Read Kalanga 1 Bomambo 9 Bible Online

1 Bomambo 9 - Kalanga bible

1 Bomambo 9

¹Kukati Solomoni apedza baka Ng'umba ya Yahwe ne ng'umba ye bushe na zose zwaakabe ayemula kuzwibaka,

²Yahwe bakazwilakidza kuna Solomoni gwe bubili sekwa bakatongozwilakidza kunli ku Gibiyoni.

³Ngono Yahwe bakandwa bakati, “Ndahwa mitembezelo iyo ne kukumbila kuko kwawakathama mbeli kwangu. Ndayengemadza ng'umba iyeyi yawakabaka, ukabiga zina langu muili nge kusingapele, mesho angu ne moyo wangu zowobe muili nge kusingapele.

⁴Ngekuko, ha ungandishingila nge lebeswa sa tate babo Dafite, undishingila wakalonga moyo, wakatambunuka, uthama kuyendidzana na kose kwandakakudwa, ulondolodza milayo yangu,

⁵ndowolumbidza tjigalo tjitjo tje bushe mu Iziraela nge kusingapele, sekwa ndakagadzabgwe tate babo Dafite nditi, ‘Akutowoshayika nlume mu nsha uwo unowobe mambo we Iziraela.’

⁶Koga ha ungandishandukila, iwe kene bana babo, mukasilondolodze milayo yangu, yandakamupa, mukanamata midzimu ipoga,

⁷ipapo ndowotatila Baiziraela kuzhe kwe shango yandakabapa. Ne ng'umba yandakayengemadzila zina langu, ndowoifupatila. Ngono Baiziraela banowoshanduka tjiyeye ne tjiseko mu tjaba dzose.

⁸Ngono ng'umba iyeyi inowoshanduka ikabe duluthulu le dongo, mmwe ne mmwe unopinda paili unowokaabala, kabhata nlomo, ngono kati, ‘Apa Yahwe bakathamani shango iyeyi beijali ne ng'umba iyeyi kene?’

⁹Ipapo bathu banowoti, ‘Ngobe bakafupatila Yahwe Ndzimu wabo, bakadusa bobatategulu babo mu shango ye Egipiti, ngono bakatobela midzimu ipoga, bakainamata bakaishingila. Ndizo Yahwe bakazhisa mbipo yose iyeyi mubali.’”

¹⁰Ku bupelo gwe makole ali makumi mabili, Solomoni abaka ng'umba idzedzi mbili, ng'umba ya Yahwe ne ng'umba ye bushe,

¹¹mambo we Tire Hiramu enzhisila mapango e sida ne e misipuri ne golide, nge tjilizanyo tjaakabe eshakila nshingo uwe, Mambo Solomoni wakapa Hiramu mizi mikulu ili makumi mabili mu ntuthu we Galili (20).

¹²Koga kukati Mambo Hiramu edwa ku Tire kuwobona mizi mikulu yaakapiwa ndi Mambo Solomoni, kasi ishathile.

¹³Ndizo kadwa Solomoni kati, “Mizi ye mbumbiko yakatini iyeyi yawandipa, mwana wa mayi?” Ndizo ikadang'wa kuyi shango ye Khabhulu, kudwiwa kuti mizi isi ye tjimwe nge Tjihebheru.

¹⁴Koga Hiramu wakabe ayisa talenta dze golide dzili zana ne makumi mabili kuna Solomoni.

¹⁵Edzi ndidzo thawu ngekwe bashingi bakashingisiwa ndi Mambo Solomoni kubaka ng'umba ya Yahwe ne ng'umba iye ne duluthulu ne luswingo gwe Jerusalema. Wakashingisa bashingi ibo zwabo kubaka mizi mikulu ye Hazori ne Megido ne Gezeri.

¹⁶(Faro mambo we Egipiti wakayenda kunonginilila Gezeri, kaupisa nge moto, kabuya kabulaya Bakanana bakabe begala mu nzi nkulu iwoyo. Kabe eutola eupa nkololokadzi wakabe ali nkadzi wa Solomoni kuti ube thiya misha,.

¹⁷Ndizo Solomoni kaumusa.) Kakale Solomoni kashingisa bashingi kubaka Bhetihoroni upakawila.

¹⁸Kakale kabaka Bhaalati ne Tama mu tjilambanyika mu ntuthu we Juda

¹⁹ne mizi mikulu yose ye mabiganyilo awe ne mizi mikulu ye koloyi dzidze dze ngwa ne mizi mikulu ye mbizi dzidze ne tjimwe ne tjimwe Solomoni tjaakabe eyemula baka mu Jerusalema ne mu Lebanoni ne mu shango yose yaakabe ebusa.

²⁰Bathu bose babakabe basababulaya, basi Baiziraela, Baamoni ne Bahiti ne Baperizi ne Bahivi ne Bajabusi,

²¹bana babo bakabe basalobesiwa nge Baiziraela, Solomoni wakabathama balanda banonshingila, ngono na nasi batji balanda zwabo.

²²Koga Solomoni kasi thame Baiziraela balanda. Bakashinga bali babhayani, bali balauli be babhayani babe, bali batungamili be ngwa dzidze, bali balauli be koloyi dzidze dze ngwa ne batathi be mbizi dzidze.

²³Ibaba bali mazana ali mashanu ana makumi ali mashanu (550), bakabe bali balauli bakulu bakabe betjengeta bathu bakabe bashinga nshingo uwe.

²⁴Nkadzi wa Solomoni nkololokadzi wa Faro mambo we Egipiti, kafuluka mu nzi nkulu wa Dafite, kanogala ku ng'umba iye ye bushe yaakabakigwa nge nlume uwe. Ndiko Solomoni kabaka duluthulu.

²⁵Solomoni wakabe eyisila Yahwe zwibhayilo zwinopisiwa ne zwe shatho katatu nge gole eyisa ne motsha unonuhwa zwinozipa mbeli kwa Yahwe. Ngono kabe apedza kubaka Ng'umba ye Ndzimu.

²⁶Mambo Solomoni kabaka zwikepe zwili zwinjinji ku Eziyonigeberi ipejo ne Eloti pa phili ye Gungwa Shaba, mu shango ye Edomu.

²⁷Mambo Hiramu katumila balanda babe nge zwikepe bali balume bakawolobela gungwa, kunoshinga ne balanda ba Solomoni.

²⁸Bakayenda nge gungwa ku Ofira, bakayendila Solomoni talenta dze golide dzili mazana manna ana makumi mabili (420).