Read Kalanga 2 Bomambo 20 Bible Online

2 Bomambo 20 - Kalanga bible

2 Bomambo 20

¹Kwakati mu mazhuba iyawo Hezekiya kagwala kwaakabe pejo ngofa. Isaya nlebesambeli nkololo wa Amozi, kayenda kunli kan'dwa kati, “Yahwe bakati, ‘Lulwamisa zwe nsha uwo ngoti unowofa, autowopola.’ ”

²Ipapo Hezekiya kashanduka kalinga ku guma ngono katembezela Yahwe eti,

³“Yahwe ndomukumbila, alakanani sekwa ndakatjila mbeli kwenyu, ndigalikabgwe nge buzhalo, ndishinga nge moyo wangu wose kakale ndishinga zwakanaka mbeli kwenyu.” Hezekiya kalila zwinogwadza.

⁴Ngono kwakati Isaya asathu kabhuda mu nsha upakati, dama la Yahwe likazha kunli liti,

⁵“Shanduka udwe Hezekiya ntungamili we bathu bangu uti, ‘Etji nditjo tjinolebgwa ndi Yahwe Ndzimu wa tate babo Dafite, nda hwa ntembezelo uwo, ndabona mishodzi iyo, bona, ndowokupodza ngono mu zhuba le butatu unowoyenda ku ng'umba ya Yahwe.

⁶Ndowopapha butjilo gugo nge makole ali gumi lina mashanu (15). Ndowosunungula iwe ne nzi nkulu iwoyu mu luboko gwa mambo we Asiriya. Ndowobakilila nzi nkulu iwoyu nge kwangu ne ngekwe nlanda wangu Dafite.’ ”

⁷Ipapo Isaya kati, “Zhisani tjiwunga tje phaya ngono mutjibige pa londa kuti ndizo apole.”

⁸Ngono Hezekiya kabhuzwa Isaya kati, “Tjilakidzo tjowobeni tjekuti Yahwe banowondipodza, nekuti ndiyende ku ng'umba ya Yahwe mu zhuba le butatu?”

⁹Ngono Isaya kandwa kati, “Yetji nditjo tjilakidzo kukuli tjinodwa kuna Yahwe tjekuti Yahwe banowothama tjabakakugadzabgwe. Apa unoshaka ntutshi uyende mbeli thambo dzili gumi, kene ubgwilile shule thambo dzili gumi kene?”

¹⁰Ngono Hezekiya kadabila eti, “Tjithu tjilelulelu kuti ntutshi uyende mbeli thambo dzili gumi, koyita ungabgwilila shule thambo dzili gumi.”

¹¹Isaya we nlebesambeli kalilila kuna Yahwe ngono bakabgwiliza ntutshi shule thambo dzili gumi pawakabe wapinda tjilakidza tjibaka tja Ahazi.

¹²Mu tjibaka itjetjo Merodakhi Baladani nkololo wa Baladani mambo we Bhabhiloni katumila hwalo ne zwipo kuna Hezekiya ngoti wakabe ahwa ngekwe bugwele gwa Hezekiya.

¹³Hezekiya kabaamutjila ngono kabalakidza dula le fumwa iye. Kabalakidza siliva ne golide ne zwipayisi ne mafuta e themba ipezhugwi, kabalakidza ne zwibhayano zwizwe, kabalakidza kose kwakabe kuli mu matula awe. Akuna tjimwe Hezekiya tjaakasiya mu ng'umba iye kene mu bumambo gugwe asabalakidza itjo.

¹⁴Ipapo nlebesambeli Isaya kazha kuna Mambo Hezekiya kan'dwa kati, “Balume ibaba badwa ngayi, bakatini?” Hezekiya kadabila eti, “Bazha kundili bedwa ku shango ikule, shango ye Bhabhiloni.”

¹⁵Isaya kabhuzwa eti, “Babonani mu ng'umba iyo?” Hezekiya kadabila eti, “Babona kose kungabong'wa mu ng'umba yangu, akuna tjimu matula angu tjandisabalakidza.”

¹⁶Ipapo Isaya kabe edwa Hezekiya eti, “Ihwa kuti Yahwe bakatini?

¹⁷Bona, mazhuba anozha anowoti zose zwimu ng'umba iyo naizo zose zwetjinga zwakakubunganyiwa ndi botate babo mu matula kuswikila nasi zwikasengegwa ku Bhabhiloni, akuna tjinowosala, koleba Yahwe.

¹⁸Bamwe be bakololo babo bawakazwala banowotapiwa, banowobe ngomwa mu ng'umba ye bumambo ya mambo we Bhabhiloni.”

¹⁹Ipapo Hezekiya kabe eti kuna Isaya, “Dama la Yahwe lawaleba lakalulwama.” Wakajalo ngobe wakakumbula eti, “Mbakiso ne mbakililo zowobepo mu mazhuba angu.”

²⁰Mimwe mishingo ya Hezekiya na zose zwaakatubula na sekwaakathama tshime ne kuzhisa vula mu nzi nkulu zwakakwagwa mu lukwalo gwe zwiyitikalo gwa bomambo be Juda.

²¹Hezekiya kalala na botate babe ngono Manase nkololo uwe kan'gala thaka.