Read Kalanga 1 Bomambo 3 Bible Online

1 Bomambo 3 - Kalanga bible

1 Bomambo 3

¹Solomoni kashingidzana na Faro mambo we Egipiti ngo lobola nkololokadzi uwe. Wakan'gadza mu nzi nkulu wa Dafite kudzina epedza baka ng'umba iye ne ng'umba ya Yahwe ne luswingo gwakabakilila Jerusalema.

²Bathu bakabe bepisila zwibhayilo mu magalo akatuthumala, ngobe kwakabe kusathu kukabakwa ng'umba kukudza zina la Yahwe.

³Solomoni wakabe eda Yahwe, etobela milayo ya tate babe Dafite, koga naiyebo wakabe episila zwibhayilo ne motsha unonuhwa zwinozipa mu magalo akatuthumala.

⁴Mambo kayenda ku Gibiyoni kanopisila zwibhayilo ko, ngobe gwakabe guli igo bugalo gwakatuthumala gwakabe gutolegwa pezhugwi kwazo. Solomoni wakabe egala edusila Yahwe zwibhayilo zwinopisiwa zwili tjiwulu (1 000) mu tjibeso itjetjo.

⁵Kukati Solomoni ali ku Gibiyoni Yahwe bakazwilakidza kunli nge mawoloto kuli busiku, ngono Ndzimu ukandwa ukati, “Kumbila tjaunoda kuti ndikupe itjo.”

⁶Ngono Solomoni kadabila eti, “Makalakidza ludo bukulu kakale gusingazunguzike muna tate bangu nlanda wenyu Dafite, ngobe bakabe begalikabgwe mu muli nge ndulamo, nenge moyo wakadzikama mu muli. Ngono makabalondolodzela ludo igogu bukulu kakale gusingazunguzike, mukabapa nkololo kubagala thaka nasi mu tjigalo tjabo tje bushe.

⁷Ngono ngwenu, imwi Yahwe Ndzimu wangu, makathama imi nlanda wenyu abe mambo agala thaka tate bangu Dafite, nenguba ndili ntjetjana, ndili mwana ntukununu, ndisathu aziba kunodwiwa ne kunoyendiwa.

⁸Nlanda wenyu upakati kwe bathu benyu bamakashalula, itjaba tjikulu, tjina bathu banjinji basingabalike.

⁹Ndizo ngwenu ipani nlanda wenyu nkumbulo unohwisisa kubusa bathu benyu, kuti ndithubukanye ndulamo ne mbipo, kusakajalo ndiani ungatubula kubusa itjaba itjetji tjenyu tjikulu zwingapa kene?”

¹⁰Tetshi bakashathila tjakumbigwa ndi Solomoni.

¹¹Ngono Ndzimu ukadwa Solomoni ukati, “Ngobe wakumbila itjetji, auzozwikumbilila kupaphidzigwa mazhuba e bupenyu kene fumwa, kene lufu gwe zwita zwizo, koga wazwikumbilila hwisiso ne kusumikilisa nge ndulamo,

¹²bona, ngwenu ndowothama kuyendidzana ne dama lilo. Ndowokupa butjenjedu ne kuhwisisa, kusina mmwe nthu wakatongofanana nawe kene unowozwagwa unonga iwe.

¹³Kakale ndowokupa tjimwe tjausakumbila. Ndowokupa fumwa ne gudzo mu butjilo gugo gose kupinda bomambo bamwe.

¹⁴Ngono ha ungatobela zila dzangu, ukalondolodza milayo yangu, sekwakabe kuyenda tate babo, ndowokupaphidzila mazhuba e bupenyu.”

¹⁵Ngono Solomoni kamuka mu hwope kawana abe ewolota. Ipapo kazha mu Jerusalema, kama mbeli kwe Bhokisi le Tjidumano tja Yahwe, kayisa zwibhayilo zwinopisiwa ne zwipo zwe mbakisano. Kudwa ipapo kathamila balanda babe bose nzano.

¹⁶Ndizo kukazha fukula mbili kuna mambo, dzikama mbeli kukwe,

¹⁷ngono mmwe wabo kati kunli, “Tetshi wangu, togala mu ng'umba ing'ompela imi ne nkadzi iwoyu, ngono ndakatshibama ndinaye mu ng'umba.

¹⁸Kukati mu zhuba le butatu shule kwe ndisinowana mwana, nkadzi iwoyu na iyebo katshibama, ngono takabe tili babili koga, kusina mmwe watakabe tinaye mu ng'umba.

¹⁹Ngono busiku mwana we nkadzi iwoyu kafa ngobe mmeyabe bakaizela pezhugwi kukwe.

²⁰Kukati pakati kwe busiku she wangu, nlandakadzi wenyu akayizela, nkadzi iwoyu kamuka, katola mwanangu pawunde nami, kabe enkushika panli, etola mwana uwe wakafa enkushika pa ifuba tjangu.

²¹Kukati ndimuka mangwanana nditi ndomwisa mwana, awana akafa. Koga ndakati ndinlingisisa awana asi iye mwanangu wandakazwala.”

²²Koga iwoyu nkadzi mmwe kati, “Akuzojalo! Mwana mpenyu nge wangu, wakafa nge uwo!” Nkadzi watanga bika ndebo kabe eti, “Akuzojalo! Mwana wakafa nge uwo, mpenyu nge wangu!” Ndizo bakakangazhana mbeli kwa mambo.

²³Ipapo Mambo Solomoni kabe eti, “Mmwe unoti, ‘Mwana unotjila nge wangu, wakafa nge uwo,’ ngono mmwe unoti, ‘Akuzojalo, mwana wakafa nge uwo, unotjila nge wangu.’ ”

²⁴Ndizo mambo kabe eti, “Mundipe bukanu.” Bukanu gukazhisiwa kuna mambo.

²⁵Mambo kabe eti, “Palulani mwana iwoyo mpenyu na pakati, ngono mupe mmwe nkadzi limwe gwamu, mmwe mumpe limwe gwamu.”

²⁶Ipapo nkadzi we mwana wakabe etjila, nge moyo we ludo mu mwana uwe kadwa mambo kati, “Tetshi wangu, musibulaye mwana, mumpe iye ali mpenyu.” Koga uwoyu mmwe kabe eti, “Aatowobe wangu kene uwo, ngaapalugwe na pakati.”

²⁷Ipapo Mambo Solomoni kashandula eti, “Musibulaye mwana, ipani nkadzi wabika ndebo kutanga, mwana ali mpenyu. Ndiye mme be mwana.”

²⁸Ngono kukati Baiziraela bose behwa mambo sekwa apedza ndebo ndiko, bakantolela pezhugwi, ngobe babona kuti butjenjedu gwe Ndzimu gwakabe guli munli, kuthama ndulamo.