Read Kalanga 2 Samuele 9 Bible Online

2 Samuele 9 - Kalanga bible

2 Samuele 9

¹Limwe zhuba Dafite kabhuzwa eti, “Apa kutjina mmwe utjimpenyu we ng'umba ya Saulo kene? Ha alipo ndowonthamila lubu ngekwa Jonatani.”

²Ipapo kukabe kuna nlanda we ng'umba ya Saulo wakabe edang'wa kuyi Ziba, kadanigwa mbeli kwa Dafite. Mambo bakambhuzwa bakati, “Ndiwe Ziba?” Kadabila eti, “Ndimi nlanda wenyu.”

³Mambo bakabhuzwa kakale bakati, “Apa kutjina mmwe utjimpenyu we ng'umba ya Saulo wandinga lakidza ngoni dze Ndzimu kene?” Ziba kadabila mambo eti, “Nkololo wa Jonatani utjimpenyu, tjilema makumbo wose.”

⁴Mambo bakambhuzwa bakati, “Ungayi?” Ziba kadabila mambo eti, “Uku ng'umba ya Makiri nkololo wa Amiele ku Lodeba.”

⁵Ndizo Mambo Dafite bakatumila nthu kunontola kudwa ku ng'umba ya Makiri nkololo wa Amiele ku Lodeba.

⁶Mefibosheti nkololo wa Jonatani, mwana we mwana wa Saulo kazha kuna Dafite, kakotamisa nsholo nge kuzwiyisa pasi. Dafite kan'dana kati, “Mefibosheti!” Kadabila kati, “Tetshi, nlanda wenyu upano.”

⁷Dafite kandwa kati, “Usitje, ndowokuthamila buthu ngekwa tate babo Jonatani, ndowokubgwilizila shango yose yakabe ili ya batategulu babo Saulo, ngono iwe ngekuko unowoja pa tafuli yangu misi yose.”

⁸Mefibosheti kakotamisa nsholo kati, “Apa imi nlanda wenyu ndini, kwamungadzina mukayitila hanya mbgwa yakafa sami kene?”

⁹Ndizo mambo bakadana Ziba nlanda wa Saulo, bakandwa bakati, “Kose kwakabe kuli kwa Saulo ne ng'umba iye yose ndakupa mwana we mwana wa tetshi uwo.

¹⁰Iwe ne bakololo babo ne balanda babo mowonlimila nnda, mubuya muvuna munzhisila zojiwa. Kuti ndizo mwana we mwana wa tetshi uwo awane tjinojiwa, koga Mefibosheti mwana we mwana wa tetshi uwo unowoja pa tafuli yangu misi yose.” Ziba wakabe ana bakololo bali gumi lina bashanu (15) ne balanda bali makumi mabili (20).

¹¹Ziba kadabila mambo eti, “Nlanda wenyu unoshinga zose zwa adwiwa ndi tetshi wangu mambo.” Mefibosheti kajila pa tafuli ya Dafite se mmwe we bakololo ba mambo.

¹²Mefibosheti wakabe ana nkololo ntjetjana we zina linoyi Mika. Ngono bose bakabe begala mu ng'umba ya Ziba bakabe balanda ba Mefibosheti.

¹³Mefibosheti wakabe egala mu Jerusalema, egala ejila pa tafuli ya mambo, koga wakabe ali tjilema makumbo wose.