Read Kalanga 1 Bomambo 18 Bible Online

1 Bomambo 18 - Kalanga bible

1 Bomambo 18

¹Shule kwe tjibaka tjilefu, mu gole le butatu kuli bhamba, dama la Yahwe likazha kuna Elija liti, “Yenda unozwilakidza kuna Ahabu, ngono ndowonisa vula mu shango.”

²Ndizo Elija kayenda kunozwilakidza kuna Ahabu. Ipapo bhamba lakabe lakula kwazo mu Samariya.

³Ngono Ahabu kadana Obhadiya wakabe ali nlauli we ng'umba ye bushe. (Obhadiya wakabe etja Yahwe kwazo.

⁴Kwakati Jezebele ebulaya balebesambeli ba Yahwe, Obhadiya katola balebesambeli bali zana (100) kabathubukanya nge makupo mabili, kabasumbika mu makuwu mabili, guwu limwe ne limwe bali makumi mashanu (50), kabapila zojiwa ne vula ko.)

⁵Ahabu kadwa Obhadiya kati, “Ngati palame shango tiyende mu misenya yose ne mikuku yose, pamwe tingawanila mbizi ne moulo dzedu fulo, kuti tisitongodwa tifigwa nge zwimwe zwithuwo zwedu.”

⁶Ndizo bakazwikoba nge shango bubili gwabo kuipalama, Ahabu kayenda ega ku imwe mbizho, Obhadiya katolabo imwe mbizho ali egabo.

⁷Kwakati Obhadiya atji mu zila, kashangana na Elija, ngono Obhadiya kanziba, kathigama kakotamisa nsholo kambhuzwa kati, “Apa ndimwi tetshi wangu Elija kene?”

⁸Elija kan'dabila eti, “Ee ndimi. Yenda unobudza tetshi uwo mambo kuti ndi ipapa.”

⁹Obhadiya kabe eti, “Apa ndakatjinyani kwaungadza ukandilonga mu maboko a Mambo Ahabu kuti ndibulawe?

¹⁰Ndotuna na Yahwe, Ndzimu wenyu banotjila, akuna itjaba kene mbuso nakuto bali tetshi wangu kwabasakatongo mutumila bathu kunomushaka. Ngono ha bezha beti, ‘Amutoboneka,’ Mambo Ahabu kakumbila mbuso kene itjaba itjetjo kuti batune, kuti amuzowang'wa.

¹¹Apa ngwenu mondidwa muti, ‘Yenda unobudza tetshi uwo uti, “Bonani, Elija upano.” ’

¹²Apa ha kungati ndidwa pamuli Meya ya Yahwe ibe imutola imuyisa kwandisingazibe, ndibe ndizha ndimushaya ngono ndabudza Mambo Ahabu kuti mu ipapa, ebe ezha emushaya, unondibulaya. Zibani kuti imi nlanda wenyu, kudwa mu butjetjana gwangu ndotja Yahwe.

¹³Apa tetshi wangu amuzohwa tjandakathama mu tjibaka Jezebele tjaakabe ebulaya balebesambeli ba Yahwe kene? Ndakasumbika balebesambeli ba Yahwe bali zana mu makuhwu mabili, limwe ne limwe lina bali makumi mashanu (50), ndibuya ndibapa tjiwunga ne vula.

¹⁴Apa mungandidwa muti ndiyende ndinobudza tetshi wangu nditi, ‘Elija uipapa kene?’ Unowondibulaya!”

¹⁵Ngono Elija kadabila eti, “Ndotuna na Yahwe Masimbawose banotjila, bandimile mbeli kwabo, nasi tjoselele ndowonozwiyisa mbeli kwa Mambo Ahabu.”

¹⁶Ndizo Obhadiya kayenda kanobudza Ahabu, ngono Ahabu kamilika kanoshangana na Elija.

¹⁷Kukati Ahabu ebona Elija, kandwa kati, “Apa ndiwe dumbu, iwe unodziyidza Iziraela?”

