Read Kalanga 2 Bomambo 4 Bible Online

2 Bomambo 4 - Kalanga bible

2 Bomambo 4

¹Nkadzi we mmwe we badiyiwana be balebesambeli kalilila kuna Elisha eti, “Nlanda uwo, iye nlume wangu wakafa, ngono unoziba kuti nlanda uwo wakabe etja Yahwe, koga nlume waakabe ekolota wazha kuwotola bana bangu babili kube balanda babe.”

²Elisha kanshandula eti, “Ndikuthamileni kene? Undibudze, kuneni tjaunatjo mu ng'umba iyo?” Ngono kati, “Nlandakadzi wenyu aana tjaanatjo mu ng'umba kuzhe kwe itenyana tje mafuta.”

³Elisha kandwa kati, “Yenda ku babakidzani babo bose ukumbile mapepe asina tjimukati. Usikumbile mashomanana.

⁴Ngono ungine mu ng'umba uzwizhalilile mukati ne bakololo babo, ube udila mafuta mu mapepe wose, linozhala ulibigile ntome.”

⁵Nkadzi kadwa pa nli, kanozwizhalilila mu ng'umba ne bakololo babe, ngono bakololo babe bakayesa mapepe kunli iye edila mafuta.

⁶Kwakati mapepe wose atjizhala, kati ku nkololo uwe, “Zhisa limwe kakale.” Ngono kanshandula eti, “Akutjina bhepe lasala.” Ndizo mafuta kama kuwunga.

⁷Nkadzi kayenda kanobudza nlume we Ndzimu, ngono kati, “Yenda unotengesa mafuta ngono ulipe zwikoloto zwizo, ndizo anowobe asala unowozwitjidza ndiwo ne bakololo babo.”

⁸Kwakati limwe zhuba Elisha kayenda ku Shunemu, kwakabe kuna nkadzi wakafuma, iye wakankwekweredza kuja zojiwa. Ngono tjibaka tjimwe ne tjimwe ha epinda ipapo unopampukilako kunoja.

⁹Ngono nkadzi kadwa nlume uwe kati, “Bona, ndoziba kuti nlume wakayengemala we Ndzimu, unogala epinda patili.

¹⁰Ngati nthamile ng'umbana tjapezhugwi kudenga, ngono timbigile bulawo ne tafuli ne tjigalo ne luvone, kuti ndizo apa azha kutili agale ko.”

¹¹Kwakati limwe zhuba kaswika, ngono katathila ku tjing'umbana tjitje, kanyaluluka ko.

¹²Ngono kadwa nlanda uwe Gehazi kati, “Dana nkadzi we N'shunami.” Wakati an'dana, kazha kama mbeli kukwe.

¹³Ngono Elisha kadwa Gehazi kati, “Undwe uti, ‘Wakazwidziyidza kungapa nge kwedu, unoshaka thamigwani kene? Apa unoshaka lebelekegwa kuna mambo kene ku ntungamili we babhayani be ngwa kene?’ ” Nkadzi kashandula eti, “Ndogala pakati kwe bathu bangu.”

¹⁴Ngono Elisha kati, “Ungathamigwani kene?” Gehazi kashandula eti, “Tjoselele aana nkololo, ne nlume uwe watjikwegula.”

¹⁵Elisha kabe eti, “Un'dane.” Ngono wakati an'dana, kabuya kama pa nkoba.

¹⁶Ngono Elisha kati, “Mu tjibaka itjetji mu gole linozha, unowobe wakagumbatila mwana we tjilisana.” Ngono nkadzi kashandula eti, “Aa, tetshi wangu, imwi nlume we Ndzimu, musitjengele nlandakadzi wenyu.”

¹⁷Koga nkadzi kazwisenga ngono kawana mwana we tjilisana mu tjibaka itjetjo mu gole linotobela, koga sekwa akabe abudziwa ndi Elisha.

¹⁸Kwakati mwana atjikula, limwe zhuba kabhuda kayenda kuna tate babe ku bavuni.

¹⁹Ngono mwana kadwa tate babe kati, “Nsholo wangu, nsholo wangu,” Tate babe bakadwa nlanda bakati, “Un'yise kuna mmeyabe.”

²⁰Kwakati nlanda ammilidza, an'yisa kuna mmeyabe, mwana kagala mu makumbo abo kuswikila masikati, ngono kafa.

²¹Ngono nkadzi kayenda kanombiga mu bulawo gwe nlume we Ndzimu, ngono akanzhalilila mukati iye kabhuda.

²²Kadana nlume uwe, kandwa kati, “Unditumile mmwe we balanda ne imwe donki kuti nditjimbidze ndiyende ku nlume we Ndzimu ngono ndishanduke.”

²³Nlume kashandula eti, “Ini uyenda kunli nasi kene? Ngoti akutekuli Nzano we Mwedzi ugala, kakale akutekuli Sabata.” Nkadzi kati, “Kose kowolulwama.”

