Read Kalanga 1 Bomambo 8 Bible Online

1 Bomambo 8 - Kalanga bible

1 Bomambo 8

¹Ipapo Mambo Solomoni kadana sholotjena dze Iziraela, misholo yose ye njudzi na boshe be misha ye Iziraela kuti bazhe kunli ku Jerusalema kuti batole Bhokisi le Tjidumano tja Yahwe mu Ziyoni nzi nkulu wa Dafite, balizhise ku Ng'umba ya Yahwe.

²Bathu bose bakakubunganila kuna Mambo Solomoni mu nsi we Nzano we Mishasha mu mwedzi we kutendeka we Ethanimu.

³Sholotjena dzose dze Iziraela dzikazha, ngono bapirisiti bakatola Bhokisi le Tjidumano.

⁴Bapirisiti ne Balevi bakatola Bhokisi le Tjidumano tja Yahwe ne nshasha we bushanganilo ne zwija zose zwakayengemala zwakabe zwili mu nshasha.

⁵Ngono Mambo Solomoni ne gubungano lose le Baiziraela bakabe bakubunganila mbeli kukwe, bakabe banaye mbeli kwe Bhokisi le Tjidumano bepisa zwibhayilo zwe pkhwizi ne ng'ombe dze bunji gusibushoma, gusinga balike.

⁶Ndizo bapirisiti bakatola Bhokisi le Tjidumano tja Yahwe bakalizhisa pa bugalo gwalo, pa bugalo gwakayengemala gutjamukati kwe Ng'umba ye Ndzimu, Bugalo gwakayengemala kupindisa, kusi kwe mapapilo e dzikherubhu.

⁷Mapapilo e dzikherubhu akabe akaangama pezhugwi kwe bugalo gose gwe Bhokisi le Tjidumano kuyitila kuti dzikherubhu dzizwimbe kose ne mapango alakabe lakagadzikwa muali.

⁸Ngono mapango akabe ali malefu kwakabe theswi dzawo dzakabe dziboneka uli pa bugalo gwakayengemala mbeli kwe Bugalo gwakayengemala kupindisa. Koga dzisingake dzikabong'wa nge ukuzhe. Ngono mapango iyawo atjiyapo na nasi.

⁹Kwakabe kusina tjimwe mu Bhokisi le Tjidumano kuzhe kwe mabgwe mabili e zwileiti akabe alongwa ndi Mushe ku Horebu, Yahwe pabakathama tjidumano ne Baiziraela, basinobe babhuda mu shango ye Egipiti.

¹⁰Kukati bapirisiti babhuda mu bugalo gwakayengemala, gole likazhala Ng'umba ya Yahwe.

¹¹Bapirisiti bakasitubule kuthama mishingo yabo ngekwe gole ilelo ngoti tjedza tja Yahwe tjakabe tjili zhele ng'umba ya Yahwe.

¹²Ipapo Solomoni kati, “Yahwe bakati banowogala mu zhalima lakati zwititi.

¹³Tjoselele ndakamubakila ng'umba ye tjimo tjipezhugwi, bugalo gwenyu gwamunogala mukati nge kusingapele.”

¹⁴Kukati gubungano lose le Iziraela lili mile ipapo, Mambo Solomoni katendebuka kabakombolela.

¹⁵Ngono kabe eti, “Ngakukudziwe Yahwe Ndzimu we Iziraela bati nge luboko gwabo bakashingikadza tjabakagadzabgwe tate bangu Dafite beti,

¹⁶‘Tjinga kwe zhuba landakadusa bathu bangu Baiziraela mu Egipiti, akuna nzi nkulu mu njudzi dzose dze Iziraela wandakashalulila kubakigwa ng'umba inowogala zina langu. Koga ndakashalula Dafite kubusa bathu bangu Baiziraela.’

¹⁷Kukagala kuli mu moyo wa tate bangu Dafite kuti banowobakila zina la Yahwe Ndzimu we Iziraela ng'umba.

