Read Kalanga 2 Bomambo 19 Bible Online

2 Bomambo 19 - Kalanga bible

2 Bomambo 19

¹Kwakati Mambo Hezekiya e hwa nge kwako, kapalula zwiambalo zwizwe ngono kaambala jila le saka kanongina mu ng'umba ya Yahwe.

²Ngono katuma Eliyakimu, iye wakabe ali ntjengeti we ng'umba ye bumambo ana Shebina nkwalili ne bapirisiti bakulu ku nlebesambeli Isaya nkololo wa Amozi, bose bakabe bakaambala matyila e saka.

³Bakadwa Isaya bakati, “Hezekiya kati, ‘Zhuba lino i zhuba le buyendasi, le kutjemegwa nele kubhakhwa nge shoni, lofanana ne mwana akafanila kuti atshibamiwe ngono mmeyabe basitjina simba le kuti bantshibame.

⁴Kungana kukabe kwashingikala kuti Yahwe Ndzimu uwo babe bahwa matama wose alebgwa ne nkulu we balauli be babhayani be Asiriya, wakatumiwa ndi tetshi uwe kudadila Ndzimu unotjila, ngono pamwe banowontjemelela matama Yahwe Ndzimu uwo abahwa e aleba. Ndizo tembezelela malimbelimbe akasala.’ ”

⁵Makombgwa a Mambo Hezekiya akati eswika kuna Isaya,

⁶Isaya kabadwa kati, “Kadweni tetshi wenyu muti, ‘Yahwe bakati, usitje tjimwe ngekwe matama iyawa awahwa, andatukwa ndiwo nge balanda ba mambo we Asiriya.

⁷Bonani, ndowolonga meya mu nli, ngono unowohwa makwayi, kabgwilila ku shango iye kwandinowothama kuti abulawe nge thumo mu shango iye.’ ”

⁸Nkulu we balauli be babhayani be Asiriya kabgwilila ku shango iye, ngono kawana mambo we Asiriya egwa ne Libina ngoti wakabe ahwa kuyi mambo bakabhuda mu Lakhishi.

⁹Senakheribu mambo we Asiriya kahwa ngekwa Tirihaka we Itopiya kuti waswika kuwogwa naye. Wakati ehwa ikoku katuma batumwa kuna Hezekiya kabadwa kati,

¹⁰“Kadweni Hezekiya mambo we Juda muti, ‘Musitongo tjebegwa nge Ndzimu wamunogalabgwe muuli nge kumugadzabgwe kuti Jerusalema ayingawile mu maboko a mambo we Asiriya.’

¹¹Bonani, makahwa tjakashingwa ndi bomambo be Asiriya mu shango dzose, bakadzilobesa. Ngono apa imwi mungatjidziwa kene?

¹²Apa midzimu ye zwitjaba yakazwitjidza kene? Bakalobesiwa ndi botate bangu ndiaba, bathu be Gozani ne Harani ne Rezefu ne bathu be Edeni bakabe bali mu Telasari.

¹³Ungayi mambo we Hamati ne mambo we Aripadi ne mambo we nzi nkulu Sefarivaimu kene we Hena kene we Iva?”

¹⁴Mambo Hezekiya kaamutjila lukwalo mu batumwa ngono kagubala. Ngono kayenda nago ku Ng'umba ya Yahwe kaguwala mbeli kwa Yahwe.

¹⁵Ngono Hezekiya katembezela Yahwe kati, “Imwi Yahwe Masimbawose, Ndzimu we Iziraela imwi mu gele pezhugwi kwe dzikherubhu, ndimwi Ndzimu muli moga mu mibuso yose ye shango, makathama kudzimu ne shango.

¹⁶Teedzani mu hwe, imwi Yahwe, muhwe ngono mulinge nge mesho enyu mubone imwi Yahwe, ihwani matama a Senakheribu aakazhisa kudadila Ndzimu unotjila.

¹⁷Yahwe, malebeswa bomambo be Asiriya bakathukudza zwitjaba ne shango dzazo,

¹⁸bakalashila midzimu yazo mu moto nenguba yakabe isi midzimu koga zwili zwithu zwakathamiwa nge maboko e bathu, kuli zwikuni ne mabgwe ndizo wali zwakakolomodziwa.

¹⁹Ndizo, Yahwe Ndzimu mutigwile mu simba lile, kuti ndizo mibuso yose ye shango izibe kuti imwi moga ndimwi Yahwe.”

