Read Kalanga 1 Bomambo 10 Bible Online

1 Bomambo 10 - Kalanga bible

1 Bomambo 10

¹Kukati mambokadzi we Sheba ehwa ngekwe tjilumbi tja Solomoni ngekwe zina la Yahwe, kazha ku Jerusalema, kuwonlika nge bhuzo dzakasima.

²Mambokadzi kaswika mu Jerusalema akapelekwa nge bunji gusi bushoma gwe bathu nenge kamela dzakabelesa zwipayisi zojiwa ne golide isi shoma ne mabgwe akanaka. Ngono kwakati beshangana na Solomoni belebesana, kadusa kose kupa moyo uwe.

³Ngono Solomoni kadabila bhuzo dzidze dzose, kusina tjimwe tjakabe tjakasimila mambo, kutjitjenesela mambokadzi iwoyu.

⁴Ngono kukati mambokadzi ebona butjenjedu gose gwa Solomoni ne ng'umba ye bushe yaakabaka

⁵ne zojiwa zwakabe zwipakugwa pa tafuli iye ne bugalo gwe hadzasha dzidze ne kuma kwe balanda babe ne zwiambalo zwabakaambala, ne babhati be bhepe la mambo, ne tjibhayilo tjitje tjinopisiwa, tjipisigwa kupiwa Yahwe, mu Ng'umba ye Ndzimu, mambokadzi we Sheba kapelegwa nge simba.

⁶Ngono kadwa Mambo Solomoni kati, “Tjandakahwa ndili ku shango yangu ngekwe mishingo iyo nenge butjenjedu gugo malebeswa.

⁷Koga andizotongo duma tjandakabe ndihwa, kudzina ndizha ndizwibonegwa nge mesho. Ngono bona, gwamu le zwandabona andizobe ndazwibudziwa. Butjenjedu ne fumwa iyo zopinda zwandakabudziwa.

⁸Bakakombolegwa seni bakadzi babo! Dzakakombolegwa seni hadzasha dzidzo idzedzi, dzinoti nge misi yose bakabe bali mile mbeli kuko behwa butjenjedu gugo!

⁹Ngakukudziwe Yahwe, Ndzimu uwo, bakakuda bakakugadza pa tjigalo tje bushe gwe Iziraela. Ngoti ludo gwa Yahwe mu Iziraela gumile nge kusingapele. Bakakuthama mambo kuti usumikilise nge ndulamo.”

¹⁰Mambokadzi we Sheba kadusa zwipo zwe talenta dze golide dzili zana lina makumi mabili (120) ne zwipayisi zwe bunji gusi bushoma ne mabgwe akanaka. Zwipayisi izwezwi mambokadzi zwaakapa Mambo Solomoni, zwakabe zwili zwe themba hwulu kwazo, zwisakatongoti Mambo Solomoni kazwiwana kumwe kakale.

¹¹Pezhugwi kwa izwezo zwikepe zwa Hiramu zwikazhabo ne golide kudwa ku Ofira ne mapango e nti unoyi alamugi ne mabgwe akanaka.

¹²Ngono mambo kathama mapango kube phanda dze Ng'umba ya Yahwe ne ng'umba ye bushe. Kabuya kathamila bambi zwilidzo zwakasiyana. Akuna mapango e nti we alamugi akatongozha kene kuli bong'wa mu Iziraela, kuswikila nasi.

¹³Mambo Solomoni kapa mambokadzi we Sheba zose zwaakabe ayemula, kuzhe kwe zwaakapiwa ndi Mambo Solomoni mu ng'umba ye bushe ngoda kukwe. Ndizo mambokadzi kabgwilila ku shango ye Sheba ne balanda babe.

¹⁴Gole ne gole Solomoni wakabe eamutjila talenta dze golide dzili mazana ali tathatu ana makumi ali tathatu ne kutathatu (666),

¹⁵kusingabaligwe ne yakabe idwa mu baseenyi ne mu ndipo ye mimwiso ye batengesi ne yakabe idwa muna bomambo bose be Arabiya ne yakabe idwa mu balauli be mituthu ye shango ye Iziraela.

