Read Kalanga 2 Samuele 18 Bible Online

2 Samuele 18 - Kalanga bible

2 Samuele 18

¹Mambo Dafite kakubunganya babhayani baakabe anabo, kabashalulila balauli be bali zwiwulu (1 000) ne balauli be bali mazana (100).

²Ngono Dafite kadusa babhayani kabatuma ku ngwa bali makupo matatu. Gupo limwe lakatungamigwa ndi Joabu, limwe lakatungamigwa ndi Abishayi nkololo wa Zeruya, nnung'una wa Joabu, ngono limwe lakatungamigwa ndi Itai we N'giti. Ngono mambo kadwa babhayani kati, “Namibo ndowoyendabo namwi.”

³Koga babhayani bakan'dabila beti, “Imwi musiyende naswi ku ngwa. Ngobe iswi atingatizha, abangabe ne hanya naswi. Ha gwamu limwe ledu lingafa, abangabe ne hanya naswi. Ngobe imwi muli moga molizana naswi tili zwiwulu zwili gumi (10 000), kungayita ha mungatuma iswi, imwi mukasala mutitumila bhatsho muli ipapa mu nzi.”

⁴Mambo kabadwa kati, “Ndowothama sekwa munowobe mubona kwakalulwama.” Ndizo mambo kama pa wunde ne nkoba, babhayani bose bakalongoloka bebhuda nge makupo e mazana ne e zwiwulu.

⁵Ngono mambo kapa ndaulo Joabu na Abishayi na Itai eti, “Mu bumo gwangu musitongo hwisa zogwadza nzhuzha Abusalomu.” Ngono babhayani bose bakahwa mambo pabakabe bepa balauli be ngwa ndaulo ngekwa Abusalomu.

⁶Ndizo babhayani bakayenda ku shango kunobhayana ne Baiziraela, ngwa yakagwigwa mu ishaka tje Ifureimi.

⁷Baiziraela bakakundiwa nge babhayani ba Dafite, mu zhuba ilelo kwakabulawa balume bali zwiwulu zwili makumi mabili (20 000) mu ngwa iyeyo.

⁸Ngwa yakaandama nge shango yose, bathu bakabulawa nge mbatsha dze ishaka bakabe banji kupinda bakabulawa nge thumo.

⁹Ngono Abusalomu kazwiwana ashangana ne babhayani ba Dafite. Wakabe akatatha moulo iye, ngono ikangina kusi kwe nti nkulu unoyi n'oko, thabi dze nti iwoyo dzikabhata Abusalomu nge nsholo. Moulo ikatizha ikasiya Abusalomu akalembeleka mu nti makumbo ali mu phepo.

¹⁰Mmwe nlume kambona ngono kabikila Joabu eti, “Ndabona Abusalomu akalembeleka mu n'oko.”

¹¹Ngono Joabu kanshandula nlume wambudza eti, “Ha wambona ini usankhukhutha kadwa awila pasi akafa. Ndabe ndingashatha kwandabe ndingakupa maloso ali gumi e siliva ne mwandabula we babhayani.”

¹²Koga nlume kashandula Joabu eti, “Nenguba ndabe ndiyemula kuzwibona ndakabhata maloso e siliva ali tjiwulu (1 000), ndabe ndisingake alonga nkololo wa mambo luboko, ngobe kwakalebgwa tizwihwigwa mambo emupa ndaulo imwi na Abishayi na Itai eti, ‘Mu bumo gwangu musitongo hwisa zogwadza nzhuzha Abusalomu.’

¹³Koga, nenguba ndabe ndathama bupitipiti ambulaya, akuna tjabe tjingasumbikalila mambo, nawebo wabe usingondimila.”

¹⁴Joabu kabe eti, “Andingatjatjinye tjibaka nge kuko.” Ngono kabe etola mathumo matatu nge luboko gugwe, ebe enobhaya Abusalomu ndiwo mu moyo atjimpenyu pezhugwi kwe n'oko.

¹⁵Bazhuzha bali gumi, basengi be zwibhayano zwa Joabu, bakabe bekomba Abusalomu benloba, bebe bembulaya.

¹⁶Ndizo Joabu kalidza lunyanga, babhayani bakashanduka mu kutatana ne Baiziraela, ngobe Joabu wakabe abadziba.

¹⁷Bakatola itumbu tja Abusalomu bakatjilashila mu gomba lakangina mu ishaka, bakakubunganyila mabgwe pezhugwi kukwe likabe duthu lisishoma le mabgwe. Baiziraela bose bakatizha mmwe ne mmwe kuyenda ku nzi uwe.