¹⁸Ngono Elija kan'dabila eti, “Imi andizotongo dziyidza Iziraela, koga iwe ne nsha wa tate babo ndimwi badziyidzi be Iziraela, ngobe makalasha milayo ya Yahwe mukatobela ya bo Bhaale.

¹⁹Ndizo ngwenu tjituma bathu banodana Baiziraela bose banoshangana nami ku Dombo le Karimeli ne balebesambeli ba Bhaale bali zwiwulu zwili zwinna (400) ne bali zwiwulu zwili zwinna (400) be ndzimukadzi Ashera, banoja na Mambokadzi Jezebele pa tafuli.”

²⁰Ipapo Ahabu kadana Baiziraela bose ne balebesambeli ba Bhaale kunoshangana nabo ku Dombo le Karimeli.

²¹Ngono Elija kasedzela ku Baiziraela kabadwa kati, “Apa kowodza kukabe lini mudzungayila muli pakati kwe mikumbulo mibili kene? Ha Yahwe bali Ndzimu, mubatobele, koga ha Ndzimu ali Bhaale, muntobele!” Koga Baiziraela bakashaya dama labangadabila Elija ndilo.

²²Ndizo Elija kadwa Baiziraela kati, “Ndimi ndoga nlebesambeli wa Yahwe wakasala, koga balebesambeli ba Bhaale ba mazana ali manna ana makumi mashanu (450).

²³Ndokumbila kuti tipiwe mikono mibili, ibo bazwishalulile ng'ompela baubhaye bautjekelele nge mitezho baubige pezhugwi kwe hwuni, koga basitongo ulonga moto. Ngono imi ndowobhaya mmwe awutjekelela awubiga pezhugwi kwe hwuni, ngono anditowoulonga moto.

²⁴Ngono mudwe balebesambeli ba Bhaale batembezele ndzimu wabo, imi ndowotembezela Yahwe, ngono Ndzimu unowodabila nge kutuma moto, ndiwo Ndzimu.” Bathu bose bakadabila beti, “Waleba zubuyanana.”

²⁵Ndizo Elija kadwa balebesambeli ba Bhaale kati, “Muzwishalulile nkono nng'ompela muubhaye imwi kutanga, ngoti mubanjinji, mube mudana zina le ndzimu wenyu, koga musitongo longa moto muuli.”

²⁶Balebesambeli ba Bhaale bakatola nkono wabapiwa, bakaubhaya bakautjekelela bakadana zina la Bhaale kudwa mangwanana kunoti masikati beti, “Imwi Bhaale, mutidabile!” Koga kukasibe ne hwi, kene dabilo ing'ompela. Ngono bakazana bepoteleka tjibeso tjinopisigwa zwibhayilo tjabakabe bathama. Koga kukasibe ne dabilo.

²⁷Kukati kwabe masikati makulu, Elija katangisa kubadadila eti, “Tembezelani nge mahwi apezhugwi, ngoti ndzimu. Pamwe utjaalakana zwimwe kene kuna kwaayenda. Pamwe watola gwendo, pamwe akayizelazwe, makafanila kuumusa.”

²⁸Bakatembezela nge mahwi apezhugwi, bakazwitjeka bezwipalulanya, kuyendidzana ne tjilenje tjabo, kudzina malopa ewunga edwa mubali.

²⁹Ngono kukati kwabe masikati e mateuko, bakaleba ngodzadzanya beleba dama yeli beletja, kudzina kuswika tjibaka tjekuyisa tjibhayilo tje madekwana. Koga kusina hwi linohwika kene dabilo yabanowana.

³⁰Ndizo Elija kadwa bathu bose kati, “Sedzelani kundili,” ngono bakasedzela bose bakampoteleka. Elija katangisa ngomusa tjibeso tjinopisigwa zwibhayilo tja Yahwe tjakabe tjaligigwa pasi.

