Read Kalanga 1 Bomambo 11 Bible Online

1 Bomambo 11 - Kalanga bible

1 Bomambo 11

¹Mambo Solomoni kada bakadzi banjinji be njudzi dzipoga, kubaligwa ne nkololokadzi wa Faro mambo we Egipiti, wakalobola bakadzi be Bamoabu ne be Baamoni ne be Baedomu ne be Basidoni ne be Bahiti,

²bedwa mu njudzi Yahwe dzabakadwa Baiziraela bakati, “Musitongo lobolelana ne njudzi dzipoga, ngoti nge malebeswa bangadwa beshandulila moyo yenyu ku midzimu yabo.” Nenguba kwakajalo Solomoni wakabhatilila mu kubada.

³Wakabe akalobola bakadzi bali mazana ali kutendeka (700) bali bakololokadzi ba bomambo ne balongwana bali mazana ali matatu (300) ngono bakadzi babe ibaba bakandusa mu zila.

⁴Ngoti kwakati Solomoni akwegula bakadzi babe bakashandulila moyo uwe ku midzimu ipoga. Moyo uwe ukasitjabe mu malebeswa kuna Yahwe Ndzimu uwe, se moyo wa tate babe Dafite wakabe uli iko.

⁵Ngoti Solomoni wakabe atjitobela Ashitoreti ndzimukadzi we Basidoni na Milikhomu ndzimu unoshimisa we Baamoni.

⁶Ndizo Solomoni kathama mbipo mu mesho a Yahwe, kasitjatobele Yahwe nge buzhalo, sekwakabe kuthama tate babe Dafite.

⁷Ipapo Solomoni kabakila Khemoshi ndzimu unoshimisa we Moabu na Moleki ndzimu unoshimika we Baamoni bugalo gwakatuthumala, pezhugwi kwe dombo bhezhuba kwe Jerusalema.

⁸Kathamila bakadzi babe bose be njudzi dzipoga saikoko, ngono bakapisila midzimu yabo motsha ne zwibhayilo ikoko.

⁹Yahwe bakagwadzila moyo Solomoni, ngobe afupatila Yahwe Ndzimu we Iziraela, ibo bakazwilakidza kunli kabili kose,

¹⁰kakale bakantjemela ngekwe kuthu ikoku, kuti asitobele midzimu ipoga, koga kasihwilile Yahwe muna tjabakandwa.

¹¹Ndizo Yahwe bakadwa Solomoni bakati, “Se kwabe iwo mpanga uwo, kusalondolodza tjidumano tjangu, ndowopaladza mbuso uwo, autola mukuli, aupa mmwe we balanda babo.

¹²Nenguba kwakajalo ngekwa tate babo Dafite, anditowoupaladza mu mazhuba e butjilo gugo, koga ndowoupaladza watjibe mu maboko e nkololo uwo.

¹³Ngono anditowopaladza mbuso wose, koga ndowosiyila nkololo uwo ludzi gu ng'ompela, ngekwa Dafite nlanda wangu ne ngekwe Jerusalema nzi nkulu wandakazwishalulila.”

¹⁴Ngono Yahwe bakathama kuti Hadadi we ng'umba ye bushe gwe Edomu amukile Solomoni.

¹⁵Ngoti kwakatongoti Dafite anogwa ne Edomu, kukati Joabu nlauli we babhayani anobiganya bakabulawa mu ngwa, kabulaya balume bose mu Edomu.

¹⁶Joabu ne Baiziraela bose bakagala mu Edomu mimwedzi ili mitathatu, kuswikila babulaya balume bose mu Edomu.

¹⁷Koga Hadadi katizhila ku Egipiti ana bamwe balanda ba tate babe, be Baedomu atji ntjetjana.

¹⁸Bakadwa mu Midiyani bakanoti ku Parani. Bakatolana ne bamwe balume bakanoswika ku Egipiti, kuna Mambo Faro. Faro kapa Hadadi ng'umba, kampa gobe le zojiwa, kabuya kampa shango.

¹⁹Ngono Hadadi kashathisa Faro, ndizo Faro kashakila Hadadi nkadzana uwe nnung'una we nfumakadzi uwe Tahipenesi kanlobola.

²⁰Ngono nnung'una wa Tahipenesi kazwalila Hadadi mwana we tjilisana kantumila zina linoyi Genubathi. Nfumakadzi Tahipenesi kankudzila mu ng'umba ye bumambo ne bakololo ba Faro.

²¹Kwakati Hadadi ehwa ali mu Egipiti kuti Dafite wakatobela botate babe bakafa na Joabu nlauli we babhayani wakafa bo, Hadadi kadwa Faro kati, “Imani ndiyende, ndibgwilile ku shango ya kanyi kwedu.”

²²Koga Faro kadwa Hadadi kati, “Washetani mundili, tjathama kuti ushake bgwilila ku shango ya kanyi kwenyu?” Ngono kadabila Faro eti, “Akuna tjandasheta, koga imani ndiyende.”