¹⁶Mambo Solomoni kathama zwivikisi zwili mazana mabili (200) zwe golide yakathugwa, tjimwe ne tjimwe tjakathamwa nge golide ye tjilizanyo tje shekele dzili mazana ali tathatu.

¹⁷Kathama zwimwe zwivikisi zwitukunu zwe golide yakathugwa zwili mazana ali matatu (300), tjimwe ne tjimwe tjakathamwa nge tjilizanyo tje golide tje seme dzili mbili. Ngono mambo kabiga zwivikisi zose izwezwi mu Ng'umba ye Ishaka tje Lebanoni.[1]

¹⁸Kakale mambo kathama tjigalo tjikulu tje nyanga dze zhowu, katjidzulula nge golide yakanaka kwazo.

¹⁹Tjigalo tjakabe tjina matathilo ali matathatu, shule kwatjo kuna ifano tje nsholo we phulu, mu lubadu gumwe ne gumwe gwe panogagwa tjina panobigwa maboko ne zwifano zwe shumba mbili muwunde kwe panobigwa maboko.

²⁰Kwakabe kulimile zwifano zwe shumba dzili gumi lina mbili (12) ku bupelo gumwe ne gumwe gwe matathilo ali matathatu. Akuna tjigalo tje bushe tjakatongobepo mu mbuso mmwe tjakabe tjinga itjetji.

²¹Mikombe yose ya Mambo Solomoni yakabe ili ye golide ne zwija zose zwe ng'umba ye Ishaka tje Lebanoni zwakabe zwili zwe golide yakanaka, kusina tjazo tje siliva, ngoti mu misi ye butjilo gwa Solomoni siliva yakabe itogwa isi tjimwe.

²²Mambo wakabe ana zwikepe zwinjinji kwazo zwe Tashishi ku gungwa ne zwa Hiramu. Mu makole matatu mamwe ne mamwe zwikepe zwizwe zwakabe zwibuya zwizhisa golide ne siliva ne nyanga dze zhowu ne shoko ne dziphikoko[2].

²³Ndiko Mambo Solomoni wakabe epinda bomambo bose be shango nge fumwa nenge butjenjedu.

²⁴Shango yose yakabe ishaka kuzha kuwoteedza butjenjedu gugwe gwaakapiwa nge Ndzimu.

²⁵Gole ne gole mmwe ne mmwe wabo wakabe enzhila tjipo, zwithu zwe siliva ne golide ne zwiambalo ne zwibhayano ne zwipayisi ne mbizi ne moulo.

²⁶Ngono Mambo Solomoni kakubunganya koloyi dze ngwa dzili tjiwulu tjina mazana ali manna (1 400) ne bataswi be mbizi dze ngwa bali zwiwulu zwili gumi lina zwibili (12 000), zwimwe anazo mu Jerusalema, zwimwe zwili mu mizi mikulu yakathubukana ne koloyi dze ngwa.

²⁷Mu misi ye kubusa kwa Solomoni kathama kuti siliva ibong'we pamwe ne pamwe mu Jerusalema se lushale, kathama kuti miti ye misida ibe minji se miti ye mipaya ye shango yakakungulukila.

²⁸Mbizi dza Solomoni dzakabe dzidwa ku Egipiti ne ku Kue, batengi ba mambo bakabe bedziamutjila ku Kue kwabakabe belipa themba dzadzoko.

²⁹Koloyi dze ngwa dzakabe dzitengwa ku Egipiti, bakabe betengela bomambo be Bahiti ne be Baaramu, koloyi dzitengesiwa nge shekele dze siliva dzili mazana dzina matathatu (600) mbizi ing'ompela ili shekele dzili zana lina makumi mashanu (150).