Read Kalanga 2 Samuele 14 Bible Online

2 Samuele 14 - Kalanga bible

2 Samuele 14

¹Joabu nkololo wa Zeruya kaziba kuti moyo wa mambo umile ngekwa Abusalomu.

²Katuma nthu ku Tekowa kunon'danila nkadzi ko wakatjenjela. Kati eswika kandwa kati, “Uzwithame umu tjililo, uambale zwiambalo zwe tjililo, usitongo zhola mafuta, ngono uzwitole se nkadzi una mazhuba manjinji elilila nfi,

³ube uyenda kuna mambo unolebeleka nabo matama iyawa.” Joabu kambudza matama aakafanila kunoleba.

⁴Kwakati nkadzi we Tekowa eswika kuna mambo kawila pasi nge zwidwi ebutjila ebe eti, “Mambo, ndokumbila bhatsho!”

⁵Mambo bakambuzwa bakati, “Ndingakubhatsha ngeni?” Nkadzi kadabila eti, “Sekwamunondibona ndi tjilikadzi, ndakafigwa nge nlume.

⁶Nlandakadzi wenyu wakabe ana bakololo babili, kukati limwe zhuba bakagwa bali ku shango, ngono kukabe kusina ungabaangulanya, ngono mmwe kaloba mmwe kambulaya.

⁷Ngono ngwenu be nsha wangu bakandimukila bose beti, ‘Utipe nlume iwoyu wakabulaya nnung'una uwe, kuti timbulayile kutebula lopa le nnung'una uwe waakabulaya,’ ngono towobe tatjisala tisitjina na iye n'gali thaka dumbu. Ngekujalo banowobe balobesa lutshinga, besiya nlume wangu asitjina zina kene limbelimbe pasi kwe ntutshi we zhuba.”

⁸Mambo bakadabila beti, “Yenda ku nzi, ndowotola thambo ngekuko.”

⁹Ngono nkadzi we Tekowa kadwa mambo kati, “She wangu mambo, nlandu ngaube mu mathudzi angu ne nsha wa tate bangu, mambo ne ng'umba yabo ye bushe bashaye nlandu.”

¹⁰Mambo bakashandula beti, “Ha kuna ungakudwa tjimwe, unzhise kundili, ngono aangatjafe akudziyidza.”

¹¹Nkadzi kabe eti, “Mambo ndomukumbila kuti mundikumbilile muna Yahwe Ndzimu wenyu kuti badzibe mbgwilizili we malopa kuti asipaphe kabulaya kakale, kuti nkololo wangu asilobesiwe.” Dafite kashandula eti, “Ndotuna na Yahwe banotjila, nkololo uwo angahwisiwe zogwadza, nakuto kuli kutukununu.”

¹²Nkadzi kabe eti “She wangu, mambo wangu, nlandakadzi wenyu unokumbila lebeleka namwi.” Dafite kashandula eti, “Kwakalulwama lebelekazo.”

¹³Nkadzi kabe eti, “Hwutini makakombamisila bathu be Ndzimu nge kwakajali? Ngekuti ha mambo bakaleba beijalo, banonga ba nlandu, ngobe basakashandusa nkololo wabo wakabe atatiwa.

¹⁴Lufu nde gwedu, tonga vula yatebukila pasi, isingake ikawolegwa kakale, koga Ndzimu autodusa butjilo, kuzhe kwe kuti, unothama maano ekuti, wakabe alashiwa, asibe nlashiki muuli.

¹⁵Ngono ngwenu she wangu mambo wangu, ndazha kumuli, ngobe bathu bakanditjisa, ndizo ndakazwidwa ati, ndolebeleka na mambo, pamwe bangathamila nlanda wabo tjaanokumbila.

¹⁶Pamwe mambo bangaduma kugwila nlanda wabo mu luboko gwe nlume unoshaka kundidusilanya ne nkololo wangu mu thaka Ndzimu yawakatipa!

