Read Kalanga 2 Samuele 22 Bible Online

2 Samuele 22 - Kalanga bible

2 Samuele 22

¹Dafite wakambila Yahwe lumbo igogu, mu zhuba Yahwe labakan'angula mu zwita zwizwe zose ne mu luboko gwa Saulo.

²Ngono wakalebeleka eti, “Yahwe ndibo shongwe yangu, ndibo dizhilo langu lakasima, kakale n'angulili wangu.

³Ndzimu wangu, shongwe yangu, ndibo dizhilo langu, tjivikili tjangu kakale simba le jidzo langu, ndibo dizhilo langu lakasima kakale ndibo mabgwatilo angu, Ndibo ntjidzi wangu, unonditjidza mu ngwa.

⁴Ndodana Yahwe, ibo bakafanila kudziwa, bakandiangula mu zwita zwangu.

⁵Lufu gwakandikomba se mapundu e vula ye gungwa, maphatjaphatja e golomodzo akandikulila.

⁶Misungo ye bugalo gwe bafi yakabe yakandipomba, mapuzhu e lufu a mbeli kwangu.

⁷Mukudziyidzika kwangu ndakadana Yahwe; Ndakalilila ku Ndzimu wangu kuti undibhatshe. Mu Ng'umba yawo ukahwa hwi langu. Tjililo tjangu tjikaswika mu zebe dzawo.

⁸“Ndizo shango ikazhekazheka ikatengenyeka, thiwa dze mazhuzhugwi dzikatengenyeka, ngobe Ndzimu wakabe wazhala bushongola!

⁹Busi gukathungayila mu zwimilo zwawo, moto unopisa ukadwa mu nlomo wawo, masimbe anothuta kadwa muuli.

¹⁰Ukapalula zhuzhugwi ukadelukila pasi. Makole matema tema ali kusi kwe makumbo awo.

¹¹Ukatatha dzikherubhu ukawuluka, ukazha nge lubilo mu mapapilo e phepo.

¹²Ukazwizwimba nge zhalima, makole akamandana matema e vula akaupoteleka.

¹³Masimbe e moto akathuta edwa mu lupenyo mbeli kwawo.

¹⁴Yahwe bakadadamula bali zhuzhugwi, Upezhugwizhugwi kadusa hwi lile.

¹⁵Bakaposa misebe bakapaladza zwita, bakapenyesa lupenyo gwe vula bakazwipaladza.

¹⁶Ngolo dze gungwa dzikaboneka, thiwa dze shango dzikabe patjena, Yahwe pabakatjemela zwita zwabo, betjemela nge bushongola.

¹⁷Bakaabilila kudwa zhuzhugwi bakanditola, bakandidubula mu vula yakangina.

¹⁸Bakandiangula mu tjita tjangu tjakasima, ne muna ibabo banondibenga, ngoti bakabe bendikulila.

¹⁹Ndakati ndakasimigwa, bakandigwisa koga Yahwe bakandiangula.

²⁰Bakandiyisa mu magalo akatalabuka, Bakandiangula, ngoti bakandishathila.

²¹Yahwe banondilipa kuyenda nge ndulamo yangu, banondibuzila kuyendidzana ne kushaya nlandu kwangu.

²²Ngobe ndakalondolodza milayo ya Yahwe, andizoshandukila Ndzimu wangu.

²³Ngobe ndayo dzabo dzose dzakanditungamila, ne ndaulo dzabo dzose andizodzikupila kutjena.

²⁴Ndakasibe ne nlandu mbeli kwabo, ndakazwidziba mu jinyo.

²⁵Ndizo Yahwe bakandibuzila kuyendidzana ne ndulamo yangu, ne kuyendidzana ne kushaya nlandu kwangu mu mesho abo.

²⁶Kuna banogalikabgwe mobalakidza kugalikabgwe. Kuna basina nlandu mobalakidza kusheta nlandu.

²⁷Kuna bakatjenapala mozwilakidza makatjenapala, kuna bakakombama muzwilakidza muna bushongola.

²⁸Motjidza banozwiyisa pasi, koga mobhatisa shoni banozwikudza.

²⁹Imwi, ndimwi luvone gwangu Yahwe, Yahwe ndibo tjedza tjangu mu zhalima.

³⁰Nge simba lenyu ndonginilila babhayani, ha ndina Ndzimu wangu ndotjuluka guma.

³¹Ndzimu uwoyu zila dzawo dzakalulwama seni, kugadzabgwe kwa Yahwe ku malebeswa, tjivikili tja bose banotizhila ku bali.

³²Dumbu Ndzimu ndiani ha isi Yahwe, kakale Shongwe ndiani kuzhe kwe Ndzimu wedu?

³³Ndzimu ndiwo dizhilo langu lakasima, ndiwo unothama zila dzangu dzikasibe ne mbatsha.

³⁴Unothama makumbo angu akanga e phala, wakandibiga pakatjengeteka pezhugwi.

³⁵Unodiya zwiazha zwangu kugwa, kuti ndizo maboko angu atubule peta dati le phangula.

³⁶Mondipa tjivikili tje jidzo lenyu, bhatsho yenyu yakandithama nkulu.

³⁷Makatalabudza pamile makumbo angu, kuti ndizo makumbo angu asitongo sodzoloka.

³⁸Ndakatatana ne zwita zwangu azwilobesa andizoshanduka kudzina zwipela.

³⁹Ndakazwitemelela zwikawila pasi, kuti ndizo zwisi muke, zwakawila pasi kwe makumbo angu.

⁴⁰Makandiambadza nge simba le ngwa, mukathama kuti zwita zwangu zwindithigamile.

⁴¹Makathama kuti zwita zwangu zwinditizhe, ibabo banondibenga, ndakabalobesa.

⁴²Bakashaka bhatsho, koga bakashaya unobabhatsha, bakalilila kuna Yahwe, koga bakasibadabile.

⁴³Ndakabaloba abakwiya bakasala benga hwuluba, ndakabakanyangila pasi bakasala benga dope le zila.

⁴⁴Makandiangula mu bathu be bapanduki, makandithama adwilila ndili ntungamile we zwitjaba, bathu bandakabe ndisingazibe bakandishingila.

⁴⁵Bataya bakandithigamila, ndakati ndilebeleka bakandihwa.

⁴⁶Bakatemeka mafupa, bakazha betetema bebhuda mu matizhilo abo.

⁴⁷Yahwe banotjila ngakukudziwe shongwe yangu, ngakukudziwe Ndzimu wangu, shongwe ye jidzo langu,

⁴⁸iwo Ndzimu wakandibgwilizila, ukayisa zwitjaba pasi kwangu.

⁴⁹Ukandiangula mu zwita zwangu, wakandikudza kupinda banyanyaidzi bangu, ukandiangula mu bathu banopanduka.

⁵⁰Ndizo ndowomukudza pakati kwe zwitjaba, amba njimbo dzinokudza zina lenyu.

⁵¹Ndzimu unopa mambo uwe kukunda kukulu, unolakidza ludo gusingazunguzike mu nzhodziwa wawo muna Dafite ne ludzi gugwe nge kusingapele.”