¹⁸Mu bupenyu gwa Abusalomu wakabe azwibakila bgwe lakashongoloka mu Nkuku wa Mambo, ngobe wakabe asina nkololo ungati afa kamusa zina lile. Ndizo katumila bgwe ilelo zina lile, ngono lodang'wa Bgwe la Abusalomu na nasi.

¹⁹Ipapo Ahimaazi nkololo wa Zadoki kadwa Joabu kati, “Tjima ndilabuke ndiyise thawu kuna mambo kubabudza kuti Yahwe ba baangula mu simba le zwita zwabo.”

²⁰Ngono Joabu kandwa kati, “Aunganoyisa thawu nasi, unganodziyisa limwe zhuba, koga nasi aungayise thawu, ngobe nkololo wa mambo wafa.”

²¹Ndizo Joabu kadwa Nkhushi kati, “Yenda, unobudza mambo tjawabona.” Nkhushi kakotamisa nsholo mbeli kwa Joabu, ngono kabhuda akalabuka.

²²Ndizo Ahimaazi nkololo wa Zadoki kadwa Joabu kati, “Nenguba kungabeni, mundiletje ndilabuke ndili shule kwe Nkhushi uwoje.” Ngono Joabu kandwa kati, “Apa ini tjaunowobe utjilabukila nkololo wangu? Ndakalinga kuti auna mbhayilo waunowowana ngekwe thawu idzedzi.”

²³Ahimaazi kapapha kadwa Joabu kati, “Nenguba kungabeni, ndowolabuka.” Joabu kandwa kati, “Labuka.” Ndizo Ahimaazi kalabuka nge zila ye libala kanopindila Nkhushi.

²⁴Ipapo Dafite wakabe aligele pakati kwe mikoba mibili ye nzi. Nlume we nlindi katathila pezhugwi kwe zhalilo le nzi nge guma, kati emilidza mesho elinga kabona nlume ezha akalabuka ali ega.

²⁵Nlume we nlindi kamimila kabudza mambo, ngono mambo kadabila eti, “Apa ezha ali ega kodwa kuti wakasenga thawu dzinozipa.” Ngono kazha tjinyolotjo kasedzela pejo.

²⁶Nlume we nlindi kabona mmwe nlume kakale ezha akalabuka, ngono kadana ntjengeti we nkoba eti, “Bonani, mmwe nlume unozha akalabuka ali ega!” Mambo kashandula eti, “Na iyebo wakasenga thawu dzinozipa.”

²⁷Nlume we nlindi kabe eti, “Ndobona thambo dze we kutanga dzinga dza Ahimaazi nkololo wa Zadoki.” Mambo kashandula eti, “Nlume wakalulwama, unozha nge matama mabuya.”

²⁸Ndizo Ahimaazi kamilidza hwi kati kuna mambo, “Kose kwakalulwama.” Kawapasi nge zwidwi mbeli kwa mambo kandwa kati, “Ngakukudziwe Yahwe Ndzimu wenyu, wakunda balume bakabe bakamilidzila luboko gwabo tetshi wangu mambo.”

²⁹Ngono mambo kabhuzwa kati, “Apa nzhuzha Abusalomu unomuka kene?” Ahimaazi kadabila eti, “Kwati Joabu etuma nlanda wa mambo, imi nlanda wenyu, ndakabona bhonyongo gulu kwazo, koga asizibe kuti kwakabe kulini.”

³⁰Ngono mambo kandwa kati, “Tongo tsheduka, ume ipapo.” Ndizo katendebuka kama.

³¹Ngono bonani, Nkhushi kaswika, ngono kadwa mambo kati, “Ndamuzhila thawu dzakanaka kwazo tetshi wangu mambo! Ngobe Yahwe bamuangula nasi mu simba la bose bapanduki benyu.”

³²Mambo kabhuzwa Nkhushi kati, “Apa nzhuzha Abusalomu unomuka kene?” Ngono Nkhushi kadabila eti, “Dzene tshene tjanshingikalila tjingashingikalila zwita zwenyu zose, tetshi wangu, na bose banomupandukila.”

³³Mambo kadzipiwa nge shungu, katathila pezhugwi ku ng'umba yakabakigwa pezhugwi kwe nkoba, kayenda elila elebeleka eti, “Eke nkololo wangu Abusalomu, nkololo wangu, nkololo wangu Abusalomu! Akwabe kwafa imi mu bumo gugo, eke Abusalomu, nkololo wangu, nkololo wangu!”