¹⁷Ngono ngwenu nlanda wenyu kati, ‘Dzene dama la she wangu mambo, lingandizhisila kunyatutuka, ngobe she wangu mambo banonga ntumwa we kudzimu mu kupalalanya bubuya ne mbipo. Yahwe Ndzimu wenyu babe namwi!’ ”

¹⁸Ndizo mambo bakadabila nkadzi beti, “Usitongo lamba dabila bhuzo dzandinowokubhuzwa.” Nkadzi kabe eti “Mundibhuzwe tetshi wangu mambo.”

¹⁹Mambo bakabhuzwa nkadzi bakati, “Apa Joabu aana gobe muna kose ikoku?” Nkadzi kadabila eti, “Ndolebesa ndotuna namwi she wangu mambo, akuna tjandinganyanyayidza she wangu mambo muna kose kwabaleba. Malebeswa ndakadwiwa nge nlanda wenyu Joabu kuti ndingathamani ebuya ediya nlandakadzi wenyu kuti alebeni.

²⁰Nlanda wenyu Joabu wakathama eijali kushandula tjimo muna sekwa tjili itjo. She wangu bana butjenjedu gunonga gwe ntumwa we kudzimu, banoziba tjimwe ne tjimwe tjinoshingikala mu shango.”

²¹Mambo bakadwa Joabu bakati, “Ngono ngwenu, tjithama uijali, yenda unodana mbisana Abusalomu azhe ngeno.”

²²Joabu kathigama pasi kakotamisa nsholo, kayemulila mambo kuti bakombolegwe eti, “Nasi nlanda wenyu waziba kuti she mambo wangu bamile naye, ngobe mambo badusa tjikumbilo tje nlanda wabo.”

²³Ndizo Joabu kamilika kayenda ku Geshu kanotola Abusalomu kazhisa ku Jerusalema.

²⁴Ngono mambo bebe beti, “Abusalomu ngaayende ku ng'umba iye, anditoshaka kumbona.” Ndizo Abusalomu kayenda ku ng'umba iye asashanganya buso na mambo.

²⁵Mu Iziraela yose kwakabe kusina nlume wakabe elumbidziwa ngekwe bubuya gugwe sa Abusalomu. Kudwa ku nsholo kunoti pasi kwe gumbo lile kusina pape paungasola.

²⁶Wakabe eti ha ethubula mavudzi mu nsholo uwe, wakabe otesegwa bupelo gwe gole limwe ne limwe otjilemegwa nge mavudzi, ebe eyela mavudzi e nsholo uwe ibe shekele dzili mazana mabili (200) nge tjiyelo tje bushe.

²⁷Abusalomu wakawana bakololo bali batatu ne nkololokadzi nng'ompela. Zina le nkololokadzi uwe lakabe liyi Tama, wakabe ali nkadzi mbuya kwazo.

²⁸Abusalomu wakagala makole mabili mu Jerusalema asingatongo shanganya buso na mambo.

²⁹Ipapo Abusalomu kadana Joabu kuti antume kuna mambo, ngono Joabu kalamba kuzha kunli. Kantumila nthu kakale gwe bubili kundana ngono kasizhe.

³⁰Ndizo Abusalomu kadwa balanda babe kati, “Lingani, nnda wa Joabu upejo ne wangu, ngono una mathunde e bhali, yendani munoupisa nge moto, ndizo balanda ba Abusalomu bakaulonga moto.”

³¹Joabu kamilika kayenda ku nzi wa Abusalomu eswika embhuzwa eti, “Ini balanda babo bapisa nnda wangu kene?”

³²Abusalomu ka dabila Joabu eti, “Bona, ndakakudana nditi uzhe kundili kuti ndikutume kuna mambo kunombuzwa kuti, apa ini ndakadwa ku Geshuri kene? Kwakowobe kwakandilulwamila handakabe ndilizwigeligwe ikweno. Ndizo ngwenu ima ndiyende mbeli kwa mambo, hapa ndili nlandu, ngaandi bulaye.”

³³Ndizo Joabu kayenda kuna Mambo Dafite kanombudza tjalebgwa ndi Abusalomu. Mambo bakabe bedana Abusalomu, kazha ku bali kati eswika pabali kathigama kakotamisa nsholo mbeli kwabo, mambo bakan'amutjila nge kumputa.