Read Kalanga 1 Bomambo 4 Bible Online

1 Bomambo 4 - Kalanga bible

1 Bomambo 4

¹Solomoni wakabe ali mambo we Iziraela yose.

²Aba ndibo bakabe bali hadzasha dzidze: Azariya nkololo wa Zadoki wakabe ali mpirisiti.

³Elihorefu na Ahija bakololo ba Shisha bakabe bali bakwalili. Jehoshafati nkololo wa Ahiludi wakabe ali nkwalili.

⁴Bhenaya nkololo wa Jehoyada wakabe ali nlauli we babhayani. Zadoki na Abiathari bali bapirisiti.

⁵Azariya nkololo wa Nathani wakabe ali ntungamili we hadzasha dze ntuthu. Zabudi nkololo wa Nathani wakabe ali mpirisiti kakale ali nkumbuludzi wa mambo.

⁶Ahishari wakabe ali nlauli we bashingi mu ng'umba ya mambo. Adoniramu nkololo wa Abida wakabe ali ntjengeti we bashingi nge maboko.

⁷Solomoni wakabe ana hadzasha dze mituthu dzili gumi lina mbili (12) mu Iziraela yose. Bakabe beyisila mambo ne be nsha uwe zojiwa kudwa ku mituthu yabo. Mmwe ne mmwe eyisa zojiwa mwedzi wose ung'ompela mu gole.

⁸Mazina e hadzasha ne e mituthu yabakabe bali batungamili muili awa: Bhenehuri mu shango ye matombo ye Ifureimi.

⁹Bhenidekeri mu Makazi, Shalibimi, Bhetishemeshi ne Elonibhetihanani.

¹⁰Bhenehesede mu Arubhoti ne Soko ne mituthu yose ye Hefa.

¹¹Bheneabinadabe mu ntuthu wose we Nafatidori wakabe akalobola Tafati nkololokadzi wa Solomoni.

¹²Bhaana nkololo wa Ahiludi mu Taanaki ne Megido ne Bhetisheani imu wunde ne Zarethani pasi kwe Jezirele ne kudwa mu Bhetisheani kunoti ku Abelimehola, kunoswika seli kwe Jokimeamu.

¹³Bhenegebheri, mu Ramotigiliyadi ne mizana imu Giliyadi ipasi kwe misha ya Jairi nkololo wa Manase mu ntuthu we Arigobi umu Bhashani kuli mizi mikulu ili makumi ali matathatu (60) yakabakiligwa nge maswingo ina mazhalilo e nkoba e phangula.

¹⁴Ahinadabe nkololo wa Ido mu Mahanayimi.

¹⁵Ahimaazi mu Nafutali wakabe wakalobola mmwe nkololokadzi wa Solomoni unoyi Bhasemati.

¹⁶Bhaana nkololo wa Hushayi mu Asheri ne Bheyaloti.

¹⁷Johushafati nkololo wa Paruwa mu Isakari.

¹⁸Shimeyi nkololo wa Ela mu Bhenjamini.

¹⁹Geberi nkololo wa Uri mu ntuthu we Giliyadi wakabe ubusiwa ndi Mambo Sihoni we Baamoni na Mambo Ogi we Bhashani. Ngono kwakabe kuna hadzasha ing'ompela mu ntuthu wose we Juda.

²⁰Itjaba tje Juda ne Iziraela tjakabe tjili tjinjinji se nsetje upa gungwa, beja beng'wa bakashatha.

²¹Solomoni wakabe ebusa mibuso yose kudwa ku Gwizi gwe Yufuratesi kunoti ku shango ye Bafilisitiya, kunoti ku n'gathu we Egipiti. Bedusa makhetho bempa, bali pasi kukwe butjilo gugwe gose.

²²Zojiwa zwakabe zwakalingisana Solomoni, dzakabe dzili dzilithara dzili zwiwulu zwili zwishano (5 000) dze bgwisa gwe tjiwunga ne kilolithara dzili zwiwulu zwili gumi (10 000) dze bgwisa gwe mathunde nge zhuba.

²³Ne ng'ombe dzakakodziwa dzili gumi (10) ne dzili makumi mabili (20) dzakafudziwa ku mafulo ne pkhwizi dzili zana (100). Pezhugwi kwa izwezo, kuli ngolomu ne phala ne ngama ne hwuku dzakakodziwa.

²⁴Ngoti wakabe ebusa ntuthu wose uku golombedzo kwe Gwizi gwe Yufuratesi, kudwa mu Tifisa kunoti ku Gaza. Bomambo bose be ku golombedzo kwe Gwizi gwe Yufuratesi bakabe bali pasi kukwe. Kakale ebusa nge mbakiso ne mu shango dzaakabe egathudzana nadzo kumpoteleka.

²⁵Mu butjilo gwa Solomoni mmwe ne mmwe mu Juda ne Iziraela wakabe aligele akasununguka, kudwa ku Dani ne kunoti ku Bheresheba, bakalonga misholo mu mitutshi ye mizhambi yabo ne mipaya yabo.

²⁶Solomoni wakabe ana matanga e mbizi dze koloyi dze ngwa ali makumi manna (40) ne bataswi be mbizi bali zwiwulu zwili gumi lina kubili (12 000).

²⁷Hadzasha idzedzo dzakabe dzizhisila Solomoni na bose bakabe beja mu ng'umba iye ye bushe zojiwa, mmwe ne mmwe kang'ompela mu mwedzi, basingaletje tjimwe tjikasheteka.

²⁸Hadzasha imwe ne imwe yakabe izhisa gobe le mathunde e bhali ne mashanga zwinojiwa nge mbizi, kuyendidzana sekwa Mambo Solomoni akabe eshaka ndiko.

²⁹Ndzimu wakapa Solomoni butjenjedu ne nkumbulo uzhele kwakawanda kupinda nsetje we gungwa.

³⁰Ndizo butjenjedu gwa Solomoni gukapinda gwe bathu bose be ku bhezhuba ne batjenjedu bose be Egipiti.

³¹Ngoti wakabe akatjenjela kupinda bathu bose, akatjenjela kupinda Ethani we Nzera na Hemani na Kalikoli na Darida bakololo ba Maholi. Ngono tjilumbi tjitje tjikazibgwa mu tjaba dzose kupoteleka.

³²Wakakwala makungulupeswa ali zwiwulu zwili zwitatu (3 000) ne njimbo dzidze dzili tjiwulu tjina mido ili mishanu (1 005).

³³Wakaleba ngekwe miti ne matenjana kudwa mu miti ye sida ye Lebanoni kudelukila pasi ku mitinyana ye hisopo inomela mu makuma. Kaleba ngekwe phuka ne nyuni ne zwinosoba pasi nenge hwobe.

³⁴Kukazha bathu banodwa mu njudzi dzose kuwohwa ngekwe butjenjedu gwa Solomoni ne kudwa muna bomambo be shango yose, bakahwa ngekwe butjenjedu gugwe.