Read Kalanga 2 Samuele 5 Bible Online

2 Samuele 5 - Kalanga bible

2 Samuele 5

¹Ndizo njudzi dzose dze Iziraela dzakazha kuna Dafite ku Heburoni, ngono bakandwa bakati, “Bonani ti bathu benyu, ti lopa ling'ompela.

²Mu tjibaka tjakapinda, tibusiwa ndi Saulo ali mambo wedu, ndimwi makabe mutungamila Iziraela mu ngwa dzayo. Yahwe bakamubudza beti, iwe unowobe nlisi we bathu bangu Baiziraela, iwe unowobe mbusi we Iziraela.”

³Kwakati batungamili bose be Iziraela bezha kuna Mambo Dafite ku Heburoni, mambo bakathama tjidumano nabo mu Heburoni mbeli kwa Yahwe, ngono bakazhodza Dafite kube mambo we Iziraela.

⁴Dafite wakabe ana makole ali makumi matatu (30) ha etangisa busa, ngono kabusa makole ali makumi manna (40).

⁵Mu Heburoni wakabusa Juda makole ali kutendeka ana mimwedzi ili mitathatu, mu Jerusalema wakabusa Iziraela yose ne Juda makole ali makumi matatu ana ali matatu (33).

⁶Mambo ne bathu babo bakangina mu Jerusalema kugwa ne Bajebusi, bakabe bali bagali be shango iyeyo, bakadwa Dafite beti, “Aungangine imomu, ungadzibiwa nge zwilema nenge mapofu dumbu.” Bekumbula beti, “Dafite angatinginilile ipapa.”

⁷Nakuto kwakajalo Dafite katola matizhilo e Ziyoni, anodang'wa kuyi, “Nzi nkulu wa Dafite”

⁸Mu zhuba ilelo Dafite wakalebeleka eti, “Mmwe ne mmwe unoshaka nginilila Bajebusi, ngaatobele ngolo ye vula kuti anoswika ku zwilema ne mapofu anobengiwa ndi Dafite.” Ndizo kuyi, “Mapofu ne zwilema abatowongina mu ng'umba.”

⁹Dafite wakagala mu matizhilo iyawo, kabe eadana Nzi nkulu wa Dafite. Kabaka nzi kuupoteleka kudwa pa duluthulo kunoti mukati.

¹⁰Ngono simba la Dafite likapaphidzika ngobe Yahwe Ndzimu Masimbawose bakabe banaye.

¹¹Mambo Hiramu we Tire katuma batumwa kuna Dafite, bakayenda ne mapango e misida ne babezhi ne bathuli be mabgwe bakabakila Dafite ng'umba ye bushe.

¹²Dafite kaziba kuti Yahwe bakanthama mambo kubusa Iziraela, kakale bakamilidza mbuso uwe ngekwe bathu babo Baiziraela.

¹³Dafite wakati asinodwa mu Heburoni, kalobola bamwe bakadzi ne balongwana mu Jerusalema, ngono bakanzwalila bakololo ne bakololokadzi bamwe.

¹⁴Awa ndiwo mazina e bana babe bakazwaligwa mu Jerusalema: Shamuya na Shobabu na Nathani na Solomoni na

¹⁵Ibihari na Elishowa na Nefegi na Jafiya

¹⁶na Elishama na Eliyada na Elifeleti.

¹⁷Kwakati Bafilisitiya bahwa kuti Dafite wakazhodziwa kube mambo kubusa Baiziraela, Bafilisitiya bose bakatathila pezhugwi kunovima Dafite, koga Dafite kahwa ngekwako kadelukila ku matizhilo.

¹⁸Bafilisitiya bakazha bakaandama mu Nkuku we Refaimu.

¹⁹Dafite kabhuzwa kuna Yahwe kati, “Apa ndingayenda anogwa ne Bafilisitiya kene? Apa mowobalonga mu luboko gwangu kene?” Yahwe bakan'dabila beti, “Yenda, ngobe tjoselele Bafilisitiya ndowobalonga mu luboko gugo.”

²⁰Ndizo Dafite kazha ku Bhaaleparazimu, ngono kabakundapo. Kabe eti, “Yahwe bakapitula zwita zwangu mbeli kwangu, se kupituka kwe nsundila.” Ndizo pathu ipapo pakadang'wa Bhaaleparazimu.

²¹Bafilisitiya bakasiya midzimu yabo ipapo, ngono Dafite ne bathu babe bakaitola.

²²Bafilisitiya bakabgwilila bakaandama mu Nkuku we Refaimu.

²³Ngono kukati Dafite ebhuzwa Yahwe, bakadabila beti, “Usitongo bashangamidza, ubapoteleke shule, ubanginilile udwa ku lubizho gwe miti ye malibheri.

²⁴Ha uhwa nsindo we makumbo pezhugwi kwe miti ye malibheri, utjimbidze, ngobe kowobe kudwa kuti ndakutungamila kubulaya babhayani be Bafilisitiya.”

²⁵Dafite kathama koga sekwa adwiwa ndi Yahwe, kabulaya Bafilisitiya kudwa ku Geba kunoti ku Gezeri.