¹⁸Koga Yahwe bakadwa tate bangu Dafite bakati, ‘Kwakalulwama kuti kube kuli mu moyo uwo kuti ubakile zina langu ng'umba,

¹⁹nenguba kwakajalo, aungabakile zina langu ng'umba, koga mwana uwo unowozwagwa ndiye unowobakila zina langu ng'umba.’

²⁰Ngono ngwenu Yahwe bashingikadza kugadzabgwe, ngobe ndamuka mu bumo gwa tate bangu Dafite, agala mu tjigalo tje bushe gwe Iziraela Yahwe sekwa bakagadzabgwe, kakale ndabakila zina la Yahwe, Ndzimu we Iziraela ng'umba.

²¹Ngwenu ndathamila Bhokisi le Tjidumano bugalo, ilo lakasenga tjidumano tja Yahwe tjabakathama nabo tate bedu, zhuba labaka badusa mu shango ye Egipiti.”

²²Ndizo Solomoni kama mbeli kwe tjibeso tjinopisigwa zwibhayilo tja Yahwe, mbeli kwe gubungano lose le Iziraela, kamilidza maboko awe akaalingisa ku zhuzhugwi,

²³ngono katembezela eti, “Imwi Yahwe, Ndzimu we Iziraela, akuna Ndzimu unonga imwi kudzimu pezhugwi kene pasi mu shango, molondolodza tjidumano tjenyu ne ludo gusingazunguzike mu balanda benyu ha be muhwa nge moyo yabo yose.

²⁴Makalondolodza kugadzabgwe kwenyu kwamakagadzabgwe nlanda wenyu tate bangu Dafite, nasi mashingikadza dama lenyu limwe ne limwe nge masimba enyu.

²⁵Ndizo ngwenu, Yahwe, Ndzimu we Iziraela, londolodzani tjamakagadzabgwe nlanda wenyu tate bangu Dafite muti, ‘Akutowoshayika nlume mu zwizekugwana zwizo unowogala pa tjigalo tje bushe gwe Iziraela, ha bakololo babo banga be ne njele mu zila dzabo, beyenda mbeli kwangu sekwa wakabe uyenda mbeli kwangu iwe.’

²⁶Ndizo ngwenu, imwi Ndzimu we Iziraela, thamani kuti kugadzabgwe kwamakagadzabgwe nlanda wenyu tate bangu Dafite kuzhadzisike.

²⁷“Apa dumbu Ndzimu ungagala mu shango kene? Naiko kudzimu na pezhugwizhugwi akungabe bugalo gwakamulizana. Ngono ng'umba iyeyi yandakabaka ina bukulu gungapani gwaingamulizana kene?

²⁸Nenguba kwakajalo Yahwe Ndzimu wangu, itilani hanya ntembezelo we nlanda wenyu muamutjile kukumbila kukwe ne ntembezelo waanotembezela mbeli kwenyu nasi,

²⁹kuti zhisho lenyu libe pezhugwi kwe ng'umba iyeyi siku ne sikati, bugalo igogu gwamakaleba muti, ‘Zina langu lowobe muili,’ ndizo muhwe ntembezelo unotembezegwa nge nlanda wenyu akalinga bugalo igogu.

³⁰Ihwani kukumbila kwe nlanda wenyu nekwe bathu benyu Baiziraela ha betembezela bakalinga bugalo igogu. Ihwani muli mu bugalo gwenyu kudzimu muamutjile mutizwiibhatigwe.

³¹“Ha nthu atjinyila ikamu tjitje tjibe tjinlonga bhiso, ngono kube kuyi atune, ebe ezha etuna mbeli kwe tjibeso tjenyu tjinopisigwa zwibhayilo mu ng'umba iyeyi,

³²ipapo Yahwe, muhwe muli kudzimu mutole thambo. Sumikilisani balanda benyu, mulobe shamu una nlandu nge kunkhiga nlandu uwe mu nsholo, mubuzile nlulwami kuyenda nge ndulamo iye.

³³“Ha bathu benyu Baiziraela bamutjinyila, bebe bekundiwa nge zwita zwabo mbeli kwenyu, koga bebe beshandukila kumuli, bedana zina lenyu, betembezela bemukumbila bali mu ng'umba iyeyi,

³⁴mubahwe muli kudzimu, muzwiibhatigwe zwibi zwe bathu benyu Baiziraela, mube mubabgwiliza ku shango yamakapa bobatategulu babo.

