Read Kalanga 2 Samuele 23 Bible Online

2 Samuele 23 - Kalanga bible

2 Samuele 23

¹Ngono ngwenu, awa ndiwo matama e bupelo a Dafite, ndebeleko ya Dafite nkololo wa Jesi, ndebeleko ye nlume wakakudziwa nzhodziwa we Ndzimu wa Jakubo, nkwali we njimbo dzinozipa dze Iziraela.

²Meya ya Yahwe inolebeleka ili mundili, matama abo amu nlomo wangu.

³Ndzimu we Iziraela walebeleka, shongwe ye Iziraela yandidwa ikati, ha nthu ebusa bathu nge ndulamo, ebusa nge kutja Ndzimu,

⁴unonga tjedza tje zhuba libhuda, enga zhuba mangwanana kusina makole, unopenya se vula yana inopenya mu bushwa.

⁵Apa nsha wangu auzojalo ku Ndzimu kene? Ngobe wakathama tjidumano tjisingapele nami, tjisungo tjisingowosunungugwa, kugadzabgwe kusingowoshandugwa. Ndiko kose kwandinoyemula, ndiko kunowobe kukunda kwangu, tjoselele Ndzimu unowothama kuti kushingikale.

⁶Koga bathu basina Ndzimu banonga mihwa inoposegwa kutjena, isingake ikabhakhwa nge maboko.

⁷Koga nthu unoibhata, unoshingisa tshipi kene lupa gwe thumo, inopisiwa nge moto ikalota.

⁸Awa ndiwo mazina e babhayani bakasima Dafite baakabe anabo: We kutanga wakabe ali Jehoshibhashebeti we Ntakemoni wakabe ali nlauli we batungamili batatu, wakagwa nge thumo lile kabulaya babhayani bali makumi ali zhanakadzi (800) nge tjibaka tjing'ompela.

⁹Wakabe entobeledza mu balume batatu bakasima wakabe ali Eleazari nkololo wa Dodo ali nkololo wa Ahohi. Wakabe ana Dafite pabakadadila Bafilisitiya bakabe bakakubunganila kugwa, ngono Baiziraela bakabgwilila shule.

¹⁰Iye kama katemelela Bafilisitiya kudzina tjiazha tjitje tjinyala, tjibuya tjinamatila bukano. Ngono Yahwe bakapa kukunda kukulu kwazo zhuba ilelo, babhayani bakashandukila kuna Eleazari, bewotapa koga zwibhayano mu bafi.

¹¹Unontobeledza wakabe ali Shama, nkololo wa Agi we Nharari. Bafilisitiya bakabe bakubunganila ku Lehi, kwabe kuna nnda we ipimbo, ngono babhayani be Iziraela bakatizha Bafilisitiya.

¹²Koga Shama kama kapilimala ali pakati kwe nnda kutjigwila, katemelela Bafilisitiya, ngono Yahwe bakampa kukunda kukulu kwazo.

¹³Mu tjibaka tjekuvuna, babhayani bali batatu mu bakulu bali makumi matatu (30) bakayenda, bakanoswika kuna Dafite ku guwu le Adulamu, kwakabe goko le Bafilisitiya lakakotokelapo mu nkuku we Refaimu.

¹⁴Ipapo Dafite wakabe ali mu dizhilo, ngono babhayani be Bafilisitiya bali ku Bhetelehema.

¹⁵Ngono Dafite kalebeleka nge ishubu kati, “Ungati mmwe unganondipa vula ang'wa mu tshima le Bhetelehema lipa nkoba.”

¹⁶Ndizo babhayani batatu bakasima bakapalama goko le Bafilisitiya, bakanotjela vula mu tshima le Bhetelehema lakabe lili pa nkoba, bakaitola bakazha nayo kuna Dafite. Koga kasi ing'we akaitebulila pasi kupa Yahwe.

¹⁷Kalebeleka eti, “Yahwe, andingang'we vula iyeyi! Ndowobe ndinga ndinong'wa malopa e balume ibaba balonga butjilo gwabo mu mbatsha!” Ndizo kasiing'we. Ezwi ndizo zwakathamwa nge babhayani batatu bakabe bana tjilopa.

¹⁸Ipapo Abishayi nnung'una wa Joabu nkololo wa Zeruya wakabe ali ntungamili we babhayani bali makumi matatu (30) wakagwa nge thumo lile kabulaya babhayani bali mazana matatu (300), kabe ne tjilumbi kupinda batatu.

¹⁹Apa aazobe ne tjilumbi kupinda butatu kene? Wakathang'wa nlauli we bali makumi matatu (30). Ngono kasibe mwe we batatu be kutanga.

²⁰Bhenaya nkololo wa Jehoyada wakabe ali nlume una tjilopa edwa ku Kabuzele ali nthami we mishingo mikulu, wakabulaya Balume bakasima mu ngwa bali babili be Moabu. Kabuya kangina mu gomba kabulaya shumba mu zhuba lakabe lawa kapuku.

²¹Kakale kabulaya nlume mbuya we N'egipiti. N'egipiti wakabe akabhata thumo nge luboko, koga Bheneya kayenda kunli akabhata swimbo, kashwabula thumo mu luboko gwe N'egipiti, kambulaya nge thumo lile.

²²Ezwi ndizo zwakathamwa ndi Bhenaya nkololo wa Jehoyada ekowana tjilumbi se balume batatu bana tjilopa.

²³Bhenaya wakawana tjilumbi muna bali makumi matatu (30), koga kasitongolizana ne batatu be kutanga. Dafite kanthama nkulu mu balisi babe.

²⁴Asahele nnung'una wa Joabu wakabe ali mmwe we bali makumi matatu (30) na Elihanani nkololo wa Dodo we Bhetelehema,

²⁵na Shama we Nharode na Elika we Harode

²⁶na Helezi we Npaliti na Ira nkololo wa Ikeshi edwa ku Tekowa,

²⁷na Abiezera edwa ku Anatoti na Mebhunayi we Nhushahi,

²⁸na Zalimoni we Nhohi na Maharayi edwa ku Netofa,

²⁹na Helebu nkololo wa Bhaana edwa ku Netofa na Itai nkololo wa Ribhai edwa ku Gibeya we Bhenjamini,

³⁰na Bhenaya edwa ku Pirathoni na Hidai edwa ku nkuku we Gaashi,

³¹na Abialiboni we N'arabhati na Azimaveti edwa ku Bhahurimu

³²na Eliabha edwa ku Shaalibhoni nkololo wa Jasheni na Jonatani,

³³na Shama we Nharari na Ahiamu nkololo wa Sharari we Nharari,

³⁴na Elifeleti nkololo wa Ahasibai edwa ku Maaka, na Eliamu nkololo wa Ahithofele edwa ku Gilo,

³⁵na Hezero edwa ku Karimeli, na Paarai we N'ariba,

³⁶na Igali nkololo wa Nathani edwa ku Zobha na Bhani we N'gadi,

³⁷na Zeleke we N'amoni na Naharayi edwa ku Bheeroti nsengi we zwibhayano zwa Joabu nkololo wa Zeruya

³⁸na Ira we N'itheri na Garebu we N'itheri

³⁹na Uriya we Nhiti: Babhayani bose bakasima bakabe bali makumi matatu ana kutendeka (37).