Read Kalanga 2 Samuele 19 Bible Online

2 Samuele 19 - Kalanga bible

2 Samuele 19

¹Kukabudziwa Joabu kuyi, “Bona Mambo Dafite unolila umu buyendasi ngekwa Abusalomu.”

²Ngono kukunda kukashanduligwa mu tjililo tje babhayani bose, ngobe babhayani bahwa zhuba ilelo kuti mambo umu buyendasi ngekwe nkololo uwe.

³Ngono babhayani bakangina mu nzi balinyelele zhuba ilelo, se babhayani banongina benyanga bakabhakhwa nge shoni batizha ku ngwa.

⁴Mambo Dafite kazwizwimba buso kalila nge hwi lipezhugwi eti, “Eke nkololo wangu Abusalomu, eke Abusalomu nkololo wangu, nkololo wangu!”

⁵Ndizo Joabu kazha kangina mu ng'umba ya mambo kandwa kati, “Nasi wabhatisa shoni babhayani babo, bati nasi bakatjidza butjilo gugo, ne butjilo gwe bakololo babo ne bakololokadzi babo ne gwe bakadzi babo ne balongwana babo.

⁶Ngobe unoda ibabo banokubenga, ubenga banokuda, nasi wakupundumadza kuti balauli be babhayani ne babhayani abate bali tjimwe mukuli, ngobe kondilakidza nasi kuti akwabe Abusalomu etjila iswi tose tafa, nasi unobe wakashatha.

⁷Ngono ngwenu ndokudwa, bhudila kuzhe unosimisa babhayani babo, ndolebesa ndotuna nge zina la Yahwe, ha usabhuda ukanolebeleka nabo, busiku gwa nasi gowoti gunoyedza, ukabe usitjina ne nng'ompela unowobe atjimile nawe, ngono kowokubipila kupinda mbipo dzose dzakatongo kuwila kudwa mu butjetjana gugo kowoti nasi.”

⁸Ndizo mambo kamilika, kanogala ku bugalo gugwe ku nkoba. Ngono bathu bose bakabudziwa kuyi, “Bonani, mambo ugele ku nkoba.” Bathu bose bakakubunganila panli. Ipapo Baiziraela bakabe batizha mmwe ne mmwe ayenda ku nzi uwe.

⁹Ngono bathu bose bakabe bokangazhana mu njudzi dzose dze Iziraela, beti, “Mambo wakatiangula kudwa mu zwita zwedu, kakale katitjidza mu luboko gwe Bafilisitiya, ngono ngwenu watjitizha mu shango etizha Abusalomu.

¹⁰Takabe tazhodza Abusalomu kube mambo wedu, ngono watjifila mu ngwa. Ngono ngwenu, apa ini tisingalebesane tikanobuza Mambo Dafite?”

¹¹Ngono Mambo Dafite kayisa thumwa ku bapirisiti Zadoki na Abiathari eti, “Idwani Sholotjena dze Juda muti, ‘Apa ini mungabe be bupelo kubgwiliza mambo ku ng'umba iye ye bushe, ipapa ndebo ye Baiziraela bose ye kundibuzila ku ng'umba yangu yakaswika mu zebe dzangu.

¹²Imwi mube nsha wa tate bangu, tilopa ling'ompela, ngono ini mungabe be bupelo kubgwiliza mambo kene?’

¹³Kakale mudwe Amasa muti, ‘Apa atiteli be lopa ling'ompela imi nawe kene? Ndzimu ngaundilobe shamu kudzina ndifa ausabe nlauli we babhayani bangu mu bumo gwa Joabu.’ ”

¹⁴Matama a Dafite akabhaya moyo ye bathu bose be Juda bakabumbana bakabe ne moyo nng'ompela, ndizo bakayisa dama kunli beti, “Buyani mose, imwi mambo ne hadzasha dzenyu.”

¹⁵Ndizo mambo bakazha ku Jorodani, Bajuda bakazha mu Giligala kushanganidza mambo ne kuntjuludza gwizi gwe Jorodani.

¹⁶Ngono Shimeyi nkololo wa Gera we Nbhenjamini we ntuthu we Bhahurimu kalibilidza kuzha ku Bajuda kuwoshanganidza Mambo Dafite.

¹⁷Wakabe ana balume banodwa ku Bhenjamini bali tjiwulu (1 000) na Ziba nlanda we ng'umba ya Saulo ne bakololo babe bali gumi lina bashanu (15) ne balanda babe bali makumi mabili (20) ngono bakanoswika ku Jorodani kutangila mambo.

¹⁸Bakatjuluka gwizi pagunotjulukwa kunotjuludza be nsha wa mambo ne kuthama zose zwinganshathisa. Ngono Shimeyi nkololo wa Gera kathigama mbeli kwa mambo abe pejo ngotjuluka Jorodani,

¹⁹kadwa mambo kati, “Atshene mukasindibalile milandu She wangu, kene kuli kukumbula nlanda wenyu sekwa akatjinya tetshi wangu, mu zhuba lamakabhuda mu Jerusalema, dzene mambo bangakudusa mu moyo.

²⁰Ngobe imi nlanda wenyu ndoziba kuti ndakatjinya, ngono ngwenu, bonani, ndazha nasi, ndili we kutanga we ng'umba ya Josefa, ndazha kuwoshanganidza tetshi wangu mambo.”