³⁵“Ha kudzimu kwazhaligwa vula isingane ngobe bathu benyu bamutjinyila, ngono ha beshandukila zwibi zwabo, belinga ku ng'umba iyeyi, betembezela bedana zina lenyu, ngoti mubaloba,

³⁶mubahwe muli kudzimu, muzwiibhatigwe zwibi zwe balanda benyu Baiziraela. Mubadiye ndulamo, kuyenda mu zila yabakafanila yenda muili. Mube mubanisila vula mu shango yabo, yamakabapa kube thaka.

³⁷“Ha kuna bhamba mu shango, ha kuna bugwele kene mathunde ali zwimbubgwi kene ana hwuzwi kene ejiwa nge phashu kene nge zwikonyana, kene bathu banginiligwa nge zwita zwabo mu mizi yabo, kene kuna gatekate le bugwele kene kuna bugwele gwawa,

³⁸muhwe mitembezelo yabo. Ha mmwe we bathu benyu Baiziraela, ezha nge kuhwa zogwadza, bemilidzila maboko abo ku ng'umba iyeyi betembezela,

³⁹muhwe mitembezelo yabo. Mubahwe muli mu nzi wenyu kudzimu, mubabhatshe. Ndimwi moga munoziba zwimu moyo ye bathu. Mubhatshe nthu mmwe ne mmwe kuyendidzana ngokumbila kukwe.

⁴⁰Kuti ndizo bathu benyu bamuhwe mu zwibaka zose bali mu shango yamakapa bobatategulu bedu.

⁴¹“Nenge ntaya usi we ludzi gwe bathu benyu Baiziraela, ha angazha edwa ku shango ikulekule, ezhila zina lenyu,

⁴²ahwa ngekwe zwithu zwikulu zwamakathamila bathu benyu nge luboko gwenyu gusingatayile pamwe, ezha kowotembezela mu ng'umba iyeyi,

⁴³munhwe muli mu bugalo gwenyu kudzimu. Ngono munthamile kuyendidzana ne sekwa kose ntaya amukumbila ndiko. Kuti ndizo bathu bose mu shango yose bazibe zina lenyu bamutje, sekwa bathu benyu Baiziraela bethama. Ne kuti bazibe kuti ng'umba iyeyi yandakabaka inodang'wa nge zina lenyu.

⁴⁴“Ha bathu benyu bebhuda beyenda ku ngwa, kunogwa ne zwita zwabo, bebe betembezela bakalinga nzi nkulu uwoyu wamakashalula ne ng'umba iyeyi yandakabakila zina lenyu,

⁴⁵muhwe mitembezelo ne kukumbila kwabo muli kudzimu, ngono mubape gwendo.

⁴⁶“Ha bathu benyu bangamuthamila tjibi, ngoti akuna nthu usingake kathama tjibi, ngono kube kuti nge bushongola gwenyu mube mubalonga mu maboko e zwita zwabo, kuti ndizo batapigwe ku shango ye zwita zwabo, kulekule kene pejopejo,

⁴⁷bebe beti bali ku shango yabakatapigwa ko bebe bemukumbula mu moyo yabo, ngono bebe beshanduka, bemutembezela bali mu shango ya bakatapigwa beti, ‘Takatjinya, ngono tikabhuda mu zila tikathama mbipo,’

⁴⁸ha bashanduka mu mikumbulo yabo yose ne mu moyo yabo yose bali mu shango ye zwita zwabo, zwakabatapa, bebe betembezela bakalinga ku shango yabo yamakapa bobatategulu babo, nzi nkulu wamakashalula ne ku ng'umba iyeyi yandakabakila zina lenyu,

⁴⁹muhwe mitembezelo ne kukumbila kwabo muli mu bugalo gwenyu ku dzimu, mubahwile ngoni.

