Read Kalanga 2 Bomambo 11 Bible Online

2 Bomambo 11 - Kalanga bible

2 Bomambo 11

¹Kwakati Athaliya mme ba Ahaziya bebona kuti nkololo wabo wafa, bakamilika bakabulaya bose be bushe.

²Koga Jehosheba nkololokadzi wa Mambo Joramu ali hazwadzi ya Ahaziya, katola Joashi nkololo wa Ahaziya kandusa mu bakololo ba mambo bakabe bakafanila bulawa ngono kansumbika ne ntjengeti uwe mu ng'umba ye bulalo, wakabe ensumbikila Athaliya kuti ndizo asibulawe.

³Wakagala ne ntjengeti uwe akabgwata mu ng'umba ya Yahwe kwe makole ali matathatu, Athaliya ebusa shango.

⁴Ngono kukati mu gole le butendeka Johoyada kadana batungamili bebali zana ne balindi be bushe, ngono kati bazhe kunli ku ng'umba ya Yahwe, kathama tjidumano nabo kabatunisa mu ng'umba ya Yahwe ngono kabalakidza nkololo wa mambo.

⁵Ngono kabalaya eti, “Tjamakafanila thama ndiyetji, gwamu le butatu linongina mu nshingo nge Sabata, libe lilinda ng'umba ya mambo,

⁶limwe lilinda ku nkoba we Suri le butatu lili ku nkoba ushule kwe balindi, balinde ng'umba ya mambo nge mazolo

⁷ngono makupo enyu mabili anotjayisa mu nshingo nge Sabata balinde ng'umba ya Yahwe,

⁸bame bakapoteleka mambo, mmwe ne mmwe akabhata zwibhayano zwizwe. Ngono iye unosedzela wunde ye makupo unowobulawa. Mu gale muli wunde ya mambo kummwe ne kummwe kwaanoyenda.”

⁹Batungamili be bali zana bakathama sekwa balayiwa ndi Jehoyada we mpirisiti, ngono mmwe ne mmwe wabo katola balume babe bakabe bengina mu nshingo nge Sabata naibabo bakabe benonyaluluka ngono bakazha kuna Jehoyada we mpirisiti.

¹⁰Ngono mpirisiti kapa batungamili mathumo ne zwivikisi zwakabe zwili zwa Mambo Dafite zwili mu ng'umba ya Yahwe.

¹¹Ngono balindi bakazwimisa zubuyanana, mmwe ne mmwe akabhata zwibhayano zwizwe, bakapoteleka mambo baliwunde ye tjibeso tjinopisigwa zwibhayilo ne Ng'umba ye Ndzimu nekudwa kundzibo we ku burwa kunoti kundzibo we kubunandzwa gwe Ng'umba ye Ndzimu.

¹²Jehoyada kadusa nkololo wa mambo ngono kan'ambadza tjiala tje bumambo, kampa ntutshi we nlayo ngono kambiga mambo, kanzhodza ngono bathu bakaloba phande bakati, “Mambo ngabatjile tjibaka tjilefu.”

¹³Kwakati Athaliya ehwa zhoba ye balindi neye bathu, kangina mu ng'umba ya Yahwe ku bathu,

¹⁴ngono kati elinga kabona mambo alimile pa phanda kuyendidzana nge tjilenje, ngono batungamili ne balidzi bakabe baliwunde ya mambo ne bathu bose be shango bakashatha belidza nyanga. Ngono Athaliya kapalula zwiambalo zwizwe elila eti, “Bupanduki, Bupanduki.”

¹⁵Jehoyada we mpirisiti kalaya batungamili banolaula ngwa eti, “Mundusile pazhe kwe Ng'umba ye Ndzimu pakati kwe makupo akakubungana ngono mubulaye nge thumo iye unowonsala shule.” Ngobe mpirisiti wakabe ati, “Asibulayigwe mu ng'umba ya Yahwe.”

¹⁶Ndizo bakambhata nge maboko, ngono kanoswika pa zila ye mbizi ino ngina mu ng'umba ya mambo ngono kabulaigwa ipapo.

¹⁷Jehoyada kathama tjidumano pakati kwa Yahwe na mambo ne bathu kuti banowobe bathu ba Yahwe. Kathama kakale tjidumano pakati kwa mambo ne bathu.

¹⁸Kudwapo bathu bose beshango bakayenda ku ng'umba ye minamato ya Bhaale bakaikolomodza kose ne zwibeso zwizwe zwe zwibhayilo ne zwifano zwizwe bakazwipkhwanya, ngono bakabulayila Matani mpirisiti wa Bhaale mbeli kwe zwibeso. Ngono mpirisiti kabiga balindi pa ng'umba ya Yahwe.

¹⁹Ngono katola batungamili be balizana ne balindi be bushe ne balindi ne bathu bose be shango bakadusa mambo mu ng'umba ya Yahwe, bakayenda ku ng'umba ye bumambo bengina nge nkoba we balindi. Mambo bakatola magalo abo patjigalo tje bumambo.

²⁰Bathu bose be shango bakashatha ne nzi nkulu ukabe nge kunyalala shule kwa Athaliya asinakubulawa nge thumo ku ng'umba ya mambo.

²¹Jehoashi wakatangisa kubusa ana makole ali kutendeka.