³¹Ipapo Elija katola mabgwe ali gumi lina mabili, kuyenda nge njudzi dze bakololo ba Jakubo, wakazhigwa nge dama la Yahwe lin'dwa liti, “Zina lilo lowodang'wa Iziraela.”

³²Kabakila Yahwe tjibeso tjinopisigwa zwibhayilo nge mabgwe iyawo, kathama ngolo ingabhata vula ingabe tjilizanyo tje dzilitha dzili gumi lina dzili nna (14) kutjipoteleka.

³³Kayilikanya hwuni pezhugwi kwe tjibeso tjinopisigwa zwibhayilo, katjekelela nkono nge mitezho kaibiga pezhugwi kwe hwuni. Kadwa bathu kati, “Zhadzani hali dzili nna nge vula muidile mu tjibhayilo tjinopisiwa ne mu hwuni.”

³⁴Kabadwa kakale kati, “Thamani kakale gwe bubili.” Bakathama gwe bubili. Kabadwa kakale kati, “Thamani kakale gwe butatu.” Bakathama kakale gwe butatu.

³⁵Vula ikazhala ngolo ikawunga kupoteleka tjibeso tjinopisigwa zwibhayilo.

³⁶Kukati kuswika tjibaka tje kupisa tjibhayilo, nlebesambeli Elija kasedzela pa tjibeso tjinopisigwa zwibhayilo katembezela eti, “Imwi Yahwe, Ndzimu wa Abhurahama na Isaki na Jakubo, thamani kuti kuzibgwe nasi mu zhuba ileli kuti mu Ndzimu mu Iziraela ne kuti kuzibgwe kuti ndi nlanda wenyu ndothama zwithu zose izwezwi nge ndaulo yenyu.

³⁷Mundidabile, imwi Yahwe, mundidabile, kuti ndizo bathu ibaba bazibe kuti imwe Yahwe mu Ndzimu, mushandulile moyo ye bathu ibaba kumuli.”

³⁸Ndizo Yahwe bakadelusa moto ukapisa tjibhayilo ne hwuni ne mabgwe, ukawomesa pasi ubuya upkhwisa vula mu ngolo.

³⁹Kukati bathu bose bebona tjashingikala, bakawila pasi bakakotamisa misholo bemimila beti, “Yahwe, ba Ndzimu dumbu, Yahwe ndibo Ndzimu!”

⁴⁰Elija kadwa bathu kati, “Bhatani balebesambeli ba Bhaale, kushaye ne nng'ompela wapudzumuka.” Bathu bakababhata bose, Elija kabe eti bayisiwe ku Nkuku we Kishoni, banobulayigwa ko.

⁴¹Ngono Elija kadwa Mambo Ahabu kati, “Yendani munoja mung'we, ngoti ndohwa nsindo, kwaswika vula isishoma.”

⁴²Ipapo kukati Ahabu etathila kunoja ebuya eng'wa. Elija katatha Dombo le Karimeli kanogala pasi, akakotamisa nsholo uwe uli pakati kwe makumbo awe.

⁴³Ngono kadwa nlanda uwe kati, “Yenda unolinga ku gungwa.” Kayenda kanolinga kanshaka kazha eti, “Akuna tjandabona.” Elija kadwa nlanda katendeka eti, “Bgwilila unolinga.”

⁴⁴Ngono nlanda kati ebuya gwe butendeka kadwa Elija kati, “Bonani, kuna gojana lingapa tjiazha tje nthu linomilika lidwa mu gungwa.” Elija kadwa nlanda uwe kati, “Yenda unodwa Mambo Ahabu alibilidze alulwamise koloyi iye ayende, ngoti vula ingadwa indziba.”

⁴⁵Tjinyolotjo makole kashanduka kabe matema ne phepo ikawuwudza, kukana vula isishoma. Ngono Ahabu kangina mu koloyi iye kayenda ku Jezirele.

⁴⁶Simba la Yahwe likazha muna Elija kazwisunga thunji nge zwiambalo zwizwe, kalabuka ali mbeli kwa Ahabu kudzina enongina ku Jezirele.