²⁰Ipapo Isaya nkololo wa Amozi katuma nthu kuna Hezekiya kunon'dwa eti, “Yahwe Ndzimu we Iziraela bakati, ‘Nda hwa kunditembezela kuko ngekwa Mambo Senakheribu we Asiriya.

²¹Ngono dama lalebgwa ndi Yahwe nge kukwe yeli: “ ‘Mwanadi we Ziyoni unokuseka maanya, unokudadila, nkololokadzi we Jerusalema unokuzunguzila nsholo.

²²Wakatuka ukadadila yani kene? Ndiyani wawaka milidzila hwi ubonyabonya mesho uzwikudza kene? Uthamila wakayengemala we Iziraela.

²³Wakatuma balanda babo kudadila Yahwe, wakalebeleka uti, “Ndakatathila pezhugwi kwe matombo nge koloyi dzangu dzengwa njinji, anoti ku midzibo ikule ye Lebanoni, aligila pasi miti yako milefu inoyi misida, ne misipuri yakanaka. Ndakaswika pezhugwi kwayo, angina mu ishaka tjayo tjakazwiyana.

²⁴Ndakatsha matshime ngono ang'wa vula mu shango ye bataya, ndakapkhwisa hwobana dzose dze Egipiti nge matshambo angu.”

²⁵Awuzotongobe wahwa kene kuti ndakakulongolosa ntolo ikoku kene? Tjandinoshingikadza sangwenu nge tjandakalongolosa ntolo, tjekuti mizi mikulu ye matizhilo, unoyipkhwanya ikasala ili matuluthulu e malala.

²⁶Babaki bako bakapedziwa simba, bakahwumana bakabhakhwa nge shoni, bakafanana ne zwidzwalo zwimu nnda, ne bushwa gutjibutjetjana gusathu gukasima, nenge bushwa gwakamela pezhugwi kwe ng'umba, gwapisiwa nge zhuba gusathu gukakula.

²⁷Ndoziba kwaunogala ne tjibaka tjaunomilika, ndoziba kubhuda kuko ne kungina kuko, ne kundimukila nge bushongola kuko.

²⁸Ngoti wakandimukila nge bushongola, ngono kuzwikudza kuko kukaswika mu zebe dzangu, ndowokulonga pima mu tjimilo ne tomu mu nlomo uwo, ndowokubgwiliza nge zila yawakazha ndiyo.

²⁹“ ‘Tjilakidzo tjowobe etji ku kuli, mugole lino mowoja tjinozwimelegwa, muna linozha mowoja mazhamba atjo, koga muna le butatu mudzwale, muvune, mulime minda ye mizhambi ngono muje mitjelo yayo.

³⁰Malimbelimbe akatjila e ng'umba ya Juda anowokula se ndzi unokula pasi ube ne thabi pezhugwi dzibe ne mitjelo.

³¹Ngoti malimbelimbe anowobhuda mu Jerusalema, mu Dombo le Ziyoni kowobhuda gupo le bakatjila. Kupisika kwa Yahwe Masimbawose ndiko kunowothama ikoku.

³²Ndizo tjinolebgwa ndi Yahwe ngekwa mambo we Asiriya ndiyetji, “Aatowotshamba mu nzi nkulu iwoyu, akuna nsebe waanowoposa muuli, aatowoboneka mbeli kwawo akabhata tjiviko kene kuli kuukomba nge ngwa.

³³Zila yaakazha ndiyo, ndiyo yaanowobgwilila ndiyo. Aatowotshamba mu nzi nkulu iwoyu, koleba Yahwe.

³⁴Nzi nkulu iwoyu ndowoumila kuwutjidza, ndiwuzwitjidzila kakale ndiwutjidzila Dafite nlanda wangu.” ’ ”

³⁵Ipapo ntumwa wa Yahwe kayenda ku bukotokelo gwe Asiriya ngono kabulaya babhayani bali zwiwulu zwili zana lina makumi ali zhanakadzi lina mashanu (185 000). Kwakati tjimuka mangwanana bakabe bakafa bali zwitumbu.

³⁶Ipapo Senakheribu mambo we Asiriya kamilika kayenda ku nzi kanogala ku Ninive.

³⁷Kwakati limwe zhuba atjanamata ndzimu uwe wakabe uyi Nishirokhi mu ng'umba yawo, Adiramelekhi na Shareze bakololo babe bakambulaya nge thumo, ngono bakatizhila ku shango ye Ararati. Ngono nkololo uwe Esarihadoni kan'gala thaka.