Read Kalanga 2 Samuele 7 Bible Online

2 Samuele 7 - Kalanga bible

2 Samuele 7

¹Kwakati mambo batjigala mu ng'umba yabo, Yahwe babanyatutusa mu zwita zwabo zose zwakabapoteleka,

²bakadwa Nathani nlebesambeli bakati, “Bona ndogala mu ng'umba ye bushe yakabakwa nge mapango e nti we sida, koga Bhokisi le Tjidumano tja Yahwe litji mu nshasha.”

³Nathani kadabila mambo eti, “Tjawakakumbula mu moyo utjithame, ngobe Yahwe banawe.”

⁴Koga mu busiku igogo dama la Yahwe likazha kuna Nathani liti,

⁵“Kabudze nlanda wangu Dafite uti, Yahwe bakati ‘Apa ndiwe ungandibakila ng'umba yandingagala kene?

⁶Andithu agala mu ng'umba kwetjinga kwandakadusa bathu be Iziraela mu Egipiti kuswikila nasi, ndagala ndiyenda yeno na yeno ndigala mu nshasha.

⁷Kumwe ne kumwe kwandakayenda ndina bathu be Iziraela, apa ndina dama landakatongodwa mmwe we batungamili be Iziraela wandakadwa nditi alise bathu bangu Baiziraela nditi, “Ini usakandibakila ng'umba ye misida kene?” ’ ”

⁸“Ndizo ngwenu, budza nlanda wangu Dafite kuti etji nditjo tjinolebgwa ndi Yahwe Masimbawose bakati, ‘Ndakakutola ku mafulilo wakasala shule kwe pkhwizi ne mbudzi kuti ube mbusi we bathu bangu Baiziraela.

⁹Ndakabe nawe kumwe ne kumwe kwawakabe uyenda, alobesa zwita zose zwizo mbeli kuko, ngwenu ndowothama zina lilo likabe gulu se zina le bakulu be shango.

¹⁰Ndowobigila bathu bangu Baiziraela magalo ndibe ndibadzikila, kuti babe ne nzi wabo, zwita zwabo azwitjowobatshambilidza sekwazwakathama mu kutanga

¹¹nenge kudwa mu misi yandakabigila bathu bangu Baiziraela basumikilisi. Ngono ndowokunyatutusa mu zwita zwizo. Yahwe banokuzibisa kuti Yahwe ndibo banowokuthamila nsha.

¹²Ha mazhuba awo atjilizana ube ufa, ndowomusa mmwe we lutshinga gugo kukugala thaka, unowobhuda mukuli, ngono ndowosimisa mbuso uwe.

¹³Unowobakila zina langu ng'umba, ngono ndowobiga tjigalo tje bushe gwe mbuso uwe nge kusingapele.

¹⁴Ndowobe tate babe, iye unowobe nkololo wangu. Ha ethama nlandu, ndowonloba nge shamu, ndakanladza pasi se bana bose.

¹⁵Koga anditowotothodza ludo gwangu gusingazunguzike munli, sekwa ndakatongothama muna Saulo iye wandakadusa mbeli kuko.

¹⁶Ng'umba iyo ne mbuso uwo zowoma nge kusingapele, tjigalo tjitjo tje bushe tjowoma nge kusingapele.’ ”

¹⁷Nathani wakalondela Dafite zose zwaakazumbunuligwa ne Ndzimu.

¹⁸Ndizo Mambo Dafite bakangina bakagala mbeli kwa Yahwe, bebe beti, “Imi ndiani She Yahwe, nsha wangu uni, kwamadzina mukandiswikisa ipapa kene?

¹⁹Seungati kwakabe kusakaswika mu mesho enyu She Yahwe, makalebelambeli kakale ngekwe zwinoyitikala mu ng'umba ye nlanda wenyu, Yahwe Ndzimu wangu, apa ndiko sekwa magala mushinga ne bathu kene?

²⁰Apa Dafite ungalebani kakale kumuli? Ngobe moziba nlanda wenyu imwi She Yahwe bangu.

²¹Ngekwe dama lenyu nenge kuda kwe moyo wenyu, makathama zwithu zwikulukulu mukazwizibisa nlanda wenyu.

²²Ngekwako munkulu seni She Yahwe wangu, ngobe akuna mmwe unonga imwi, kakale akuna mmwe Ndzimu kuzhe kwenyu, sekwa takahwa zose nge zebe dzedu.

²³Apa ludzi gupi gunonga gwenyu gwe Iziraela, itjaba tjitjoga mu shango tjakadzutunugwa nge Ndzimu kuti tjibe tjawo, ne kuzwithamila zina, ubathamila zwithu zwikulukulu ne zwinotjenamisa, nge kutata zwitjaba ne midzimu yazo mubumo gwe bathu babo, ibo babakadzutunula ku Egipiti?

²⁴Makathama Iziraela kube bathu benyu nge kusingapele, ngono imwi Yahwe mukabe Ndzimu wabo.

²⁵“Ndizo ngwenu, imwi Yahwe Ndzimu, shingikadzani tjatjose dama lenyu lamakaleba ngekwe nlanda wenyu ne ngekwe ng'umba iye, thamani sekwa makagadzabgwe.

²⁶Kuti ndizo zina lenyu likudziwe nge kusingapele. Bathu banowobe beti, ‘Yahwe Masimbawose Ndzimu we Iziraela.’ Ne ng'umba ye nlanda wenyu Dafite ime mbeli kwenyu.

²⁷Imwi Yahwe Masimbawose, Ndzimu we Iziraela, makazumbunulila nlanda wenyu muti, ‘Ndowokubakila ng'umba.’ Ndizo nlanda wenyu wabe ne simba le kutembezela ntembezelo iwoyu kumuli.

²⁸“She Yahwe, mu Ndzimu! Matama enyu anogalikabgwe, kakale makagadzabgwe nlanda wenyu zwithu izwezwi zwakanaka.

²⁹Ndizo ngwenu, dzene kungamushathisa kukombolela ng'umba ye nlanda wenyu, kuti idwilile ili mbeli kwenyu nge kusingapele, ngobe imwi She Yahwe, makaleba, ngono nge makombolelo enyu, ng'umba ye nlanda wenyu inowokombolegwa nge kusingapele.”