⁵⁰Muzwiibhatigwe zwibi zwabo ne kupanduka kwabo, mbeli kwe bakabatapa, kuti na ibo babahwile ngoni,

⁵¹ngoti bathu benyu, lukata gwenyu, gwamakadusa mu Egipiti, mu bhuba puba le moto we tshipi.

⁵²“Mulinge kukumbila kwe nlanda wenyu ne kukumbila kwe bathu benyu Baiziraela nge mesho ana ngoni, mubahwilile ha bemudana.

⁵³Ngoti makabashalula mu zwitjaba zose zwe shango kube thaka yenyu sekwa makaleba kuna Mushe nlanda wenyu pamakadusa bobatategulu bedu mu Egipiti, imwi She Yahwe.”

⁵⁴Kukati Solomoni apedza mitembezelo yose ne kukumbila kuna Yahwe, kamilika mbeli kwe tjibeso tjinopisigwa zwibhayilo tja Yahwe paakabe akathigama akamilidzila maboko pezhugwi enamata.

⁵⁵Ngono kamilika kakumbilila gubungano lose le Iziraela makombolelo eti,

⁵⁶“Ngakukudziwe Yahwe bakanyatutusa bathu babo Baiziraela kuyendidzana ne kugadzabgwe kwabo kose, kusina ne dama ne ling'ompela lose le kugadzabgwe kwabo kwakanaka kwabakaleba na Mushe lakawila pasi.

⁵⁷Yahwe Ndzimu wedu ngababe naswi. Basitisiye kene kuli kutifupatila,

⁵⁸koga ngabashandulile moyo yedu ku bali kuti titobele zila dzabo dzose, ne kulondolodza milayo yabo yabakapa bobatategulu bedu.

⁵⁹Dzene matama e kukumbila kwangu kuna Yahwe, angabe pejo na Yahwe Ndzimu wedu siku ne sikati. Yahwe babe ne ngoni ne nlanda wabo nenge bathu babo Baiziraela, kuyendidzana ngoshaya kwabo zhuba ne zhuba.

⁶⁰Kuti ndizo zwitjaba zwe shango yose zwizibe kuti Yahwe ndibo Ndzimu bali boga akuna mmwe Ndzimu kakale.

⁶¹Ndizo imwi bathu ba Yahwe, mudzikame mube ne lebeswa muna Yahwe Ndzimu wedu, mutobele ndaulo dzabo, mulondolodze milayo yabo, sekwa kuli iko nasi.”

⁶²Ndizo Mambo Solomoni ne Iziraela yose naye, bakadusila Yahwe zwibhayilo.

⁶³Solomoni kadusila Yahwe zwibhayilo zwe shatho, ng'ombe dzili zwiwulu zwili makumi mabili ana kubili (22 000) ne pkhwizi dzili zwiwulu zwili zana lina makumi ali mabili (120 000). Mambo ne bathu bose be Iziraela bakabe betola ng'umba beipa Yahwe.

⁶⁴Mu zhuba ilo zwalo mambo bakayengemadza pakati kwe nsha wakabe uli mbeli kwe Ng'umba ye Ndzimu. Kapisila zwibhayilo zwinopisiwa ne tjipo tje mathunde ne mafuta e tjibhayilo tje shatho ipapo, ngobe tjibeso tjinopisigwa zwibhayilo tje phangula tjakabe tjili mbeli kwa Yahwe tjakabe tjisakaswika kupisigwa zwipo zose zwakabe zwakafanila pisiwa.

⁶⁵Ipapo mu Ng'umba ye Ndzimu, Solomoni ne gubungano lose le Iziraela bakadwa babhata Nzano we Mishasha wakatola mazhuba ali kutendeka. Kwakabe kuli mbunga nkulu we bathu kudwa ku nkoba we Hamati kunoti ku n'gathu we Egipiti, bali mbeli kwa Yahwe, Ndzimu wedu.

⁶⁶Kukati mu zhuba le buzhanakadzi mambo kapaladza bathu. Bakapalala beyenda ku mizi yabo bakashatha bepululudza, bekudza mambo, mu bubuya gose Yahwe gwabakathamila nlanda wabo Dafite ne bathu babo Baiziraela.