Read Kalanga 2 Samuele 6 Bible Online

2 Samuele 6 - Kalanga bible

2 Samuele 6

¹Dafite kakubunganya kakale balume bali zwiwulu zwili makumi matatu (30 000) bose bakashalugwa mu Iziraela.

²Dafite ne balume bose baakabe anabo bakamilika kudwa mu Bhaale we Juda kunotolako Bhokisi le Ndzimu, linodang'wa nge zina la Yahwe Masimbawose, ibo bagele pakati kwe dzikherubhu.

³Bakalonga Bhokisi le Ndzimu mu kara tshwa, bebe belidusa mu ng'umba ya Abinadabu yakabe ili pezhugwi kwe duthu. Bakololo ba Abinadabu, Uza na Ahio ndibo bakabe beyendisa kara tshwa

⁴ina Bhokisi le Ndzimu muili, ngono Ahio eyenda mbeli kwayo.

⁵Dafite ne ng'umba yose ye Iziraela bakabe bezana nge simba labo lose mbeli kwa Yahwe, bemba belidza zwilidzo zwakathamwa nge nti we nsipuri, matende ne dzithamborini ne matumbana ne dzisimbali.

⁶Bakati beswika ku lutombo gwa Nakoni, Uza kaabilila nge luboko gugwe ku Bhokisi le Ndzimu kalibhata ngobe mangabe akabe alizunguza.

⁷Yahwe bakazhala bushongola ngekwa Uza, ngekwe kushaya kutja kukwe, ndizo bakambulaya, kafila pa wunde ye Bhokisi le Ndzimu.

⁸Ipapo Dafite kagwadzamoyo, ngobe bushongola gwa Yahwe gwawila Uza, ndizo pathu ipapo pakadang'wa Pereziuza[2] na nasi.

⁹Dafite wakabe etja Yahwe mu zhuba ilelo, kabe eti, “Apa Bhokisi le Ndzimu lingazha kundili tjini?”

¹⁰Wakabe asingayemule kutola Bhokisi la Yahwe kugala nalo mu Nzi nkulu uwe, mu bumo gwa ikoku, Dafite wakalitola kaliyesa ku ng'umba ya Obediedomu we N'giti.

¹¹Bhokisi la Yahwe likagala mimwedzi mitatu mu ng'umba ya Obediedomu we N'giti, Yahwe bakakombolela Obediedomu ne nsha uwe wose.

¹²Mambo Dafite kahwa kuti, Yahwe bakakombolela nsha wa Obediedomu na zose zwaanazo, ngekwe Bhokisi le Ndzimu. Ndizo Dafite kayenda kanotola Bhokisi le Ndzimu ku ng'umba ya Obediedomu elizhisa ku Nzi nkulu wa Dafite nge nzano nkulu.

¹³Kukati ibaba bakabe bakasenga Bhokisi la Yahwe bayenda thambo dzili kutathatu, kathama tjibhayilo tje ngabe ne ikondolo tjakakodziwa.

¹⁴Dafite kazana mbeli kwa Yahwe nge simba lile lose, akaambala efodi.

¹⁵Ndizo Dafite ne nsha wose we Iziraela bakatathila ne Bhokisi la Yahwe nge mipululu belidza lunyanga.

¹⁶Kwakati Bhokisi la Yahwe lingina mu Nzi Nkulu wa Dafite, Mikhali nkololokadzi wa Saulo kashozhela kuzhe nge fesitere, kabona Mambo Dafite ekudzula ezana mbeli kwa Yahwe, ngono kansola mu moyo uwe.

¹⁷Bakaswikisa Bhokisi la Yahwe, bakaligadza pa bugalo gwalo, mukati kwe nshasha walakabe labambuligwa ndi Dafite. Dafite kadusila Yahwe zwibhayilo zwinopisiwa ne zwibhayilo zwe mbakisano.

¹⁸Kwakati Dafite asinopedza kudusa zwibhayilo zwinopisiwa ne zwipo zwe mbakisano, kakombolela bathu mu zina la Yahwe Masimbawose.

¹⁹Kabe ekobela bathu zojiwa, itjaba tjose tje Iziraela, bose balume ne bakadzi, mmwe ne mmwe tjiwunga ne khekhe le thewa ne thango ye nyama ne khekhe le thewa dzakawanikiwa, kudwapo mmwe ne mmwe akayenda ku nzi uwe.

²⁰Dafite wakabuya kuwokombolela be nsha uwe, ngono Mikhali nkololokadzi wa Saulo kabhuda kanonshangamidza kandwa kati, “Nasi mambo we Iziraela wazwipundumadza seni, ezwiambula mbeli kwe balandakadzi be balanda babe, se tjilengwe tjinga zwiambula tjisina shoni!”

²¹Dafite kadwa Mikhali kati, “Ndabe ndizana ndili mbeli kwa Yahwe, bakandishalula mu bumo gwa tate babo kene mmwe we nsha wabo, nge kundishalula bendibiga mbusi we itjaba tja Yahwe, tje Iziraela.

²²Ndowolengudzika kakale kupinda ipapa, ndibuya ndizwiyisa pasi, koga ngekwe balandakadzi bawaleba ngekwabo, ndowotetiwa.”

²³Mikhali nkololokadzi wa Saulo wakashaya bana kuswikila efa.