekumbilila mwana iwoyu, wakazwinyima zojiwa kangina mu ng'umba iye, kalala akatizwambata pasi busiku gose.

¹⁷Sholotjena dze ng'umba iye dzikamilika dzikayenda kunli kummusa, koga kalamba muka ne zojiwa akasitongozwija nadzo.

¹⁸Mu zhuba le kutendeka mwana kafa. Ngono balanda ba Dafite bakatja kumbudza kuti mwana wafa, ngobe bezwidwa beti, “Kwakati mwana atjatjila, takalebeleka na Dafite, koga kasitongo titeedza, ngono ngwenu towombudza tjini kuti mwana wafa kene? Pamwe ungadwa ezwithama tjimwe tjakabipa!”

¹⁹Kukati Dafite ebona kuti balanda babe banonyebezelana, kaziba ha mwana afa. Ngono kababhuzwa kati, “Mwana wafa kene?” Bakadabila beti, “Ee, wafa.”

²⁰Ipapo Dafite kamuka pasi, kangula mbili, kazhola mafuta, kaambala zwiambalo zwipoga. Kangina mu Ng'umba ya Yahwe katembezela. Kudwa ipapo kayenda ku ng'umba ye bushe, kakumbila zojiwa bakampa kaja.

²¹Sholotjena dzidze dzikambhuzwa dzikati, “Hwutini muthama muijali? Kwakati mwana atjatjila mukazwinyima zojiwa mukanlilila, ngono ngwenu mwana wafa, mamuka mukaja zojiwa.”

²²Dafite kashandula eti, “Kwakati mwana atjatjila, azwinyima zojiwa abuya alila, ngobe ndakazwidwa nditi, ‘Ndiani unoziba? Pamwe Yahwe bangandihwila ngoni, mwana kapola.’

²³Koga ngwenu mwana wafa, ndowobe nditjazwinyimilani zojiwa? Apa ndinga mmusa kene? Imi ndimi ndinowontobela, koga iye aatjowoshandukila kundili.”

²⁴Ndizo Dafite kanyaladza nkadzi uwe Bhatisheba, kankumba kawalilana naye, kawana mwana we tjilisana kantumila zina eti Solomoni. Yahwe bakada mbisana,

²⁵ngono Yahwe bakatuma nlebesambeli Nathani kantumila zina eti Jedidiya.

²⁶Ipapo Joabu kagwa ne Rabha nzi nkulu we Baamoni, ngono bakautapa.

²⁷Joabu katuma batumwa kunobikila Dafite beti, “Ndakagwa ne Rabha atapa tshima le nzi nkulu una vula njinji.

²⁸Ngono ngwenu tjikubunganya babhayani bose bakasala, unginilile nzi uwutole, ndisidwe ndiutola imi, ube udwa udang'wa nge zina langu.”

²⁹Ndizo Dafite kakubunganya babhayani bose bakayenda ku Rabha, kainginilila kaikulila kaitola.

³⁰Katola tjiala mu nsholo wa mambo wabo tjebulemo gwe talenta ye golide, tjakabe tjakanakisiwa nge mabgwe akanaka, ngono tjikaambadziwa Dafite mu nsholo. Wakatolelanya ne zwakatapiwa mu nzi zwisizwishoma.

³¹Kadusila bathu bakabe bali mu nzi iwoyo kuzhe, kabalonga mu kushinga nge dzisaha ne dzipiki ne mashathu, ebuya ebathama kuti bashinge kunothamwa zwitina. Kathama eijalo mu mizi yose ye Baamoni. Ndizo Dafite ne babhayani babe bose bakabgwilila ku Jerusalema.