Read Kalanga 2 Samuele 20 Bible Online

2 Samuele 20 - Kalanga bible

2 Samuele 20

¹Ipapo kukabe ne mmwe nthu usi we tjimwe we zina linoyi Sheba, nkololo wa Bikiri we Nbhenjamini, kalidza lunyanga ebe eti, “Atina gobe muna Dafite, naiko atina lukata mu nkololo wa Jesi, imwi, Baiziraela, mmwe ne mmwe ngaayende ku nzi uwe.”

²Ndizo bathu bose be Iziraela bakashandukila Dafite, bakatobela Sheba nkololo wa Bikiri, koga Bajuda bakatobela Dafite nge kugalikabgwe kudwa ku Jorodani kunoti ku Jerusalema.

³Ngono Dafite kati eswika ku ng'umba iye ye bushe ku Jerusalema, katola bakadzi babe be bakadzi batukunu baakabe asiya bakalinda ng'umba kababiga mu imwe ng'umba bakalindiwa, ebajisa ngono asingawalilane nabo. Bakazhaliligwa butjilo gwabo gose, baligele se tjilikadzi.

⁴Ndizo mambo kadwa Amasa kati, “Undidanile babhayani bose be Juda bazhe kundili nngwani, nawe ubepobo.”

⁵Amasa kanodana babhayani be Juda, koga kanonoka kasiswike mu zhuba lakabe labigwa ndi mambo.

⁶Dafite kabe edwa Abishayi eti, “Sheba nkololo wa Bikiri unowotithamila mbipo inopinda yatakathamigwa ndi Abusalomu, tola balanda ba tetshi uwo untatamile, ungadwa engina mu mizi yakabakiligwa nge luswingo, ngono tikasitjankunde.”

⁷Ndizo babhayani ba Joabu ne Bakhereti ne Bapeleti ne babhayani bose bakasima bakabhuda mu Jerusalema bakatatamila Sheba nkololo wa Bikiri bakatungamigwa ndi Abishayi.

⁸Bakati beswika pa shongwe wulu imu Gibiyoni, Amasa kabashanganidza. Ipapo Joabu wakabe akaambala tjiambalo tje ngwa, mu thunji dzidze ana mwandabula wakasungigwa ikhata tjina bukanu muili, kati eyendila mbeli gukawila pasi.

⁹Ngono Joabu kadwa Amasa kati, “Unomukazo nkololo wa tate?” Joabu kabhata Amasa nge ndedu nge luboko gwe luji kumputa.

¹⁰Koga Amasa kasibe nge njele ngekwe bukanu gwakabe guli mu luboko gwa Joabu, ndizo Joabu kambhaya ndigo mu ntumbu mabula katebukila pasi, tjinyolotjo kafa, ngono kasimbhaye kakale. Joabu ne nnung'una uwe Abishayi bakatatamila Sheba nkololo wa Bikiri.

¹¹Mmwe we babhayani ba Joabu kama pa itumbu tja Amasa kamimila eti, “Mmwe ne mmwe umile na Joabu na Dafite ngaatobele Joabu.”

¹²Ngono Amasa kakandalala akadubama mu malopa awe pakati kwe zila, ngono mmwe ne mmwe wakabe eti epinda nge zila kama, ndizo mmwe we babhayani ba Joabu kakwebela itumbu tja Amasa ku shango kaposela ngubo pezhugwi kwatjo.

¹³Kukati kusinobe kwadusiwa itumbu tja Amasa mu zila, babhayani bose bakatobela Joabu betatamila Sheba nkololo wa Bikiri.

¹⁴Sheba kapalama njudzi dzose dze Iziraela kunoti ku Abele iku Bhethimaaka, ngono Babiri bose bakakubungana bakantobela mu nzi.

¹⁵Babhayani ba Joabu bakahwa kuti Sheba umukati kwe Abelibetimaka, ipapo bakayenda bakanokomba nzi. Bakabaka duluthulu le mavu kunoti pezhugwi kwe luswingo gukuzhe, ngono bakatangisa kukatsha luswingo kuti baguligile pasi.

¹⁶Ipapo mmwe nkadzi wakabe akatjenjela akamimila ali mukati kwe luswingo eti, “Hwililani! Hwililani! Idwani Joabu azhe ngeno, ‘Ndokumbila lebeleka naye.’ ”

¹⁷Ngono Joabu kazha pejo naye, ipapo nkadzi kambhuzwa kati, “Ndimwi Joabu kene?” Kadabila eti, “Ndimi.” Ndizo kandwa kati, “Teedzani matama e nlandakadzi wenyu.” Ngono kadabila eti, “Ndakateedza.”

¹⁸Ndizo nkadzi kati kunli, “Kwakalebgwa ne bantolo kuyi, ‘Dzene banganokumbila gumbuludzo koga ku Abele,’ ngono shule kwa ikoku, bakapedza ndebo.

¹⁹Imi ndi mmwe we banoda lunyalalo kakale unogalikabgwe mu Iziraela, apa unoshaka kolomola nzi nkulu we Iziraela, ini ungalobesa lukata gwa Yahwe kene?”

²⁰Joabu kashandula eti, “Ngakube kutjena nami, kube kutjena, kuti ndingaulobesa kene kuli kuukolomola!

²¹Atizozwimisila kukolomola nzi wenyu. Koga nlume we shango ye matombo ye Ifureimi, unoyi Sheba nkololo wa Bikiri, wakapandukila Mambo Dafite, mundipe iye koga, ndowobe ndiletjedza kukolomola nzi.” Nkadzi kabe edwa Joabu eti, “Towomuposela nsholo uwe tiutjuludza luswingo.”

²²Ndizo nkadzi kayenda kanobudza bathu nge butjenjedu gugwe. Ngono bakathubula nsholo wa Sheba nkololo wa Bikiri bakauposela kuzhe kuna Joabu. Ndizo Joabu kalidza lunyanga, ngono bakapalala bedwa pa nzi we Abele, mmwe ne mmwe kayenda kanyi kwabo. Ngono Joabu iye kashandukila ku Jerusalema kuna mambo.

²³Ngwenu Joabu kabe ntungamili we babhayani bose be Iziraela, Bhenaya nkololo wa Jehoyada kabe ntungamili we Bakhereti ne Bapeleti.

²⁴Adoramu wakabe ali nlauli we bashingi, Jehoshafati nkololo wa Ahiludi ali nkwali we zwiyitikalo.

²⁵Sheva wakabe ali nkwalili, ngono Zadoki na Abiathari bali bapirisiti

²⁶na Ira we Njairi na iyebo ali mpirisiti wa Dafite.