Read Kalanga 1 Bomambo 19 Bible Online

1 Bomambo 19 - Kalanga bible

1 Bomambo 19

¹Ahabu kabudza nkadzi uwe Jezebele tjimwe ne tjimwe tjakathamwa ndi Elija, nenge sekwa akabulaya balebesambeli ba Bhaale nge thumo.

²Ipapo Jezebele katuma ntumwa kuna Elija kunon'dwa eti, “Dzene midzimu ingandiloba ipaphulula, ha kungati mangwana nge tjibaka itjetji abe ndisakubulayabo sekwa wakabulaya balebesambeli.”

³Elija katja, kamilika katizhila ku Bheerisheba umu Juda ne nlanda uwe. Kasiya nlanda uwe ko.

⁴Elija wakayenda mu tjilambanyika zhuba lose, kaswika pa nsu kagala mu ntutshi wawo, katembezela eti, “Ngwenu kwatjilizana, Yahwe, dusani butjilo gwangu ngoti anditoyita pana botate bangu!”

⁵Kalala pasi mu ntutshi we nti, ngono tjinyolotjo ntumwa we Ndzimu ukankutha ukandwa ukati, “Muka uje.”

⁶Ngono kati elinga kabona tjiwunga tjakagotjiwa pa masimbe ne hajana ye vula ku misholo iye. Ngono katola tjiwunga kaja, kang'wa vula, kayizela kakale.

⁷Ngono ntumwa wa Yahwe kazha kammusa gwe bubili kandwa kati, “Muka uje, ngoti gwendo gowokukulila.”

⁸Elija kamuka kaja kang'wa, zojiwa zwikampa simba kayenda siku ne sikati mazhuba ali makumi manna (40) kunoti ku Horebu, Dombo le Ndzimu.

⁹Ipapo kangina mu guwu, kagala mukati busiku gose. Ngono bonani, dama likadwa kuna Yahwe likambhuzwa liti, “Elija, unothamani ipapa?”

¹⁰Kashandula eti, “Ndakagwa fupa ngekwa Yahwe, Ndzimu Masimbawose, ngoti bana be Iziraela bakabe balasha tjidumano tjenyu, bakapkhwanya zwibeso zwenyu zwe zwibhayilo bebuya bebulaya balebesambeli benyu bose nge thumo. Ngono ndimi ndoga ndakasala pafa, ngono banoshaka kundibulaya!”

¹¹Yahwe bakadwa Elija bakati, “Bhuda unoma pezhugwi kwe dombo mbeli kwangu.” Ipapo Yahwe bakapinda, ngono phepo isishoma ikazha nge masimba ikatjakanyula shongwe mbeli kwabo, koga Yahwe bakabe basi mu phepo, ngono shule kwe phepo, kukabe ne kutengenyeka kwe shango, koga Yahwe bakabe basi mu kutengenyeka kwe shango.

¹²Shule kwe kutengenyeka kwe shango, kukabe moto, koga Yahwe bakabe basi mu moto. Ngono shule kwe moto kukabe hwi dukununu lakadzikama.

¹³Ngono Elija kati ehwa hwi kazwizwimba buso nge hazu iye kabhuda kanoma pa nkoba we guwu. Ipapo hwi likazha kunli liti, “Elija, unothamani ipapa?”

¹⁴Ngono kadabila eti, “Ndakagwa fupa ngekwa Yahwe, Ndzimu Masimbawose ngoti bana be Iziraela bakalasha tjidumano tjenyu, bakapkhwanya zwibeso zwenyu bebuya bebulaya balebesambeli benyu nge thumo. Ndimi ndoga ndakasala pafa, ngono banoshaka kundibulaya.”

¹⁵Yahwe bakandwa bakati, “Yenda, shandukila ku tjilambanyika tje Damasiko, unowoti uswikako ukazhodza Hazaele kube mambo we Aramu.

¹⁶Ube uzhodza Jehu nkololo wa Nimishi kube mambo we Iziraela. Kakale uzhodze Elisha nkololo wa Shafati we Abelimehola kube nlebesambeli mu bumo gugo.

¹⁷Ngono unowopudzumuka mu thumo la Hazaele unowobulawa ndi Jehu, unowopudzumuka mu thumo la Jehu Elisha unowombulaya.

¹⁸Nenguba kwakajalo ndowosiya bathu bali zwiwulu zwili kutendeka 7 000 mu Iziraela betjila basakatongo thigamila kene kuli kuputa Bhaale.”

¹⁹Ndizo Elija kabhuda ipapo kanowana Elisha nkololo wa Shafati elima. Kwakabe kuna zwipani zwili gumi lina tjing'ompela (11) mbeli kukwe, Elisha iye elima nge tje bugumi lina zwibili (12). Elija kapinda pana Elisha kambula tjiambalo tjitje katjiambadza Elisha.

²⁰Ngono Elisha kasiya ng'ombe kalabuka shule kwa Elija ngono kandwa kati, “Imani ndinowoneka mme na tate, ndizo ndikomutobela.” Elija kanshandula eti, “Shandukazo, ndabe ndakuthamani?”

²¹Ndizo Elisha kasiya Elija kashandukila shule. Kaswika ebhaya mangabe ebe etola majokwe ebesa moto ndiwo, ebe ebhika nyama epa bathu beja. Ndizo ebe emilika etobela Elija kunoshinga ali mbhatshi uwe.