²⁴Ndizo nkadzi kabelesa donki, ngono kadwa nlanda uwe kati, “Utjiyendise, usindinonose kuzhe kwendakudwa ndijalo.”

²⁵Ngono kayenda kanoswika ku nlume we Ndzimu ku Dombo le Karimeli. Kukati Elisha embona aswika, kadwa Gehazi nlanda uwe kati, “Bona, nkadzi we nshunami woje,

²⁶labuka unshanganidze, umbhuzwe uti, ‘Apa unomuka kene? Apa nlume uwo unomuka kene? Apa mwana uwo unomuka kene?’ ” Ngono kashandula eti, “Kwakalulwama.”

²⁷Ngono kati eswika pa nlume we Ndzimu ku dombo, kabhata makumbo awe. Ngono Gehazi kasedzela kuti ansunde, koga nlume we Ndzimu kati, “Unletje, ngobe meya dzidze dzakadzipikana munli, ngono Yahwe bandisumbikila iko, abazondibudza.”

²⁸Ngono nkadzi kati, “Apa ndakatongo kumbila mwana we tjilisana kumuli tetshi wangu kene? Apa andizoti musinditjebele kene?”

²⁹Ngono kadwa Gehazi kati, “Sunga thunji dzidzo ngono utole ludozo gwangu nge luboko uyende. Ha ushangana ne nthu usidumilise, ha nthu ekudumilisa usindabile, ubige ludozo gwangu mu buso gwe mwana.”

³⁰Ipapo mme be mwana bakati, “Yahwe ha batjatjila kose nawe utjatjila, andingakusiye.” Ndizo kamilika kasala nkadzi shule.

³¹Gehazi kayendila mbeli ngono kaswika kabiga ludozo pa buso gwe mwana, ngono kwakabe kusina nsindo kene tjinolakidza butjilo. Ndizo kashanduka kanonshangamidza ngono kandwa kati, “Mwana aazomuka.”

³²Kwakati Elisha eswika ku ng'umba, kabona mwana alilele akafa pa bulawo gugwe.

³³Ndizo kangina kazwizhalilila mukati ne mbisana katembezela kuna Yahwe.

³⁴Ndizo katatha bulawo kalala pezhugwi kwe mwana, kabiga nlomo uwe panlomo we mwana, mesho awe pana e mwana, maboko awe pa maboko e mwana, ngono wakati ezwitambunudza pezhugwi kwe mwana, mbili we mwana ukadziya.

³⁵Ngono kamilika kakale, kayenda yenda mu ng'umba, katatha ngono kazwitambunudza pezhugwi kwe mwana, mwana katshimuta katendeka ngono mwana kazhula mesho awe.

³⁶Elisha kadana Gehazi kandwa kati, “Dana nkadzi we Nshunami.” Ndizo nlanda kandana, ngono wakati ebuya kandwa kati, “Tola nkololo uwo.”

³⁷Kangina, ngono kawila pa makumbo awe kathigama pasi. Ipapo katola nkololo uwe kayenda.

³⁸Elisha kabgwilila ku Giligala ngono kukabe kuna bhamba mu shango. Ngono kwakati badiyiwana be balebesambeli batjigele mbeli kukwe, kadwa nlanda uwe kati, “Biga hali hwulu pa moto, ngono uthamile badiyiwana be balebesambeli zojiwa.”

³⁹Ngono mwe wabo kabhuda kayenda ku shango kunoshaka milibo, ngono kawana nti unamapudzana kautjela kazhadza hazu iye. Ngono kati ashanduka kaswika eutjekelelela mu hali ye zojiwa, nenguba kwakabekusina unoziba kuti ini.

⁴⁰Kukapakuligwa balume kuti baje. Ngono kwakati betangisa ja, baka lila beti, “Nlume we Ndzimu wee, kuna lufu mu hali.” Ngono bakasitubule ku zwija.

⁴¹Elisha kati, “Zhisani bgwisa.” Ngono kagulonga mu hali, kabe eti, “Pakulila balume kuti baje.” Ngono kukabe kusina mbhatsha mu hali.

⁴²Kukazha nlume edwa ku Bhaaleshalisha ezhisila nlume we Ndzimu zwiwunga zwe zwivuno zwe kutanga zwe bhali zwili makumi mabili (20), kose ne zwiyako zwe mathunde matshwa. Elisha kati, “Ipa balume ibaba baje.”

⁴³Koga nlanda uwe kati, “Ukatini? Apa ndingabiga ikoku mbeli kwe bathu bali zana kene?” Koga Elisha kashandula eti, “Uzwipe balume ibaba baje, ngoti tjinoleba Yahwe ndi etji, ‘Banowoja bakasiya.’ ”

⁴⁴Ndizo kazwibiga mbeli kwabo, ngono bakaja bakasiya, kuyendidzana nge dama la Yahwe.