²¹Abishayi nkololo wa Zeruya kabe eti, “Apa Shimeyi aangabulawe ngekwa ikoku kene, ngobe akalonga bhiso mu Nzhodziwa wa Yahwe kene?”

²²Koga Dafite kabe eti, “Apa ndoshingani ndimwi, bakololo ba Zeruya, kwa mungati nasi mukabe muli banyanyayidzi bangu? Apa kuna ungati nasi kabulawa mu Iziraela kene? Apa anditozwiziba ndili mambo nasi mu Iziraela kene?”

²³Mambo kati kuna Shimeyi, “Ndotuna tjose, aungabulawe?”

²⁴Ipapo Mefibosheti mwana we mwana wa Saulo kazha kuwoshanganidza mambo, kuli kwetjinga kwaakagala asingangule makumbo, asingathubule ndedu, kene kuli kusuka zwiambalo zwizwe, kudwa mu zhuba mambo labakabhuda kudzina bebuya bali mpumbulu.

²⁵Kwakati Mefibosheti eswika edwa ku Jerusalema kuwoshanganidza mambo, mambo kambhuzwa kati, “Apa ini usakayenda nami Mefibosheti?”

²⁶Kadabila eti, “Tetshi wangu, mambo wangu, nlanda wangu wakanditjebela, ngobe ndakandwa ati, ‘Undibelesele donki, kuti ndiitathe ndiyende na mambo, ngobe nlanda wenyu tjilema.’

²⁷Wakandinyepela kumuli tetshi wangu, mambo, koga tetshi wangu mambo, monga ntumwa we Ndzimu, ndizo thamani sekwa mungabona kwakamululwamila.

²⁸Ngobe be nsha wa tate bangu bakabe bakalingisana ngobulawa ndimwi tetshi wangu, mambo, koga madumila nlanda wenyu kube mmwe we banoja pa tafuli yenyu. Ndowobe nditjashaka bubuya gungapani, gwandingakumbila muna mambo kene?”

²⁹Mambo bakandwa bakati, “Apa ini utjaleba ngekwe zwithu zwizo? Ndapedza nkumbulo kuti iwe na Ziba mowokobana minda.”

³⁰Mefibosheti kadwa mambo kati, “Ngaaitole yose, se tetshi wangu mambo bazha kanyi basakakubala.”

³¹Bharizilai we N'giliyadi kaswikabo edwa ku Rogelimu kowopeleka mambo kuntjuludza Jorodani.

³²Bharizilai wakabe abe nthu nkulukulu ana makole ali makumi ali zhanakadzi (80) wakabe epa mambo zojiwa paakabe atjagala ku Mahanayimi, ngobe akabe ali nthu wakafuma.

³³Mambo kandwa kati, “Atiyende tose ku Jerusalema, ndowokutjengeta.”

³⁴Koga Bharizilai kadabila mambo eti, “Apa nditjina butjilo bulefu, kwandingayenda namwi mambo ku Jerusalema kene?

³⁵Ndabe ne makole ali makumi ali zhanakadzi (80), apa ndingatjathubukanya tjibuya ne tjisi tjibuya kene? Apa nlanda wenyu aatjaziba zipa kwe tjinojiwa ne tjinong'wiwa kene? Apa ndingatjahwilila mba kwe balume ne bakadzi kene? Ini ndingapaphila tetshi wangu mambo ntolo?

³⁶Nlanda wenyu unowotjulukila seli ye gwizi gwe Jorodani na mambo, ini mambo bangandipa mbuzilo yakajali kene?

³⁷Ndizo mundiletje ndishandukile kanyi kwedu kuti ndinofilako, kuti ndibiganyiwe pejo ne palele mme na tate bangu. Ngono nlanda wenyu woyu Khimuhamu, yendani naye anomushingila, tetshi wangu mambo, munthamile sekwa munowobe muyemula ndiko.”

³⁸Ngono mambo kadabila eti, “Khimuhamu unoyenda nami, ngono ndowonthamila sekwa wayemula ne tjaunowobe uyemula mundili ndowonthamila itjo.”

³⁹Ndizo babhayani bose bakatjuluka Jorodani na mambo bakatjulukabo, mambo bakaputa Bharizilai bakankombolela, kabe eshandukila ku nzi uwe.

⁴⁰Mambo katjulukila ku Giligala na Khimuhamu kayenda naye, babhayani bose be Juda bakatjuludza mambo, bakabe bana gwamu le babhayani be Iziraela.

⁴¹Shule kwa ipapo Baiziraela bose bakazha kuna mambo bakambuzwa beti, “Ini hama dzedu dze Juda dzamutola tisingazibe, dzitola mambo ne be nsha uwe dzibatjuludza Jorodani, ne babhayani bose ba Dafite kene?”

⁴²Babhayani bose be Juda bakashandula be Baiziraela beti, “Takakuthama ngobe mambo bali be nsha wedu. Ngono ini mungagwadzika ngekwako? Apa takatongoja nge tjinyikilo dza mambo kene? Kene mambo kuna tjimwe tjipo tjabakatipa?”

⁴³Baiziraela bakashandula Bajuta beti, “Iswi tina gobe kagumi muna mambo, kakale kuzhe kwa ikoku, muna Dafite tomukulila. Ngono ngwenu ini mutilingila pasi? Apa ate iswi takatanga ngoleba ngekwe kubuza mambo wedu kene?” Koga Bajuda bakashandula bali bushongola kupinda Baiziraela.