Read Kalanga 2 Samuele 8 Bible Online

2 Samuele 8 - Kalanga bible

2 Samuele 8

¹Shule kwa ikoku, Dafite kakunda Bafilisitiya, kabayisa pasi kukwe, katola Metegama mu maboko e Bafilisitiya.

²Kakale kakunda Bamoabu, kabaladza pasi, kabalizanya nge nsungo, mizila yose mibili ikabulawa, ngono nzila we butatu ukasibulawe. Ndizo Bamoabu bakabe pasi kwa Dafite bakadusa ndilo ya nzinda.

³Kapapha kakunda Hadadezeri nkololo wa Rehobi, mambo we Zoba, paakabe eyenda kunomusa mbuso uwe ku gwizi gwe Yufuratesi.

⁴Dafite kantapila batathi be mbizi bali tjiwulu tjina mazana ali kutendeka (1 700) ne babhayani be makumbo bali zwiwulu zwili makumi mabili (20 000). Dafite katema mbizi dzose dzinokweba koloyi makanyu, koga kasiya dzakaswika koloyi dzili zana (100).

⁵Kwakati Baaramu be Damasiko bezha kuwobhatsha Hadadezeri mambo we Zoba, Dafite kabulaya balume bali zwiwulu zwili makumi mabili ana mabili (22 000).

⁶Dafite kabiga makotokelo e babhayani mu ntuthu we Baaramu be Damasiko, ngono Baaramu bakabe balanda ba Dafite ngono bakadusa lukhetho. Yahwe bakathama kuti Dafite akunde kumwe ne kumwe kwaanoyenda.

⁷Dafite wakatola zwivikili zwe golide zwakabe zwakasengwa nge balanda ba Hadadezeri, kazwizhisa ku Jerusalema.

⁸Kudwa ku Bheta ne kudwa ku Bherotai mizi ya Hadadezeri, Mambo Dafite bakatola phangula njinji kwazo.

⁹Kukati Toi mambo we Hamati ehwa kuti Dafite wakakunda babhayani ba Hadadezeri bose,

¹⁰katuma nkololo uwe Joramu kuna Dafite, kunon'dumilisa ne kunlumbidza ngobe akakunda Hadadezeri mu ngwa, ngobe Hadadezeri wagala egwa na Toi. Joramu kabuya ne zwithu zwe siliva ne golide ne phangula.

¹¹Mambo Dafite kapa Yahwe zwithu izwezwi, kose ne siliva ne golide zwaakabe epa Yahwe kudwa mu tjaba dzose dzaakakunda,

¹²kudwa ku Edomu ne Moabu ne Baamoni ne Bafilisitiya ne Amaleki ne kudwa pana zwakatapigwa Mambo Hadadezeri nkololo wa Rehobi mambo we Zoba.

¹³Dafite wakawana tjilumbi shule kwe asinobuya edwa kubulaya Baedomu bali zwiwulu zwili gumi lina zhanakadzi (18 000) mu Nkuku we Mwenyu.

¹⁴Dafite kabaka makotokelo e babhayani mu Edomu yose, Baedomu bose bakabe pasi kukwe. Yahwe bakathama kuti Dafite akunde kumwe ne kumwe kwaakabe eyenda.

¹⁵Ndizo Dafite wakabusa Iziraela yose, eshingila bathu babe bose ndulamo ne kulizalizana.

¹⁶Joabu nkololo wa Zeruya wakabe ali ntungamili we babhayani, Jehoshafati nkololo wa Ahiludi wakabe ali nkwali we zwiyitikalo.

¹⁷Zadoki nkololo wa Ahitubu na Ahimeleki nkololo wa Abiathari bakabe bali bapirisiti, Seraya ali nkwalili.

¹⁸Bhenaya nkololo wa Jehoyada wakabe ali nlauli we Bakhereti ne Bapeleti ngono bakololo ba Dafite ibo bakabe bali bapirisiti.