Read Kalanga 2 Samuele 4 Bible Online

2 Samuele 4 - Kalanga bible

2 Samuele 4

¹Kwakati Ishibosheti nkololo wa Saulo ehwa kuti Abineri wakafila ku Heburoni, katemeka mafupa ne Baiziraela bose bakatja.

²Ipapo nkololo wa Saulo wakabe ana balume babili bali batungamili be goko le kutapa, mmwe wakabe eyi Bhaana mmwe kuyi Rekabi. Bakabe bali bakololo ba Rimoni we Nbheeroti we ludzi gwa Bhenjamini. Bheeroti yakabe ili ya Bhenjamini.

³Bathu be Bheeroti bakatizhila ku Githaimu bakanogalako bali bazhi na nasi.

⁴Jonatani nkololo wa Saulo wakabe ana mwana we tjilume wakabe ali tjilema makumbo wose. Wakabe ana makole ali mashanu ha thawu ngekwa Saulo na Jonatani dzizha dzidwa ku Jezirele. Kwakati mbhabhi uwe emmilidza etizha, mukulibilidza kukwe etizha, mwana kawa kabe tjilema. Zina lile lakabe liyi Mefibosheti.

⁵Ngono ngwenu bakololo ba Rimoni we Nbheeroti, bo Rekabi na Bhaana, bakamilika kuli masikati zhuba lipisa bakaswika ku ng'umba ya Ishibhosheti, iye akabe akazwiteedza masikati.

⁶Bakangina mu ng'umba bezwithama banotola mathunde e korong, bakambhaya mu ntumbu, Rekabi ne nnung'una uwe Bhaana bakatizha.

⁷Bakangina mu ng'umba iye ye bulalo ali lele. Shule kwe kumbhaya bembulaya bakanthubula nsholo. Bebe betola nsholo uwe beyenda nge zila ye Araba busiku gose.

⁸Bakazhisa nsholo wa Ishibhosheti kuna Dafite ku Heburoni bebe bedwa mambo beti, “Nsholo wa Ishibosheti nkololo wa Saulo woyu, tjita tjitjo, wakabe eshaka kumubulaya, Yahwe ba bgwilizilila tetshi wangu mambo mu zhuba la nasi kuna Saulo ne bana be bana babe.”

⁹Dafite kadabila Rekabi ne nnung'una uwe Bhaana bakololo ba Rimoni we Nbheeroti eti, “Ndotuna na Yahwe, bakandidzutunula mu mbatsha dzose!

¹⁰Kwakati nlume wakandibudza kuti Saulo wafa ekumbula kuti wazhisa thawu dzinozipa, ndakambhata ambulaya ku Zikilagi, iwoyu ndiwo mbayilo wandakampa mu thawu dzidze!

¹¹Kowobetjani kene, ha balume babiibi babulaya nthu usina nlandu ali pa bulalo mu ng'umba iye! Ngono ngwenu apa andingashake malopa awe mu maboko enyu, ndibuya ndimudusa mu shango kene?”

¹²Ndizo Dafite kadusa ndaulo ku balanda babe, ngono bakababulaya, bakabathubula maboko ne makumbo, bakapaika zwitumbu zwabo pa wunde ye dziba mu Heburoni. Koga nsholo wa Ishibhosheti bakaubiganya mu ikumbu tja Abineri mu Heburoni.