Read Kalanga 1 Bomambo 5 Bible Online

1 Bomambo 5 - Kalanga bible

1 Bomambo 5

¹Kukati Mambo Hiramu we Tire ahwa kuti Solomoni wakazhodziwa kube mambo mu bumo gwa tate babe Dafite, katumila balanda babe kuna Solomoni ngobe wakabe agala ehwanana na Dafite.

²Ngono Solomoni katuma bathu kuna Hiramu kunon'dwa beti,

³“Unoziba kuti tate bangu Dafite abazotubula kubakila zina la Yahwe Ndzimu wabo ng'umba ngobe zwita zwabo zwakabe zwakabakomba nge ngwa, kudzina Yahwe bethama kuti bazwikunde.

⁴Koga ngwenu Yahwe Ndzimu wangu bakandipa mbakiso mu migathu yangu mbizho dzose, akutjina nyanyayidzi kene tjimwe tjakabipa.

⁵Ndizo ngwenu, ndakazwimisila kubakila ng'umba zina la Yahwe Ndzimu wangu, Yahwe sekwa bakadwa tate bangu Dafite bakati, ‘Nkololo uwo, wandinowogadza pa tjigalo tjitjo tje bushe mu bumo gugo, unowobakila zina langu ng'umba.’

⁶Ndizo ngwenu, tjidwa balanda babo banditemele mapango e sida ye Lebanoni, balanda bangu banowoshanganyila nshingo ne babo, imi ndowolipa balanda babo ndipo yaunowobe wandibigila iyo. Ngoti unoziba kuti mutili akuna una luzibo gwe kutema mapango se Basidoni.”

⁷Kukati Hiramu ehwa matama a Solomoni, kashatha kwazo kabuya kati, “Nasi Yahwe ngabakudziwe, ibo bakapa Dafite nkololo wakatjenjela kun'gala thaka kubusa itjaba itjetji tjikulu kulu!”

⁸Hiramu kabgwiliza shandulo kuna Solomoni eti, “Matama awanditumila bathu ndaahwa, ngono ndowothama njemulo dzidzo dzose ngekwe mapango e sida ne misipuri.

⁹Balanda bangu banowo asenga kudwa ku Lebanoni bakaayisa ku gungwa. Ngono ndoasungilikanya kabe thala kayenda akaangama mu gungwa kunoti pa unowobe watendeka kuti abigwepo. Ndowodwa balanda bangu kuti baapalalanye ikoko, ube uaamutjila. Iwe undibhatshe ngopa be ng'umba yangu zojiwa.”

¹⁰Ndizo Hiramu kapa Solomoni mapango wose e sida ne e misipuri aakabe akumbila.

¹¹Solomoni kapa Hiramu masaka e koroni ali zwiwulu zwili makumi mabili (20 000) ne zwikuyu zwe mafuta e ntoba zwili zwiwulu zwili makumi mabili (20 000) gole ne gole.

¹²Ngono Yahwe bakapa Solomoni butjenjedu sekwa bakan'gadza bgwe, kwakabe kuna mbakiso pakati kwa Hiramu na Solomoni, bubili gwabo bakathama tjidumano tje kushingidzana.

¹³Mambo Solomoni kashalula bashingi bali zwiwulu zwili makumi matatu (30 000) mu Iziraela yose.

¹⁴Kabatumila ku Lebanoni belabadzana bakathubukana kuli makupo matatu, e bali zwiwulu zwili gumi (10 000) zwe balume mu gupo limwe ne limwe, bakabe betola mwedzi uli ng'ompela bali ku Lebanoni bezha bewobe kanyi kwe mimwedzi mibili. Ntungamili we bashingi wakabe ali Adoniramu.

¹⁵Solomoni naiyebo wakabe ana basengi be mabgwe bali zwiwulu zwili makumi ali kutendeka (70 000) ne banobezha mabgwe bali zwiwulu zwili makumi ali zhanakadzi (80 000) mu shango ye matombo.

¹⁶Ngono kuzhe kwa ibaba wakabe ana balume be batungamili bali zwiwulu zwitatu zwina mazana ali matatu (3 300) bakabe bakatungamila bathu ibaba ne kubona kuti nshingo unoyenda.

¹⁷Nge ndaulo ya Mambo Solomoni, bakatsha mabgwe makulu e ntengo upezhugwi kuwala thiwa dze ng'umba ndiwo.

¹⁸Babaki ba Solomoni ne babaki ba Hiramu ne balume be Gebali, bakabezha mabgwe, bakalulwamisa mapango ne mabgwe kubaka Ng'umba ye Ndzimu.