Read Kalanga 2 Bomambo 17 Bible Online

2 Bomambo 17 - Kalanga bible

2 Bomambo 17

¹Mu gole le bugumi lina mabili le mbuso wa Ahazi mambo we Juda, Hosheya nkololo wa Ela katangisa kubusa Iziraela mu Samariya, ngono kabusa makole ali zhanalume.

²Kathama mbipo mu mesho a Yahwe koga kusi sa bomambo be Iziraela bakabusa mbeli kukwe.

³Shalimanesa mambo we Asiriya kazha kuwonginilila, ngono Hosheya kanthigamila kandusila likhetho.

⁴Ngono mambo we Asiriya kabona bupitipiti muna Hosheya ngobe wakabe atuma batumwa kuna So, mambo we Egipiti ngono kasitjaduse likhetho kuna mambo we Asiriya, sekwaakabe ethama gole nge gole. Ndizowali Shalimanesa kambhata kanlonga mu ng'umba ye busungwa.

⁵Mambo we Asiriya kamilika kanginilila shango yose, kakomba Samariya nge ngwa kwe makole matatu.

⁶Mu gole le buzhanalume le mbuso wa Hosheya, mambo we Asiriya katapa Samariya ngono kasengela Baiziraela ku Asiriya mu busungwa. Ngono kabagadza mu Hala ne mu Habori gwizi gwe Gozani ne mu mizi mikulu ye Mediya.

⁷Kose ikoku kwakashingikala ngobe Baiziraela bakabe batjinyila Yahwe Ndzimu wabo, iye wakabadusa mu shango ye Egipiti pasi kwe simba la Faro mambo we Egipiti, bakanamata midzimu ipoga

⁸ngono bakatobela mipanga ye njudzi dzakatatiwa ndi Yahwe mbeli kwe Baiziraela, bakatobela mipanga ya bomambo be Iziraela.

⁹Bathu be Iziraela bakathamila zwithu mu ikowa zwisakalulwama kuna Yahwe Ndzimu wabo. Bakazwibakila magalo akatuthumala e zwibhayilo mu mizi yabo yose mikulu, kudwa mu mizi ina thungamakole kunoti ku mizi ye matizhilo.

¹⁰Bakazwibigila mabgwe e pano namatigwa ne mapango e ndzimukadzi Ashera mu duthu limwe ne limwe na kusi kwe nti mmwe ne mmwe ntala,

¹¹ngono bakapisila motsha mu magalo wose akatuthumala sekwakathama njudzi dzakatatiwa ndi Yahwe mbeli kwabo. Bakathama zwithu zwakabipa zwakalonga Yahwe bushongola.

¹²Bakanamata midzimu yakabezhiwa nenguba Yahwe bakabe bati, “Musithame ikoku.”

¹³Yahwe bakabe batjemela Iziraela ne Juda nge balebesambeli bose ne nge baboni bose beti, “Shandukilani zila dzenyu dzakabipa ngono mu bhate milayo yangu kuyendidzana nge nlayo wose wandakapa botate benyu na iwo wandakamupa nge balanda bangu balebesambeli.”

¹⁴Koga bakasiteedze ngono bakabe nge misholo yakasima sa botate babo bakabe basingagalemoyo muna Yahwe Ndzimu wabo.

¹⁵Bakalamba ndaulo dzabo ne tjidumano tja wakabe wathama na botate babo na sekwawakabe wa tjemela. Bakatobela midzimu ye manyepkhwa bakasala basi bathu betjimwe, bakatobela njudzi dzakabe dzakabapoteleka nenguba Yahwe bakabe bababudza kuti basithame sekwadzinothama.

¹⁶Ngono bakasiya milayo yose ya Yahwe Ndzimu wabo, bakazwithamila phulu mbili dzakabumbiwa ngono bakathama ifano tja Ashera bakathigamila mibunga yose ye kudzimu ngono bakashingila Bhaale.

¹⁷Bakapisa bakololo babo ne bakololokadzi babo kuli zwibhayilo, bakashingisa bemasalamusi ne ng'anga, bakazwipa mu kuthama mbipo mu mesho a Yahwe, bebalonga bushongola.

¹⁸Ndizo Yahwe bakazhala bushongola ngekwe Iziraela ngono bakabadusa pa mesho abo, akuna wakasala kuzhe kwe ludzi gwa Juda koga.

¹⁹Ngono Bajuta nayibobo bakasi bhate milayo ya Yahwe Ndzimu wabo, koga bakatobela zila dze Baiziraela.

