Read Kalanga 2 Samuele 16 Bible Online

2 Samuele 16 - Kalanga bible

2 Samuele 16

¹Kukati Dafite adelukila tjapasi kusikungapani kudwa pezhugwi kwe dombo, kashangana na Ziba nlanda wa Mefibosheti ana madonki mabili akatilikwa sale, akabe akasenga zwiwunga zwili mazana mabili (200), mipawa ili zana (100) ne thewa dzakawanikiwa dzili zana (100) le mitjelo ye zhizha ne gukhwa le nkumbi we zhambi.

²Mambo Dafite kabhuzwa Ziba kati, “Ini wazhisa zwithu izwezwi?” Ziba kashandula eti, “Madonki nge anotathiwa ne be nsha wa mambo, tjiwunga ne mitjelo ye zhizha zojiwa nge bazhuzha, nkumbi we zhambi unong'wiwa nge banyala bopela meya mu tjilambanyika.”

³Ngono mambo kabhuzwa eti, “Mefibosheti mwana we mwana wa tetshi uwo Saulo ungayi?” Ziba kashandula eti, “Bonani, wasala ku Jerusalema, ngobe wazwidwa eti, ‘Nasi Baiziraela banondibgwilizila bushe gwa batategulu bangu Saulo.’ ”

⁴Ndizo mambo kadwa Ziba kati, “Bona, zose zwakabe zwili zwa Mefibosheti zwabe zwizo.” Ngono Ziba kashandula eti, “Ndozwiyisa pasi kwenyu, dzene mungama nami, tetshi wangu mambo.”

⁵Kwakati Mambo Dafite eswika ku Bhahurimu, kukazha gamu la Saulo linoyi Shimeyi nkololo wa Gera kanshanganidza nge kumpa bhiso.

⁶Shimeyi katangisa kuposa Dafite ne hadzasha dzidze nge mabgwe, nenguba Dafite akabe akakombeledziwa nge babhayani babe bose nenge balisi babe bakampoteleka mbizho dzose.

⁷Shimeyi wakabe elonga bhizo eti, “Bhuda! Bhuda! Mbulayi we bathu ndiwe, iwe nthu usi we tjimwe!

⁸Yahwe bakakubgwilizila lopa lawakatebula le nsha wa Saulo, iye wawakatolela bushe gugwe. Yahwe bapa nkololo uwo Abusalomu bushe, wabhakhwa mu bubi gugo, ngobe unthu wakatebula lopa.”

⁹Ndizo Abishayi nkololo wa Zeruya kadwa mambo kati, “Apa ini tjibgwa matuni itjetji tjingalonga bhiso tetshi wangu mambo kwakajali kene? Mundiletjedze ndibhude ndinonthubula nsholo.”

¹⁰Koga mambo kandwa kati, “Apa ndingashingani nge kwenyu bakololo ba Zeruya kene? Ha elonga bhiso ngobe Yahwe bandwa bakati, ‘Longa Dafite bhiso,’ ndiani ungadwapo eti, ‘Ini uthama uijali kene?’ ”

¹¹Ngono Dafite kadwa Abishayi ne hadzasha dzidze dzose kati, “Bonani, nkololo wangu unoshaka kundibulaya, apa kungatjenamisa tjini, akuthama Nbhenjamini uwoyu kene? Munletjedze, munletje alonge bhiso, ngobe Yahwe bandwa kuti ajalo.

¹²Pamwe swiyo Yahwe bangabona mbipo yandinothamigwa, ngono bakandilipa nge ndulamo mu bumo gwe kundilonga bhiso kukwe kwa nasi.”

¹³Ndizo Dafite ne bathu babe bakapinda nge zila, Shimeyi kayenda akasupha nge dombo ali ntha imwe akabhata ngolonga bhiso, ne kuposa Dafite nge mabgwe ne kun'dila mavu.

¹⁴Mambo ne bathu baakabe anabo bakanoswika ku gwizi gwe Jorodani banyala bafa, ngono bakanyatutuka ipapo.

¹⁵Ipapo Abusalomu ne Baiziraela bose baakabe anabo bakangina mu Jerusalema, na Ahithofele anabo.

¹⁶Ngono kukati Hushai we N'ariki, nzwalani wa Dafite eswika kuna Abusalomu kati, “Mutjile mukwegule mambo! Mutjile mukwegule mambo!”

¹⁷Ngono Abusalomu kabhuzwa Hushai kati, “Apa ikoku ndiko kugalikabgwe kuko mu nzwalani uwo kene? Ini usayenda ne nzwalani uwo?”

¹⁸Ngono Hushai kadabila Abusalomu eti, “Aa, wakashalugwa ndi Yahwe ne bathu ibaba, ne balume bose be Iziraela, ndiye wandili uwe, kakale ndowogala naye.

¹⁹Kakale ndingashingila ani? Apa andingashingile nkololo we wandakabe ndishingila? Sekwa ndakashingila tate benyu, ndizo ndowoshingila imwi.”

²⁰Ndizo Abusalomu kadwa Ahithofele kati, “Dusa nkumbulo uwo, tingathamani?”

²¹Ahithofele kadwa Abusalomu kati, “Kawalilane ne bakadzi ba tate babo, babakasiya bakatjengeta ng'umba, ndizo Baiziraela bose banowohwa kuti wazwigwisanya na tate babo, ndiko kunowoti bose baunabo bakasima.”

²²Ndizo bakabakila Abusalomu nshasha pezhugwi kwe ng'umba, ngono Abusalomu kawalilana ne bakadzi ba tate babe Baiziraela bose bakalinga.

²³Mu mazhuba iyawo gumbuludzo lakadwa muna Ahithofele likabe ingati nthu wadwiwa nge Ndzimu, ngono Dafite na Abusalomu bakabe betolela pezhugwi gumbuludzo la Ahithofele.