Read Kalanga 2 Bomambo 21 Bible Online

2 Bomambo 21 - Kalanga bible

2 Bomambo 21

¹Manase wakatangisa kubusa ana makole ali gumi lina mabili (12), wakabusa makole ali makumi mashanu ana mashanu (55) mu Jerusalema. Zina la mmeyabe liyi Hefiziba.

²Kathama mbipo mu mesho a Yahwe, etobela mipanga ye zwitjaba zwakabe zwatatiwa ndi Yahwe mbeli kwe Baiziraela.

³Wakamusa magalo akatuthumala akabe a kolomodziwa ndi tate babe Hezekiya, ngono kabakila Bhaale tjibeso tjinopisigwa zwibhayilo kathama phanda dze ndzimukadzi Ashera sekwakathama Ahabu mambo we Iziraela, ngono kathigamila mibunga yose ye zhuzhugwi, kayishingila.

⁴Ngono kabaka zwibeso zwe zwibhayilo mu ng'umba ya Yahwe, Yahwe bakabe baleba ngekwayo beti, “Ndowobiga zina langu mu Jerusalema.”

⁵Mu mabazhe nge bubili gwawo e Ng'umba ya Yahwe, kabaka zwibeso zwe zwibhayilo kuti kuthigamigwe mibunga yose ye zhuzhugwi.

⁶Kapisa nkololo uwe kuli tjibhayilo ngono kathama mishingo ye buloyi neye masalamusi, kashinga ne zwangoma ne midzimu. Kathama zwinji zwakabipa mu mesho a Yahwe, kabalonga bushongola.

⁷Ngono katola ifano tja Ashera tjaakabe athama katjibiga mu Ng'umba ya Yahwe yabakaleba ngekwayo kuna Dafite ne ku nkololo uwe Solomoni beti, “Mu ng'umba iyeyi, ne mu Jerusalema yandakashalula mu njudzi dzose dze Iziraela, ndowobiga zina langu nge kusingapele.

⁸Ngono anditjowoletja Baiziraela bakayendayenda be bhuda mu shango yandakapa botate babo, koga abangabe ne njele kushinga kuyendidzana ne tjandakabadwa ne kuyendidzana ne nlayo wose wabakadwiwa ndi Mushe nlanda wangu.”

⁹Koga bakasiteedze, Manase kabakwebela ntome kuti bathame mbipo inopinda yakathamwa nge zwitjaba zwakalobesiwa na Yahwe mbeli kwe bathu be Iziraela.

¹⁰Ngono Yahwe bakalebeleka nge balanda babo balebesambeli beti,

¹¹“Ngoti Manase mambo we Juda wa shinga zwinoshimisa, wathama mbipo kupinda Baamori bakabe bali mbeli kukwe, ngono katungamilila Juda mu tjibi nge midzimu iye,

¹²ndizo wali tjinoleba Yahwe Ndzimu we Iziraela ndi yetji, Bonani, ndowozhisa mbipo mu Jerusalema ne mu Juda inowoti mmwe ne mmwe unohwa nge kwayo zebe dzidze dzikadhuma.

¹³Ndowosimisila Jerusalema ntjili we tjilizanyo we Samariya ne ntjili unotambunudza wakashingisigwa be nsha wa Ahabu. Ndowotshumula Jerusalema se ndinotshula ndilo, ndiyitshula ngono ndiyitshibika.

¹⁴Ndowolasha malimbelimbe e thaka yangu ngono abalonga mu maboko e zwita zwabo. Banowotapiwa bakabe basungwa be zwita zwabo.

¹⁵Ngoti bakathama mbipo mu mesho angu ngono bakandilonga bushongola, kudwa tjose zhuba la botate babo be bhuda mu Egipiti kuswikila nasi.”

¹⁶Kupinda ipapa, Manase wakatebula malopa manjinji asina nlandu, ezhadza Jerusalema kudwa ku ndzibo kunoti ku umwe, kuzhe kwe tjibi tjaakathama Juda kuti atjithame, kuti ndizo bathame mbipo mu mesho a Yahwe.

¹⁷Mishingo mimwe ya Manase na zose zwaakathama ne zwibi zwaakashinga zwakakwagwa mu lukwalo gwe zwiyitikalo gwa bomambo be Juda.

¹⁸Ngono Manase kalala na botate babe ngono kabiganyiwa mu nnda we ng'umba iye, mu nnda wa Uza. Amoni nkololo uwe kan'gala thaka.

¹⁹Amoni wakatangisa kubusa ana makole ali makumi mabili ana mabili (22) ngono kabusa makole mabili mu Jerusalema. Zina la mmeyabe liyi Meshulemeti nkololokadzi wa Haruzi we Jotibha.

²⁰Kathama mbipo mu mesho a Yahwe sekwakathama tate babe Manase.

²¹Katobela zila dzose dzakatobegwa na tate babe, ngono kashingila midzimu ye zwifano yakashingigwa na tate babe, kayithigamila.

²²Kafupatila Yahwe Ndzimu wa botate babe ngono kasitobele zila dza Yahwe.

²³Ngono makombgwa a Amoni kanlukila gwanga, ngono bakabulayila mambo mu ng'umba iye.

²⁴Ngono bathu be shango bakabulaya bose bakabe balukila Mambo Amoni gwanga, ngono bakabiga Josiya nkololo uwe kube mambo mu bumo gugwe.

²⁵Mishingo yose ya Amoni yaakathama yakakwagwa mu lukwalo gwe zwiyitikalo gwa bomambo be Juda.

²⁶Wakabiganyiwa mu ikumbu tjitje mu nnda wa Uza. Ngono Josiya nkololo uwe kan'gala thaka.