²⁰Ngono Yahwe bakalasha ludzi gose gwe Iziraela, bakabaloba shamu ngono bakabalonga mu maboko e batapi kuswikila babadusa pa mesho abo.

²¹Kwakati Yahwe badusa Baiziraela mu ng'umba ya Dafite, Baiziraela bakabiga Jeroboamu nkololo wa Nebati kube mambo. Ngono Jeroboamu kakwebela Baiziraela kule na Yahwe, ngono kabathamisa tjibi tjikulu kwazo.

²²Bathu be Iziraela bakatobela zwibi zose zwakathamwa ndi Jeroboamu, bakasithubakane nazo,

²³kuswikila Yahwe badusa Baiziraela mu mesho abo sekwa bakaleba nge balanda babo balebesambeli. Ndizo Baiziraela bakadusiwa mu shango yabo bakagala mu busungwa ku Asiriya kuswikila nasi.

²⁴Mambo we Asiriya kazhisa bathu banodwa ku Bhabhiloni ne Khuta ne Ava ne Hamati ne Sefarivaimu ngono kababiga mu mizi ye Samariya mu bumo gwe Baiziraela. Bakatola Samariya bakagala mu mizi yayo.

²⁵Ngono mu kutangisa kugala kwabo ikoko bakasitje Yahwe, ndizo Yahwe bakatumila shumba mubali dzikabulaya bamwe babo.

²⁶Kukanobudziwa mambo we Asiriya kuyi, “Zwitjaba zwamakatola munobiga ku mizi ye Samariya azwitoziba nlayo we Ndzimu we shango, ndizo watumila shumba mubali ngono dzobabulaya ngobe basingazibe nlayo we Ndzimu we shango.”

²⁷Ngono mambo we Asiriya kabadwa eti, “Tumilani mmwe we bapirisiti wamakasunga kudwa ku Samariya kuti abgwilile anogala ikweno ngono adiye bathu nlayo we Ndzimu we shango.”

²⁸Ndizo mmwe we bapirisiti wabakatola ku Samariya kazha kagala mu Bhetele, ngono kabadiya kuti banamate Yahwe tjini.

²⁹Koga itjaba tjimwe ne tjimwe tjikazwithamila ndzimu watjo mu mizi yabakabe begala, ngono bakayibiga mu magalo akatuthumala e zwibhayilo akabe athamiwa nge Basamariya.

³⁰Balume be Bhabhiloni bakathama ifano tja Sukotibhenoti, balume be Khuti bakathama tja Nagali, balume be Hamati bakathama tja Ashima,

³¹ngono Baavi bakathama tja Nibhazi na Taritaki, ngono Basefavaimu bakapisila Adirameleki na Anameleki midzimu yabo bana babo mu moto.

³²Bakanamata Yahwe, koga naibobo bakazwibigila bapirisiti babo mu magalo akatuthumala e zwibhayilo, bakabe bedusa zwibhayilo mu bumo gwabo mu magalo akatuthumala.

³³Bakanamata Yahwe, koga bakashingila midzimu yabo kuyendidzana nge mipanga ye njudzi dzabakadwa ku dzili.

³⁴Kuswikila nasi batjathama mazwibhato abo a ntolo. Abato namata Yahwe kene kuli ku tobela milayo ya Yahwe yabakapa bana ba Jakubo iye wabakadana Iziraela.

³⁵Yahwe bakathama tjidumano nabo ngono bakabadwa bakati, “Musitongo namata midzimu ipoga kene kuli kuyithigamila kene kuyishingila kene kuyidusila zwibhayilo.

³⁶Koga munamate Yahwe, ibo bakamudusa mu shango ye Egipiti nge simba gulu ne nge luboko gwabo gwakatambunidziwa, mu thigamile ibo ngono mu badusile zwibhayilo.

³⁷Mube ne njele ku londolodza milayo yabo yabakamukwalila. Musinamate midzimu ipoga.

³⁸Musikangang'we tjidumano tjandakathama namwi ngono musithigamile midzimu ipoga.

³⁹Koga munamate Yahwe Ndzimu wenyu, ngono banowomusunungula mu luboko gwe zwita zwenyu zose.”

⁴⁰Koga bakasiteedze ngono bakadwilila nge mipanga yabo ya ntolo.

⁴¹Zwitjaba izwezo zwikathigamila Yahwe ngono kakale beshingila midzimu yabo. Nanasi bana babo ne bana be bana babo banothama sa botate babo.