Read Kalanga 2 Bomambo 15 Bible Online

2 Bomambo 15 - Kalanga bible

2 Bomambo 15

¹Mu gole le bumakumi mabili ana ali kutendeka (27) e mbuso wa Jeroboamu mambo we Iziraela, Azariya nkololo wa Amaziya mambo we Juda katangisa busa.

²Wakatangisa busa ana makole ali gumi lina kutathatu (16) ngono kabusa makole ali makumi mashanu ana mabili (52) mu Jerusalema. Zina la mmeyabe lakabe liyi Jekoliya bedwa ku Jerusalema.

³Ngono wakathama tjakalulwama mu mesho a Yahwe kuyendidzana nge tjakathamiwa ndi tate babe Amaziya.

⁴Nenguba kwakajalo magalo akatuthumala akasiakolomodze, bathu bakadwilila be dusila zwibhayilo ne kupisila motsha mu magalo akatuthumala.

⁵Ngono Yahwe bakaloba mambo shamu kagwala mapele kuswikila zhuba lile le lufu, ngono kagala mu ng'umba yakathubukana ne dzimwe. Jothamu nkololo wa mambo kalinga zwe nsha wa mambo, ngono katungamila bathu be shango.

⁶Mimwe mishingo ya Azariya na zose zwaakathama zwakakwagwa mu lukwalo gwe Zwiyitikalo gwa bomambo be Juda.

⁷Azariya kalala na botate babe ngono kabiganyigwa pabali mu nzi nkulu wa Dafite. Jonatani nkololo uwe kan'gala thaka.

⁸Mu gole le bumakumi matatu ana ali zhanakadzi (38) le mbuso wa Azariya mambo we Juda, Zakhariya nkololo wa Jeroboamu kabusa Iziraela ali mu Samariya kwe mimwedzi ili kutathatu.

⁹Ngono kathama mbipo mu mesho a Yahwe sekwakathama botate babe. Kasishandukile zwibi zwa Jeroboamu nkololo wa Nebati, zwaakathamisa Iziraela tjibi nazo.

¹⁰Shalumu nkololo wa Jabheshi kalukila gwanga Zakhariya, kan'loba mbeli kwe bathu kambulaya ngono kan'tolela bumambo.

¹¹Mimwe mishingo ya Zakhariya yakakwagwa mu lukwalo gwe Zwiyitikalo gwa bomambo be Iziraela.

¹²Ndizo dama lakalebgwa ndi Yahwe kuna Jehu beti, “Bakololo babo banowogala mutjigalo tje bumambo tje Iziraela kunoti kutjizekugwana tje bunna.” Ngono kwakashingikala.

¹³Shalumu nkololo wa Jabheshi wakatangisa busa mu gole le bumakumi matatu ana ali zhanalume (39) le mbuso wa Uziya mambo we Juda ngono kabusa mwedzi ng'ompela mu Samariya.

¹⁴Ndizo Menahimu nkololo wa Gadi kabhuda mu Tiriza kayenda ku Samariya ngono kaloba Shalumu nkololo wa Jabheshi mu Samariya kambulaya, ngono kan'tolela bumambo.

¹⁵Mimwe mishingo ya Shalumu ne gwanga gwaakaluka zwakakwagwa mu lukwalo gwe Zwiyitikalo gwa bomambo be Iziraela.

¹⁶Mu tjibaka itjetjo Menahimu kalobesa nzi we Tifisa na bose bakabe bali muuli, ne migathu yawo kutangisa ku Tireza, ngobe basakanzhulila iyo, kaulobesa, ngono katjeka mitumbu ye bakadzi bose bakabe bakazwisenga.

¹⁷Mu gole le bumakumi matatu ana ali zhanalume le mbuso wa Azariya mambo we Juda, Menahimu nkololo wa Gadi katangisa busa Iziraela ngono kabusa makole ali gumi mu Samariya.

¹⁸Kathama mbipo mu mesho a Yahwe, mu mazhuba awe wose kasishandukile zwibi zwa Jeroboamu nkololo wa Nebati, izo zwaakathamisa Iziraela tjibi nazo.

¹⁹Puli mambo we Asiriya ka nginilila shango ngono Menahimu kampa talenta dze siliva dzili tjiwulu (1 000), kuti a bhatshe mu kusimisa mbuso uwe.

