Read Kalanga 2 Samuele 15 Bible Online

2 Samuele 15 - Kalanga bible

2 Samuele 15

¹Shule kwa ikoku Abusalomu kazwishakila koloyi ye ngwa ne mbizi ne balume bali makumi mashanu (50) banolabuka mbeli kukwe.

²Wakabe egala emuka kutji mangwanana enoma pawunde ye zila inoyenda ku nkoba we nzinkulu. Kwakabe kuti ha nthu ezha eshokozwiyisa mbeli kwa mambo kuwozwimimila, Abusalomu wakabe en'dana ebhuzwa eti, “Unodwa ku nzi upi kene?” Ha edabila eti, “Nlanda wenyu unodwa mu gumwe ludzi gwe Iziraela,”

³Abusalomu unowobe edwilila endwa eti, “Bona, ndebeleko iyo inohwika kakale yakatambunuka koga akuna nthu wakabigwa ndi mambo ungakuteedza.”

⁴Abusalomu unowobe endwa kakale eti, “Ha ndabe ndakabigwa nsumikilisi we shango ino, mmwe ne mmwe unobe eti ezha kundili nge ndebeleko ndinshingila ndulamo.”

⁵Kwakabe kuti ha nthu ezha kuwonthigamila, ebe embhata nge luboko gugwe emputa.

⁶Nditjo tjakabe tjithamwa ndi Abusalomu mu nthu mmwe ne mmwe we Iziraela wakabe ezha kuna mambo kuti athamigwe ndulamo, saikoko, katola mazwiwo wose e bathu be Iziraela.

⁷Shule kwe makole manna, Abusalomu kadwa mambo kati, “Ndokumbila yenda ku Heburoni kunoshingikadza kugadzabgwe kwandakathama ngotuna kuna Yahwe.

⁸Nlanda wenyu wakati atjigele ku Geshuri mu Aramu, atuna nditi, ‘Ha Yahwe bangandibgwiliza ku Jerusalema, ndowothigamila Yahwe ku Heburoni.’ ”

⁹Mambo bakandwa bakati, “Yendazo nge mbakiso.” Ndizo kabe emilika eyenda ku Heburoni.

¹⁰Koga Abusalomu katuma batumwa nge kwakasumbikala mu njudzi dzose dze Iziraela kabadwa kati, “Kuti koga muhwa kulila kwe lunyanga mumimile muti, ‘Abusalomu wabe mambo ku Heburoni!’ ”

¹¹Kwakabe kuna balume bali mazana mabili (200) bakabe bakokiwa ndi Abusalomu edwa nabo mu Jerusalema, bakayenda basingazibe tjimwe ngekwe gwanga gwakabe gwalukiwa.

¹²Ngono kukati Abusalomu atjapisa zwibhayilo, katuma nthu ku nzi we Gilo kunodana Ahithofele wakabe ali mmwe we bakumbuludzi ba Mambo Dafite. Ngono ndangano ikakula, ne batobeli ba Abusalomu bakadwilila ngowanda.

¹³Ntumwa kazha kuna Dafite kandwa kati, “Moyo ye Baiziraela yatjitendebukila kuna Abusalomu.”

¹⁴Ndizo Dafite kadwa batungamili babe bose baakabe anabo ku Jerusalema kati, “Milikani titizhe, atisatizha akuna sekwa tingazwitjidza muna Abusalomu! Libilidzani! Ungadwa etiwana tjinyolotjo, ebe etithamila kwakabipa, elobesa nzi wose nge thumo.”

¹⁵Ngono batungamili ba mambo bakandwa bakati, “Bonani, balanda benyu bakazwilulwamisila kuthama sekwa kumbula tetshi.”

¹⁶Ndizo mambo kamilika ne be nsha uwe ne hadzasha dzidze, kuzhe kwe bakadzi be balongwana bali gumi (10) bakasala bakatjengeta ng'umba ye bushe.

¹⁷Ngono mambo kabhuda akatungamila, bathu bose bakantobela, ngono bakati botjibhuda mu nzi, bakama kulingisana ne ng'umba ye bupelo.

¹⁸Balanda babe bose bakapinda panli, na bose Bakhereti, na bose Bapeleti, na bose Bagiti bali mazana ali kutathatu (600) bakantobela bedwa ku Gati na ibo bakapinda mbeli kwa mambo.

