Read Kalanga 2 Bomambo 14 Bible Online

2 Bomambo 14 - Kalanga bible

2 Bomambo 14

¹Mu gole le bubili la Jehoashi nkololo wa Jehoyazi mambo we Iziraela, Amaziya nkololo wa Joashi mambo we Juda katangisa busa.

²Wakatangisa busa ana makole ali makumi mabili ana mashanu (25), ngono kabusa makole ali makumi mabili ana ali zhanalume (29) mu Jerusalema. Zina la mmeyabe kuli Jehoyadini bedwa ku Jerusalema.

³Kathama tjakalulwama mu mesho a Yahwe koga kusi sa tate babe Dafite, mu zwithu zose wakashinga sa tate babe Joashi.

⁴Koga magalo akatuthumala kasidusiwe, bathu bakadwilila bedusila zwibhayilo ne kupisila motsha mu magalo akatuthumala.

⁵Kwakati simba le bumambo latjidzikama mu maboko awe, kabulaya makombgwa awe akabulaya mambo tate babe.

⁶Ngono kasibulaye bana be babulayi kuyendidzana nge tjakakwagwa mu lukwalo gwe nlayo gwa Mushe, Yahwe pa bakalaula beti, “Botate basibulawe ngekwe bana, ne bana basibulawe ngekwa botate babo, koga mwe ne mwe afile zwibi zwizwe.”

⁷Ndiye wakabulaya Baedomu bali zwiwulu zwili gumi (10 000) ku Nkuku we Mwenyu ngono katapa nzi we Sela mu ngwa, kaudana eti Jokoteli, zina lawo nanasi.

⁸Ipapo Amaziya katuma batumwa kuna Jehoashi nkololo wa Jehoyahazi ali nkololo wa Jehu mambo we Iziraela eti, “Buya ti lingisane.”

⁹Koga Jehoashi mambo we Iziraela kashandula Amaziya mambo we Juda eti, “Kungubo tjimu Lebanoni tjatumidzila ku nsida umu Lebanoni tjiti, ‘Lobodza nkololokadzi uwo ku nkololo wangu,’ ngono tjibandana tjimu Lebanoni tjakapinda tjikatshamba ikungubo.

¹⁰Nge malebeswa wakakunda Baedomu ngono ngwenu unozwikudza. Uzwikudze nge kukunda kuko koga ugale ku nzi. Ini uzwidanila mbatsha kuti uwe kose ne Juda?”

¹¹Koga Amaziya kasiteedze, Jehoashi mambo we Iziraela kamilika, ngono iye na Amaziya mambo we Juda bakalingisana mu ngwa ku Bhetishemeshi ye Juda.

¹²Juda kakundiwa ne Iziraela ngono mmwe ne mmwe katizhila ku nzi uwe.

¹³Jehoyashi mambo we Iziraela katapa Amaziya mambo we Juda kuli nkololo wa Joashi ali nkololo wa Ahaziya ku Bhetishemeshi. Ipapo Joashi kayenda ku Jerusalema ngono kaliga guma le Jerusalema kudwa ku nkoba we Ifureimi kunoti ku Nkoba we Kundzibo kungabe thambo dzili mazana mabili.

¹⁴Katola golide yose ne siliva yose ne zwija zose zwakabe zwili mu ng'umba ya Yahwe ne mu matula e ng'umba ya mambo kose ne batapiwa ngono kabgwilila ku Samariya.

¹⁵Mimwe mishingo ya Jehoyashi ne zwaakathama ne zwaakatubula na sekwa akagwa na Ahaziya mambo we Juda zwakakwagwa mu lukwalo gwe Zwiyitikalo gwa bomambo be Iziraela.

¹⁶Jehoyashi kalala na botate babe ngono kabiganyigwa mu Samariya na bomambo be Iziraela, Jeroboamu nkololo uwe kan'gala thaka.

¹⁷Amaziya nkololo wa Joashi mambo we Juda, wakatjila makole ali gumi lina mashanu (15) shule kwe lufu gwa Jehoyashi nkololo wa Jehoyahazi mambo we Iziraela.

¹⁸Mimwe mishingo ya Amaziya yakakwagwa mu lukwalo gwe Zwiyitikalo gwa bomambo be Juda.

¹⁹Ngono bakanlukila gwanga mu Jerusalema, katizhila ku Lakhishi, koga bakantumila balume ku Lakhishi bakambulayila ko.

²⁰Wakazhisiwa nge mbizi ngono kabiganyigwa mu Jerusalema pana botate babe mu nzi nkulu wa Dafite.

²¹Bathu bose be Juda bakatola Azariya wakabe ana makole ali gumi lina matathatu (16) bakambiga mambo mu bumo gwa tate babe Amaziya.

²²Ndiye wakabaka Elati kaibgwilizila Juda, shule kwekuti mambo balale na botate babo.

²³Mu gole le bugumi lina makole ali mashanu (15) le mbuso wa Amaziya nkololo wa Joashi mambo we Juda, Jeroboamu nkololo wa Joashi mambo we Iziraela katangisa busa mu Samariya, ngono wakabusa makole ali makumi manna ana gole (41).

²⁴Kathama mbipo mu mesho a Yahwe, kasiletje zwibi zose zwa Jeroboamu nkololo wa Nebati, izo zwaakathamisa Iziraela tjibi.

²⁵Ndiye wakabgwilizila Iziraela migathu kudwa ku nkoba we Hamati kunoti tjose ku Gungwa gwe Araba kuyendidzana nge dama la Yahwe Ndzimu we Iziraela labakaleba nge nlanda wabo Jona nkololo wa Amitayi we nlebesambeli unodwa ku Gatihefa.

²⁶Ngobe Yahwe bakabe babona kudziyila kwe Baiziraela kugwadza, kwakabe kusina basala, basungwa kene bakasununguka ngono kwakabe kusina ungaba bhatsha.

²⁷Koga Yahwe bakabe basaleba kuti banowodzimidza zina le Iziraela pasi kwe zhuzhugwi, ndizo bakabatjidza nge luboko gwa Jeroboamu nkololo wa Joashi.

²⁸Mimwe mishingo ya Jeroboamu na zose zwaakathama ne zwaakatubula ne sekwa akagwa na sekwa akabgwilizila Iziraela Damasiko ne Hamati yakabe ili ye Juda, zwakakwagwa mu lukwalo gwe Zwiyitikalo gwa bomambo be Iziraela.

²⁹Ngono Jeroboamu kalala na botate babe bomambo be Iziraela, Zakhariya nkololo uwe kan'gala thaka.