Read Kalanga 2 Bomambo 12 Bible Online

2 Bomambo 12 - Kalanga bible

2 Bomambo 12

¹Kwakati mu gole le butendeka la Jehu, Jehoashi katangisa kubusa, ngono wakabusa makole ali makumi manna (40) mu Jerusalema. Mmeyabe bakabe bedang'wa Zibiya we Berisheba.

²Jehoashi kathama tjakalulwama mu mesho a Yahwe mazhuba awe wose, ngobe Jehoyida we mpirisiti wakabe e nkumbuludza.

³Nenguba kwakajalo magalo akatuthumala aazopaladziwa, bathu bakadwilila bepisa zwibhayilo ne motsha mu magalo akatuthumala.

⁴Jehoashi kadwa bapirisiti kati, “Mari wose e zwithu zwakayengemala anozhisiwa mu ng'umba ya Yahwe, mari anowodusiwa nge nthu mmwe ne mmwe sekwaanobe a lingisisiwa nge mpirisiti, ne mari wose anowodusiwa nge nthu nge ludo, ne mari anowodusiwa kuli tjipo mu ng'umba ya Yahwe,

⁵bapirisiti batole mari mu babhati be mari balulwamise Ng'umba ye Ndzimu payakatjinyika nawo.”

⁶Koga kwakati mu gole le bumakumi mabili ana matatu (23) bapirisiti bakabe basathu bakalulwamisa Ng'umba ye Ndzimu.

⁷Ndizo Mambo Jehoashi kadana Jehoyada we mpirisiti ne bapirisiti bamwe kababhuzwa kati, “Hwutini musingalulwamise Ng'umba ye Ndzimu payakatjinyika? Musitjatole mari mu babhati be mari, kuzhe kwe mu ashingisa kululwamisa Ng'umba ye Ndzimu.”

⁸Bapirisiti bakaduma kuti abatjowotola mari mu bathu kakale abatowolulwamisa Ng'umba ye Ndzimu.

⁹Jehoyada katola bhokisi kalipubula mu tjizwino ngono kalibiga pa tjibeso tjinopisigwa zwibhayilo tje kuluji ha ungina mu ng'umba ya Yahwe, ngono bapirisiti bakalinda nkoba bakalonga mari wose akabe ezhisiwa mu Ng'umba ye Ndzimu mulili.

¹⁰Kwakabe kuti abebona mari atjibe manji mu bhokisi, nkwalili wa mambo ne mpirisiti nkulu bakabe bezha be bala mari a wang'wa mu ng'umba ya Yahwe bealonga mu dzihwomwana.

¹¹Bepa batungamili be nshingo we Ng'umba ye Ndzimu mari akalizanila ngono bakalipa babezhi ne babaki bakabe beshinga ng'umba ya Yahwe,

¹²ne babaki be mabgwe ne babezhi be mabgwe, kakale kutengwa mapango ne mabgwe akabezhiwa kuti kululwamisiwe ng'umba ya Yahwe, ne tjinyikilo dzose dzekululwamisa Ng'umba ye Ndzimu.

¹³Mari akakubunganyiwa mu Ng'umba ye Ndzimu akasishingisiwe kuthama zwikutili zwitukununu zwe siliva ne zwidzimi zwe mavone ne zwikutili zwinoshingisiwa kunyasa ne zwilidzo zwe lunyanga kene tjimwe tjija tje golide kene tje siliva zwe ng'umba ya Yahwe,

¹⁴ngobe akabe epiwa bashingi bakabe belulwamisa ng'umba ya Yahwe.

¹⁵Ngono bakasishake kuti mari akashinga tjini ku bathu babakapa mari kuti balipe bashingi, ngobe bakashinga nge kugalikabgwe.

¹⁶Mari e zwibhayilo zwe milandu ne mari e zwibhayilo zwe zwibi iwo akabe asingashanganyiwe ne e ng'umba ya Yahwe, akabe ali e bapirisiti.

¹⁷Mu misi iyeyo Hazaele mambo we Siriya kamilika kanogwa ne Gati ngono kaitapa. Kashanduka kuti anonginilila Jerusalema,

¹⁸koga Jehoyashi mambo we Juda katola zwipo zose zwakayengemala zwakabe zwadusiwa ndi Jehoshafati na Jehoramu na Ahaziya botate babe bali bomambo be Juda bezwidusila Ng'umba ye Ndzimu kose ne zwipo zwizwe zwakayengemala ne golide yose imu matula e ng'umba ya Yahwe ne imu ng'umba ya mambo ngono kazwitumila kuna Hazaele mambo we Siriya. Ngono Hazaele kasiya Jerusalema.

¹⁹Imwe mishingo ya Jehoyashi na zose zwaakathama zwakakwagwa mu lukwalo gwe zwiyitikalo gwa bomambo be Juda.

²⁰Ngono makombgwa awe kammukila, kanlukila gwanga, bakabulaya Joashi pa Bhetimilo mu zila inoyenda ku Sila.

²¹Makombgwa akambulaya ndi Jozabadi nkololo wa Shimeyati na Jehozabadi nkololo wa Shomeri. Wakafa ngono kabiganyiwa pana botate babe mu nzi nkulu wa Dafite. Ngono Amaziya nkololo uwe kan'gala thaka.