²⁰Ngono Menahimu kalipisa Baiziraela, nlume mmwe ne mmwe wakafuma wakabe edusa shekele dze siliva dzili makumi mashanu (50) kuti dzipiwe mambo we Asiriya. Ndizo mambo we Asiriya kabgwilila, kasigale mu shango ye Baiziraela.

²¹Mimwe mishingo ya Menahimu na zose zwaakathama zwakakwagwa mu lukwalo gwe Zwiyitikalo gwa bomambo be Iziraela.

²²Ngono Menahimu kalala na botate babe ngono Pekahiya nkololo uwe kan'gala thaka.

²³Mu gole le bumakumi mashanu (50) le mbuso wa Azariya mambo we Juda, Pekahiya nkololo wa Menahimu katangisa busa Iziraela ali mu Samariya, ngono kabusa makole mabili.

²⁴Kathama mbipo mu mesho a Yahwe, kasishandukile zwibi zwa Jeroboamu nkololo wa Nebati, zwaakathamisa Iziraela tjibi.

²⁵Ngono Peka nkololo wa Remaliya ali mmwe we batungamili babe, kanlukila gwanga ana balume bali makumi mashanu (50) be Bagiliyadi ngono bakambulayila mu Samariya, mu matizhilo e ng'umba ye bushe kambulaya ngono kan'tolela bumambo.

²⁶Mimwe mishingo ya Pekahiya na zose zwaakathama zwakakwagwa mu lukwalo gwe Zwiyitikalo gwa bomambo be Iziraela.

²⁷Mu gole le bumakumi mashanu ana mabili (52) le mbuso wa Azariya mambo we Juda, Peka nkololo wa Remaliya katangisa busa Iziraela ali mu Samariya ngono kabusa makole ali makumi mabili (20).

²⁸Kathama mbipo mu mesho a Yahwe, kasishandukile zwibi zwa Jeroboamu nkololo wa Nebati, zwaakathamisa Iziraela tjibi.

²⁹Mu tjibaka tja Peka mambo we Iziraela, Tigilati Pilesa mambo we Asiriya katapa Ijoni ne Abelibetimaka ne Janoya ne Kadeshi ne Hazori ne Giliyadi ne Galili, shango yose ye Nafutali ngono kasengela bathu mu busungwa ku Asiriya.

³⁰Ngono Hoseya nkololo wa Ela kalukila gwanga Peka nkololo wa Remaliya kanloba kambulaya, kan'tolela bumambo mu gole le bumakumi mabili (20) le mbuso wa Jothamu nkololo wa Uziya.

³¹Mimwe mishingo ya Peka na zose zwaakathama zwakakwagwa mu lukwalo gwe Zwiyitikalo gwa bomambo be Iziraela.

³²Mu gole le bubili le mbuso wa Peka nkololo wa Remaliya mambo we Iziraela, Jothamu nkololo wa Uziya mambo we Juda katangisa busa.

³³Wakatangisa ana makole ali makumi mabili ana mashanu (25) ngono kabusa makole ali gumi lina ali matathatu mu Jerusalema. Zina la mmeyabe lakabe liyi Jerusha bali nkololokadzi wa Zadoki.

³⁴Ngono kathama tjakalulwama mu mesho a Yahwe, kuyendidzana nge tjakathamiwa ndi Uziya tate babe.

³⁵Nenguba kwakajalo magalo akatuthumala kasikolomodziwe, bathu bakadwilila bedusila zwibhayilo, be pisila motsha mu magalo akatuthumala. Kabaka Nkoba Utjapezhugwi we ng'umba ya Yahwe.

³⁶Mimwe mishingo ya Jothamu na zose zwaakathama zwakakwagwa mu lukwalo gwe Zwiyitikalo gwa bomambo be Juda.

³⁷Mu mazhuba iyawo Yahwe bakatangisa kutuma Rezini mambo we Siriya na Peka nkololo wa Remaliya ku nginilila Juda.

³⁸Jothamu kalala na botate babe ngono kabiganyigwa pabali mu nzi nkulu wa Dafite tate babe, ngono Ahazi nkololo uwe kan'gala thaka.