¹⁹Ipapo mambo kadwa Itai ntungamili we Bagiti kati, “Ini wayendabo naswi? Shanduka, usale na mambo ngobe iwe untaya, kakale untizhi wakatizha kanyi kwenyu.

²⁰Ndiko kwawakabe utjaswika madekwe, ngono apa ndikutole kakale uyendayende naswi, apa autobona kuti nami andithu aziba kwandinoyenda kene? Shanduka ne hama dzidzo, ngono ludo gwa Yahwe gusingazunguzike ne kugalikabgwe kwabo zwibe namwi.”

²¹Koga Itai kadabila eti, “Tetshi wangu, ndotuna ne zina la Yahwe banotjila, kumwe ne kumwe kwamunoyenda ndoyenda namwi, nenguba kungabe kuli kunoyisa ku lufu.”

²²Ngono Dafite Kadwa Itai kati, “Pinda, uyendezo!” Ndizo Itai we N'giti kapinda ne bathu babe bose ne batjetjana bose baakabe anabo.

²³Shango yose ikalila, bathu bekuila pezhugwi, pakabe batobeli ba Dafite beyenda. Mambo katjuluka nkuku we Kidironi ana bathu bose bakayendila ku tjilambanyika.

²⁴Ngono bonani, Zadoki ne Balevi bose bakabe banaye bakasenga Bhokisi le Tjidumano tje Ndzimu, bakalibiga pasi, kudzina bathu bose bebhuda mu nzi, Abiathari wakabe alipo.

²⁵Ndizo mambo kadwa Zadoki kati, “Bgwiliza Bhokisi le Tjidumano tje Ndzimu ku nzi. Ha Yahwe bangama nami, limwe zhuba banowondibuza azha ndilibona kose ne bugalo gwalo.

²⁶Koga ha bangati abana tjimwe nami, kowobe kwakalulwama, bangandithama sekwabanowobe babona kwakabalulwamila.”

²⁷Mambo bakadwa Zadoki we mpirisiti bakati, “Linga, apa unobona kene? Tola nkololo uwo Ahimaazi na Jonatani nkololo wa Abiathari mubgwilile ku nzi nge kunyalala.

²⁸Bona, ndowolinda ndili panotjulukiwa kugwizi mu tjilambanyika, kuswikila ndiwana dama le zibiso lidwa ku kuli.”

²⁹Ndizo Zadoki na Abiathari bakasenga Bhokisi le Tjidumano tje Ndzimu bakabgwilila ku Jerusalema, ngono bakanogalako.

³⁰Koga Dafite katatha nge matathilo e Dombo le Mitoba, eyenda elila, etshamba nge gumbo akafuka nsholo, ne bathu bose baakabe anabo bakafuka misholo, bakatathilabo pezhugwi bali shule kukwe beyenda belila.

³¹Kukati Dafite ebudziwa kuyi, “Ahithofele umu ndangano na Abusalomu.” Dafite kabe eti, “Imwi Yahwe shandulani gumbuludzo la Ahithofele libe bulengwe.”

³²Kukati Dafite eswika pezhugwi kwe dombo, pakabe Ndzimu unamatigwapo, nzwalani uwe unoyi Hushai we N'ariki unogalikabgwe kanshanganidza akapalula zwiambalo ne nsholo uwe uli zhele mavu.

³³Dafite kandwa kati, “Ha ungayenda nami, ungabe ntolo mundili.

³⁴Koga ha ungashandukila ku nzi, ube uswika udwa Abusalomu uti, ‘Ndowobe nlanda wenyu, imwi mambo, sekwandakabe ndili nlanda wa tate benyu ntolo, ndizo ngweno ndowobe nlanda wenyu, ndizo unonyanyaidza nkumbulo mmwe ne mmwe unowobe udusiwa ndi Ahithofele.

³⁵Bapirisiti bo Zadoki na Abiathari banowobe banawe, ubabudze tjimwe ne tjimwe tjaunowohwa mu ng'umba ya mambo.

³⁶Bona, bakololo babo babili banabo ikweno, Ahimaazi nkololo wa Zadoki na Jonatani nkololo wa Abiathari unowotuma ibo kuwondibudza tjimwe ne tjimwe tjaunowobe wahwa.’ ”

³⁷Ndizo Hushai nzwalani wa Dafite kangina mu nzi, nge tjibaka tjakabe Abusalomu engina mu Jerusalema.