Read Kalanga 2 Bomambo 25 Bible Online

2 Bomambo 25 - Kalanga bible

2 Bomambo 25

¹Kwakati mu gole le buzhanalume le mbuso wa Zedekiya, mu zhuba le bugumi le mwedzi we bugumi, Nebukadineza mambo we Bhabhiloni kazha ne ngwa iye yose ku Jerusalema ngono kayikomba nge ngwa, bakabaka matuthu e ngwa kuyipoteleka.

²Ndizo nzi wakakombiwa nge ngwa kuswikila makole ali gumi lina gole (11) e mbuso wa Zedekiya.

³Ngono mu zhuba le buzhanalume le mwedzi we bunna, kwakabe ne zhala hwulu kwazo mu nzi nkulu, kwakabe kusina zojiwa kuti bathu baje.

⁴Kukapubugwa guma le nzi nkulu, mambo ne balume bose be ngwa bakabhuda busiku nge zila ye nkoba upakati kwe makuma mabili pa nnda wa mambo nenguba Bakhaladiya bakabe bakakomba nzi nkulu. Ngono bakayenda ne zila ye Araba.

⁵Koga ngwa ye Babhabhiloni ikatatamila mambo ngono bakanombhatila mu zwibata zwe Jerikho, babhayani babe bose bakathubukana naye bakapalala.

⁶Babhabhiloni bakatapa mambo, bakan'yisa kuna mambo we Bhabhiloni ku Ribila kwaakasumikilisiwa.

⁷Bakabulayila bakololo ba Zedekiya mu mesho awe, bakakopola mesho a Zedekiya, bakansunga nge dziketani bakan'yisa ku Bhabhiloni.

⁸Mu mwedzi we bushanu mu zhuba le butendeka le mwedzi, kuli gole le bugumi lina zhanalume le mbuso wa Nebukadineza mambo we Bhabhiloni, Nebuzaradani nlauli we balindi, ntungamili wa mambo we Bhabhiloni kazha ku Jerusalema.

⁹Kapisa ng'umba ya Yahwe ne ng'umba ye bumambo ne ng'umba dzose dze Jerusalema. Kapisa ng'umba dzose hwulu.

¹⁰Ngwa yose ye Bakhaladiya bana nlauli we balindi bakaliga makuma kupoteleka Jerusalema.

¹¹Malimbelimbe e bathu akabe asala mu nzi nkulu ne bakabe bazwipa kuna mambo we Bhabhiloni kose ne malimbelimbe wose, Nebuzaradani kabalonga mu busungwa.

¹²Koga nlauli we balindi kasiya bashayi be shango kuti balime minda dze mizhambi ne minda dzimwe.

¹³Bakhaladiya bakadusa phanda dze phangula dzakabe dzili mu ng'umba ya Yahwe ne zwigadziko ne tanka ye phangula zwakabe zwili mu ng'umba ya Yahwe ngono bakasengela phangula ku Bhabhiloni.

¹⁴Bakatola hali ne maharawo ne zwidzimi zwe mavone ne ndigwana dzinopisila motsha ne zwija zose zwe phangula zwinoshingisiwa mu Ng'umba ye Ndzimu,

¹⁵ne makambana e moto ne zwikutili. Ntungamili we balindi katola kose kwakathamiwa nge golide kene siliva.

¹⁶Phangula ye phanda mbili neye tanka neye zwigadziko zwakabe zwathamiwa na Solomoni ezwithamila ng'umba ya Yahwe yakabe ipinda tjilizanyo.

¹⁷Bulefu gwe phanda imwe ne imwe gwakabe guli thambo dzili gumi lina zhanakadzi, pezhugwi kwadzo kuli nsholo we phangula, bulefu gwe nsholo kuli thambo thatu, yakanakisiwa ne pomegiranate ye phangula kuyipoteleka, ne imwe phanda ifanana nayo.

¹⁸Nlauli we balindi katola Seraya mpirisiti nkulu na Zefaniya mpirisiti we bubili nge mamo ne balindi batatu be nkoba,

¹⁹ngono kudwa mu nzi nkulu katola ntungamili wakabe ali nlauli we ngwa ne bakumbuludzi ba mambo bali bashanu ne nkwalili we nlauli we babhayani wakabe eziba bathu be shango ne balume bali makumi ali tathatu (60) bakabe bali mu nzi nkulu.

²⁰Nebuzaradani nlauli we balindi kabatola kabayisa kuna mambo we Bhabhiloni ku Ribila.

²¹Mambo we Bhabhiloni kababulayila ku Ribila mu shango ye Hamati. Ndizo Bajuda bakalongwa mu busungwa, kuzhe kwe shango yabo.

²²Ngono mu bathu bose bakabe basala mu shango ye Juda, bakabe basiyiwa ndi Nebukadineza mambo we Bhabhiloni, wakabiga Gedaliya nkololo wa Ahikamu ali nkololo wa Shafani kube mbusi wabo.

²³Kwakati balauli bose be babhayani be hwa kuti mambo we Bhabhiloni wabiga Gedaliya kube mbusi, bakazha kuna Gedaliya ku Mizipha, kuli bo Ishimayili nkololo wa Nethaniya na Johanani nkololo wa Kariya na Seraya nkololo wa Tanihumeti we Netufa, na Jaazaniya nkololo we Maakha.

²⁴Gedaliya katuna kubali ne balume babo kati, “Musitje batungamili be Khaladiya, galani mu shango mu shingile mambo we Bhabhiloni, tjimwe ne tjimwe tjowomululwamila.”

²⁵Koga mu mwedzi we butendeka Ishimayili nkololo wa Netaniya ali nkololo wa Elishama we nsha we bushe kazha ne balume bali gumi bakanginilila bakabulaya Gedaliya ne Bajuta ne Bakhaladiya bakabe banaye ku Mizipha.

²⁶Ngono bathu bose batjetjana ne bakulukulu ne balauli be babhayani bakamilika bakayenda ku Egipiti ngoti bakabe betja Bakhaladiya.

²⁷Kwakati mu gole le makumi matatu ana ali tendeka (37) le busungwa gwa Jehoyakini mambo we Juda, mu mwedzi we bugumi lina mibili mu zhuba le bumakumi mabili ana ali tendeka (27) le mwedzi, mu gole la Evilimerodaki akabe mambo we Bhabhiloni, kadusa Jehoyakini mambo we Juda mu busungwa.

²⁸Kalebeleka naye nge buthu ngono kampa tjigalo tje gudzo kupinda bomambo bamwe baakabe anabo mu Bhabhiloni.

²⁹Ndizo Jehoyakini kaambula zwiambalo zwizwe zwe busungwa, ngono mazhuba wose e butjilo gugwe kaja pa tafuli ya mambo.

³⁰Zhuba ne zhuba mambo wakabe epa Jehoyakini tjaangatjila natjo, mu mazhuba wose e butjilo gugwe.