Read Kalanga 2 Samuele 2 Bible Online

2 Samuele 2 - Kalanga bible

2 Samuele 2

¹Shule kwa ikoku Dafite wakabhuzwa Yahwe eti, “Apa ndiyende ku mmwe we mizi mikulu ye Juda kene?” Yahwe bakan'dabila beti, “Yenda.” Dafite kabhuzwa eti, “Ndiyende kuna upi nzi?” Yahwe bakabe beti, “Ku Heburoni.”

²Ndizo Dafite katathilako, kayenda ne bakadzi babe babili, Ahinoami we N'jezerele na Abigaile tjilikadzi ya Nabali we N'karimeli.

³Dafite wakazha ne balume baakabe anabo, mmwe ne mmwe ne nsha uwe, ngono bakagala mu mizi ye Heburoni.

⁴Ndizo balume be Juda bakazha, ngono bakazhodza Dafite kube mambo we ludzi gwa Juda. Bakati bebudza Dafite beti, “Balume be Jabeshi Giliyadi ndibo bakabiganya Saulo.”

⁵Dafite katuma batumwa ku balume be Jabeshi Giliyadi, kuti babadwe bati, “Yahwe ngaba mukombolele ngobe makalakidza buthu igogu muna Saulo tetshi wenyu nge kumbiganya!

⁶Ngono ngwenu Yahwe ngababe ne lubu kumuli ne malebeswa, ngono namibo ndowomuthamila bubuya ngobe mathama kuthu ikoku.

⁷Ngono ngwenu simani mube ne tjilopa, ngobe Saulo tetshi wenyu wafa, ngono nsha wa Juda wandizhodza kube mambo wabo.”

⁸Koga Abineri nkololo wa Neri nlauli we babhayani ba Saulo wakatola Ishibhosheti nkololo wa Saulo, kanzhisa ku Mahanayimi.

⁹Kambiga mambo we Giliyadi ne Baashuri ne Jezirele ne Ifureimi ne Bhenjamini newe Iziraela yose.

¹⁰Ishibhosheti, nkololo wa Saulo, wakabe ana makole ali makumi manna (40) ha etangisa kubusa Iziraela, ngono wakabusa makole mabili. Koga be ludzi gwa Juda guka tobela Dafite.

¹¹Tjibaka tjakatogwa ndi Dafite ali mambo mu Heburoni ebusa ludzi gwa Juda makole ali kutendeka ana mimwedzi ili mitathatu.

¹²Abineri nkololo wa Neri ne balanda ba Ishibhosheti nkololo wa Saulo, bakabhuda mu Mahanayimi beyenda ku Gibiyoni.

¹³Joabu nkololo wa Zeruya ne balanda ba Dafite, bakabhuda bakanobashangamidza ku dziba la Gibiyoni. Goko limwe lakagala ku ndzibo mmwe we dziba, limwe likagala ku ndzibo mmwe we dziba.

¹⁴Abineri kati kuna Joabu, “Bazhuzha ngabamilike bagwisane mbeli kwedu.” Joabu kabe eti, “Kwakalulwama, ngabamilike.”

¹⁵Ndizo bakamilika bakapinda bebagwa, bali gumi lina babili (12) ba Bhenjamini kuna Ishibhosheti nkololo wa Saulo, ne balanda ba Dafite bali gumi lina babili (12).

¹⁶Mmwe ne mmwe wakabe ezhwabula wakalingisana naye nge mavudzi ebe embhaya nge thumo mu mbadu, ndizo bakawila pasi bakafa bose. Pathu ipapo mu Gibiyoni pakabe kodang'wa Helikatihazurimu.

¹⁷Mu zhuba ilelo kwakabe ngwa inotjisa kwazo, Abineri ne Baiziraela bakakundiwa nge balanda ba Dafite.

¹⁸Bakololo ba Zeruya nge butatu bakabe bali ipapo, ili Joabu na Abishayi na Asahele. Asahele wakabe elabuka se phala,

¹⁹katatana na Abineri akansendama Abineri kusina kwaangadzetelako.

²⁰Abineri katjebuka shule, kandwa kati, “Apa ndiwe Asahele kene?” Kadabila kati, “Ee, ndimi.”

²¹Abineri kandwa kati, “Tendebukila ku luji kene ku lumeshwe, utatane ne mmwe we babhayani untolele tjaanowobe anatjo.” Koga Asahele kabe asingashake misa kutatana naye.

²²Abineri kazwibgwilulula kakale kati, “Shanduka udwe shule kwangu, ini ushakakuti ndikubulaye? Ndowo lingana ne nkulu uwo Joabu tjini kene?”

²³Koga kalamba shanduka, ndizo Abineri kambhaya ne bhato le thumo lile mu ntumbu, thumo libe linothuka ku shule, ebe ewa efila ipapo. Koga bose bakati beswika pakabe Asahele afilapo, bakama koga kukasibe ne unozunguzika.

²⁴Koga Joabu na Abishayi bakatatana na Abineri, kukati zhuba lingina bakaswika pa duthu la Amma lakalingisana ne Giya pa zila inoyenda ku tjilambanyika tje Gibiyoni.

²⁵Bathu be Bhenjamini bakazwibumba shule kwa Abineri, bakabe tjithu tjing'ompela, bakama zubuyanana pezhugwi kwe duthu.

²⁶Ndizo Abineri kakambidza Joabu kati, “Apa thumo lowolilila tjose kene? Apa autoziba kuti ku bupelo kowogwadza kene? Kowodza kukabe lini usathu ukamisa bathu babo kutatana ne hama dzabo kene?”

²⁷Joabu kadabila kati, “Ndotuna nge Ndzimu unotjila, ha wabe usalebeleka bathu bangu babe bowotatana namwi kuswikila mangwanana.”

²⁸Ndizo Joabu kalidza lunyanga ngono babhayani bose bakama pabakabe balipo, bakasitjatatamile Baiziraela kene kuli kugwa nabo.

²⁹Abineri ne bathu babe bakalalila beyenda busiku gose bakapalama nkuku we Jorodani, bakanotjuluka gwizi gwe Jorodani, bakayenda kakale mangwanana wose bakanoswika ku Mahanayimi.

³⁰Joabu kashanduka mukutatana na Abineri, kakubunganya bathu bose, ngono kawana balanda ba Dafite bali gumi lina zhanalume (19) basipo, kuzhe kwa Asahele.

³¹Koga balanda ba Dafite bakabe babulaya balume be ludzi gwa Bhenjamini bali mazana matatu ana makumi ali kutathatu (360) bakabe bana Abineri.

³²Joabu ne bathu babe bakatola itumbu tja Asahele bakambiganya kwakabe kwabiganyiwa tate babe mu Bhetelehema. Ndizo bakalala beyenda busiku gose, kukati kuyedza bakabe beswika ku Heburoni.