Read Kalanga 2 Samuele 17 Bible Online

2 Samuele 17 - Kalanga bible

2 Samuele 17

¹Pezhugwi kwa ipapo Ahithofele kadwa Abusalomu kati, “Ndokumbila shalula balume bali zwiwulu zwili gumi lina babili (12 000), ndikomilika busiku ndinotatana na Dafite.

²Ndowon'wana atjakanyala kakale akapuna moyo, ndowontjisa ne bathu bose baanabo banowotizha. Ndowobulaya mambo koga,

³ndowobgwiliza bathu ku kuli. Mushaka bulaya nthu ng'ompela kowobe kudwa shanduka kwe bathu bose, ndizo bathu bose banowogala ne mbakiso.”

⁴Gumbuludzo ileli likashathisa Abusalomu ne batungamili bose be Iziraela.

⁵Koga Abusalomu kabe eti, “Dana Hushai we N'ariki, tihwebo munli tjaanowoleba.”

⁶Ngono kukati Hushai azha, Abusalomu kandwa kati, “Etji nditjo tjalebgwa ndi Ahithofele, apa tithame sekwa akumbuludza kene? Ha kusakajalo utibudze kuti tithameni.”

⁷Ipapo Hushai kadabila Abusalomu eti, “Ngwenu gumbuludzo lamapiwa ndi Ahithofele alizolulwama.”

⁸Hushai kadwilila eti, “Moziba kuti tate benyu ne babhayani babo bagwi bakasima ne kuti bakalinda banonga bhira hadzi yatolegwa bana mu shango. Pezhugwi kwa ikoku, tate benyu mbhayani unoziba ngwa, abangalale bali pakati kwe babhayani busiku.

⁹Ndomubudza, na ngwenu wali bakabgwata mu limwe le makomba, pamwe bali pamwe pathu. Ngono ha bamwe bathu bangabatanga, unowohwa ngekwako unoti, ‘Kwabe ne lufu mu batobeli ba Abusalomu.’

¹⁰Ipapo nenguba kuna nlume una tjilopa, una moyo unonga we shumba, unopelegwa nge simba, ngobe Iziraela yose inoziba kuti tate benyu mbhayani wakasima, kakale na ibabo banabo babhayani bana tjilopa.

¹¹Koga gumbuludzo langu nge linoti, Baiziraela bose bakubunganile pa muli, kudwa ku Dani kunoti ku Bheerisheba, bali bunji gunonga nsetje we gungwa, mube muyenda ku ngwa nge kwenyu.

¹²Ndizo towonowana Dafite paanowobe alipo, ngono towonobawila se khawa idwa pezhugwi, tibe timbulaya kose ne bathu babe kusina ne ng'ompela unowosala.

¹³Ha atizhila mu mmwe nzi, ipapo Baiziraela banowozha nge mitjili ku nzi iwoyo, tibe tiukwebela mu nkuku, kudzina kusala kusina nenguba lili bgwana lingawanika pawabe ulipo.”

¹⁴Ngono Abusalomu ne bathu bose be Iziraela bakabe beti, “Gumbuludzo la Hushai we N'ariki loyita pa gumbuludzo la Ahithofele.” Yahwe bakumbuludza kuti gumbuludzo la Ahithofele lakalulwama lisitongo tobegwa, kuti ndizo Yahwe bazhise mbipo muna Abusalomu.

¹⁵Ndizo Hushai kadwa bapirisiti Zadoki na Abiathari kati, “Ahithofele wakakumbuludza Abusalomu ne batungamili be Iziraela sahwoku, ngono oku ndiko imi sekwa ndakakumbuludza.

¹⁶Ndizo ngwenu tumilani thumwa kuna Dafite tjinyolotjo kuti banon'dwa bati, ‘Mu busiku gwa nasi musitongo lala panotjulukwa gwizi mu tjilambanyika, koga mugwise nge zila dzose mutjulukile seli, kusajalo mambo ne bathu bose baanabo bawolobesiwa.’ ”

¹⁷Ipapo Jonatani na Ahimaazi bakabe bakalinda bali pa nsenya we Enerogele, nlandakadzi wakabe egala ezha ewobabudza tjinoshingikala, ibo bekoyenda benobudza Mambo Dafite, ngobe ibo bakabe basakafanila bong'wa bengina mu nzi.

¹⁸Koga kukashingikala kuti mbisana ababone, ebe enobudza Abusalomu, ndizo bubili gwabo bakatizha tjinyolotjo bakanobgwata ku ng'umba ye mmwe nlume ku Bhahurimu, wakabe ana tshima mukati kwe nzi uwe ngono bakangina mulili.

¹⁹Nkadzi we ng'umba iyeyo katola thobo kaiwala pa nlomo we tshima, kadzwala mathunde pezhugwi kwayo, kuti kusibe ne ungaziba tjikusi kwayo.

²⁰Kukati babhayani ba Abusalomu bezha ku nkadzi bakambhuzwa bakati, “Bangayi bo Ahimaazi na Jonatani?” Nkadzi kabashandula eti, “Batjulukila seli kwe lukobana.” Babhayani bakabashaka ngono bakasi bawane, bakabe bebgwilila ku Jerusalema.

²¹Kukati babhayani basinoyenda, Ahimaazi na Jonatani bakabhuda mu tshima bakabikila Dafite beti, “Milika tjinyolotjo utjuluke nkuku. Ngobe Ahithofele wakumbuludza nge kwenyu sahwoku na woku.”

²²Ipapo Dafite kamilika ne bathu bose baakabe anabo bakatjulukila seli kwe Jorodani, kukati zhuba libhuda kukabe kusitjina ne nng'ompela wabo wakabe asathu katjulukila seli kwe Jorodani.

²³Kukati Ahithofele ebona kuti gumbuludzo lile alizoshingikadziwa, kabelesa donki iye, ngono kayenda kanyi kwabo ku nzi nkulu wakanyi kukwe. Kati asina kululwamisa zwe nsha uwe, kazwisungilila kafa, ngono kabiganyigwa mu ikumbu tja tate babe.

²⁴Ipapo Dafite kayenda ku Mahanayimi nge tjibaka tjakabe Abusalomu ne Baiziraela betjuluka Jorodani.

²⁵Ipapo Abusalomu wakabe atjibiga Amasa kutungamila ngwa mu bumo gwa Joabu. Amasa wakabe ali nkololo we nlume wakabe edang'wa Ithera we N'iziraela, wakabe akalobola Abigaile nkololokadzi wa Nahashi, hazwadzi ya Zeruya, mme ba Joabu.

²⁶Baiziraela na Abusalomu bakakotokela mu shango ye Giliyadi.

²⁷Kukati Dafite eswika ku Mahanayimi kashanganidziwa ndibo Shobi nkololo wa Nahashi edwa ku Rabha we Baamoni na Makiri nkololo wa Amiele edwa ku Lodeba na Bharizilai we N'giliyadi edwa ku Rogelimu.

²⁸Bakazha bakasenga malawo ne ndilo ne zwija zwe ntapkhwi ne mathunde e korong ne mathunde e bhali ne bgwisa ne mathunde akakangiwa ne nyemba ne lishumbe.

²⁹Nenge butji gwe nyutji ne nkaka wakabidwa ne pkhwizi ne tjatjile, bezwizhila Dafite ne baakabe anabo kuti baje. Ngobe bakabe beziba kuti Dafite ne babhayani babe bakanyala kakale bana zhala ne nyota mu tjilambanyika.