²³Ndzimu ukathama kuti Rezoni nkololo wa Eliyada wakabe atizha kuna tetshi uwe Hadadezeri mambo we Zoba naiye abe tjita tja Solomoni.

²⁴Ngono kakubunganya goko le batoleli kabe ntungamili walo. Ikoku kwakashingikala shule Dafite asinokunda ngwa ya Hadadezeri. Rezoni ne bathu babe bakayenda ku Damasiko bakanogalako, bathu babe bakambiga mambo we Damasiko.

²⁵Wakabe tjita tje Iziraela mu butjilo gose gwa Solomoni eshima Baiziraela sekwakabe kuthama Hadedezeri ngono kabusa Aramu.

²⁶Mmwe we balanda ba Solomoni, Jeroboamu nkololo wa Nebati, N'ifureimu we ku Zereda, ali mwana we tjilikadzi yakabe iyi Zeruwa naiyebo kapandukila mambo.

²⁷Tjakathama kuti apandukile mambo ndiyetje; Solomoni wakabaka bundo linodang'wa Duluthulu, kazwina mikoba pakabe pakakolomoka mu nzi nkulu wa tate babe Dafite.

²⁸Nlume uwoyo Jeroboamu wakabe ali nyambi, ngono kukati Solomoni ebona kuti nzhuzha uwoyo unoshinga kwazo, kambiga nlingi we bashingi bose be ng'umba ya Josefa.

²⁹Kukati mu tjibaka itjetjo Jeroboamu ebhudila kuzhe kwe Jerusalema, kawang'wa nge nlebesambeli Ahija we N'shilo mu zila. Ipapo Ahija wakabe akaambala tjiambalo tjitshwa, bubili gwabo bakabe bali boga mu shango.

³⁰Ahija kabhata tjiambalo tjitshwa tjaakabe akaambala, katjipalulanya tjikabe mapenga ali gumi lina mabili (12).

³¹Nlebesambeli Ahija kadwa Jeroboamu kati, “Uzwitolegwe mapenga ali gumi, ngobe Yahwe Ndzimu we Iziraela bakati, ‘Bona, ndipejo ngopaladza mbuso mu luboko gwa Solomoni, ngono ndowokupa njudzi dzili gumi.

³²Koga ngekwe nlanda wangu Dafite nenge kwe nzi nkulu Jerusalema, nzi nkulu wandakashalula mu njudzi dzose dze Iziraela, Solomoni unowosala nge ludzi gu ng'ompela.

³³Ndowothama saikoku, ngobe Solomoni wakandilasha, ngono kanamata ndzimukadzi Ashitoti we Basidoni, na Khemoshi ndzimu we Moabu na Milikhomu ndzimu we Baamoni. Kasitobele zila dzangu, kuthama tjakalulwama mu mesho angu, kulondolodza milayo sekwa kwakabe kuthama tate babe Dafite.

³⁴Nenguba kwakajalo, anditowotola mbuso wose mu luboko gwa Solomoni, koga ngekwe nlanda wangu Dafite wandakashalula, wakabe elondolodza milayo yangu, ndowothama kuti abuse mu mazhuba wose e butjilo gugwe.

³⁵Koga ndowotola mbuso mu luboko gwe nkololo wa Solomoni, ndibe ndikupa njudzi dzili gumi.

³⁶Ndowopa nkololo wa Solomoni ludzi gu ng'ompela, kuti ndidwilidze tjizekugwana tje nlanda wangu Dafite mbeli kwangu, tjibusa mu Jerusalema, nzi nkulu wandakashalulila kubiga zina langu.

³⁷Ngono iwe ndowokutola ukabusa pamwe ne pamwe panowobe peyemugwa nge moyo uwo, unowobe mambo we Iziraela.

³⁸Ngono ha uhwilila zose zwandinokudwa, ubuya utobela zila dzangu, uthama kwakalulwama mu mesho angu, ulondolodza milayo yangu, sekwakathama Dafite nlanda wangu, ndowobe nawe, akubakila nzi una tjilumbi sekwa ndakabakila Dafite, ngono ndowokupa Iziraela.

³⁹Ngekwe tjibi tja Solomoni, ndowodziyidza zwizekugwana zwa Dafite, koga kusi nge kusingapele.’ ”

⁴⁰Ndizo Solomoni kagwisa bulaya Jeroboamu, ngono Jeroboamu katizhila kuna Mambo Shishaki we Egipiti, kagala mu Egipiti kudzina Solomoni efa.

⁴¹Mimwe mishingo ya Solomoni na zose zwaakathama ne butjenjedu gugwe, azwizokwagwa mu lukwalo gwe mishingo ya Solomoni kene?

⁴²Solomoni wakabusa Baiziraela bose makole ali makumi manna (40) ali mu Jerusalema.

⁴³Ngono Solomoni kafa, katobela botate babe, kabiganyiwa mu nzi nkulu wa tate babe Dafite. Kagagwa thaka mu bushe nge nkololo uwe Rehoboamu.