Read Kalanga 1 Bomambo 21 Bible Online

1 Bomambo 21 - Kalanga bible

1 Bomambo 21

¹Kwakabe kuna nnda we mizhambi we nlume wakabe eyi Nabhothi pejo ne ng'umba ye bumambo ya Mambo Ahabu.

²Limwe zhuba Ahabu kadwa Nabhothi kati, “Undipe nnda uwo we mizhambi ndilime milibo muuli, ngoti upejo ne ng'umba yangu. Ndowokupa wakanaka kuupinda mu bumo gwawo, kene ha ubona kwakakululwamila kukulipa nge mari ndowokulipa themba yakaulizana.”

³Koga Nabhothi kashandula Ahabu eti, “Yahwe abatoduma kuti ndingakupa thaka ya bobatategulu bangu!”

⁴Ngono Ahabu kayenda kanyi akagwadzamoyo moyo akadzipiwa nge shungu, nge tjaadwiwa ndi Nabhothi we Njezerele, eti aangampe thaka ya bobatategulu babe. Kanoyizela pa bulawo gugwe akalinga ku guma, alamba ja zojiwa.

⁵Koga nkadzi uwe Jezebele kazha kunli kambhuzwa kati, “Ini makapuna moyo, kwamadzina mukasije zojiwa kene?”

⁶Ngono kadabila nkadzi uwe eti, “Huti ndalebeleka na Nabhothi kuti anditengesele nnda uwe we mizhambi nge mari, kene ha eshaka mmwe nnda, ndimpe mmwe nnda we mizhambi mu bumo gwawo, ngono kandidabila eti aangandipe iwo.”

⁷Nkadzi uwe Jezebele kandwa kati, “Apa ndiko sekwa munobusa Iziraela kene? Mukani, muje zojiwa, mushaladuke. Imi ndowomupa nnda we mizhambi wa Nabhothi we Njezerele.”

⁸Ndizo nkadzi kakwala hwalo nge zina la Ahabu kadzitshambisa nge tjilakidzo tje nlume uwe, kadzitumila ku hadzasha ne bakulu be nzi banogala na Nabhothi mu nzi uwe nkulu.

⁹Ngono kakwala mu hwalo eti, “Shalulani zhuba le kuzwinyima zojiwa, mukubunganye bathu, muzhe mugadze Nabhothi ku magalo ambeli.

¹⁰Mugadze kulingisana naye bathu babili be moyo mikukutu, ngono bantilike nlandu beti, ‘Wakalonga bhiso mu Ndzimu ne muna mambo.’ Mube mun'dusila kuzhe kwe nzi kunombulaya ngonkhikhithidza nge mabgwe.”

¹¹Hadzasha ne bakulu be nzi we Jezerele bakathama sekwa badwiwa ndi Jezebele.

¹²Bakashalula zhuba le kuzwinyima zojiwa, bakakubunganya bathu, Nabhothi bakan'gadza ku magalo ambeli kwe gubungano.

¹³Bathu babili be moyo mikukutu bakangina bakagala kulingisana na Nabhothi, bakantilika nlandu beti, “Nabhothi wakalonga bhiso mu Ndzimu ne muna mambo.” Kabe etolegwa kuzhe kwe nzi kunobulawa ngokhikhithidziwa nge mabgwe.

¹⁴Ndizo bakatuma batumwa kuna Jezebele beti, “Nabhothi wakakhikhithidziwa nge mabgwe, kafa.”

¹⁵Kwakati tjinyolotjo Jezebele ehwa kuti Nabhothi wakakhikhithidziwa nge mabgwe kafa, kadwa Ahabu kati, “Tjimilikani munozwitolegwa nnda wa Nabhothi we Jezerele wakalamba kumutengesela, ngoti wakafa.”

¹⁶Tjinyolotjo Ahabu kamilika kanozwitolegwa nnda wa Nabhothi.

¹⁷Dama la Yahwe likazha kuna Elija we N'tishibhe liti,

¹⁸Milika unoshanganidza Ahabu mambo we Iziraela mu Samariya. Unowon'wana mu nnda we mizhambi wa Nabhothi, kwaanozwitolegwa iwo.

¹⁹Undwe uti imi Yahwe ati kunli, “Apa wabulaya nthu ubuya utola thundu iye kakale kene? Undwe kakale uti, ‘Pakanazwigwa malopa a Nabhothi ne mbgwa ne awo dzowoanazwilabo po!’ ”

²⁰Kukati Ahabu ebona Elija kambhuzwa eti, “Apa wandiwana iwe tjita tjangu kene?” Elija kanshandula eti, “Ee, ndakuwana, ngobe wazwitengesa mu kuthama mbipo mbeli kwa Yahwe.

²¹Bona, Yahwe bakati, ‘Ndowozhisa mbatsha mu kuli, ndowokulobesa tjose, ndowolobesa balume be nsha wa Ahabu bose mu Iziraela, bakasungwa kene bakasununguka.

²²Nsha uwo unowonga wa Jeroboamu nkololo wa Nebhati ne wa Bhaasha nkololo wa Ahija, ngobe wandilonga bushongola ngothamisa Iziraela tjibi.’

²³Ngono ngekwa Jezebele, Yahwe bakati mbgwa dzowoja itumbu tjitje mukati kwe nzi nkulu Jezirele.

²⁴Mmwe ne mmwe we nsha wa Ahabu wafila mu nzi nkulu unowojiwa nge mbgwa. Ngono mmwe ne mmwe we nsha uwe wafila mu shango unowojiwa nge magola.”

²⁵(Akuna wakatongo zwiseenya mu kuthama mbipo mbeli kwa Yahwe sa Ahabu, sekwa akafuligwa nge nkadzi uwe Jezebele.

²⁶Wakathama kunoshimisa ngonamata zwifano se Baamoni bakatatigwa kuzhe kwe shango ye bana be Iziraeala ndi Yahwe.)

²⁷Kukati Ahabu ehwa matama iyawo, kazwipalulila zwiambalo, kaambala jila le saka. Kalamba zojiwa, kalala akafuka jila le saka, edzungayila akadzimila.

²⁸Ngono dama la Yahwe likazha kuna Elija we N'tishibhe liti,

²⁹“Apa wabona sekwa Ahabu azwiyisa pasi ndiko mbeli kwangu kene? Ngoti wazwiyisa pasi mbeli kwangu, anditjowozhisa golomodzo mu misi ye butjilo gugwe. Koga ndowozhisa golomodzo mu nsha uwe mu misi ye butjilo gwe nkololo uwe.”