Read Kalanga 2 Bomambo 5 Bible Online

2 Bomambo 5 - Kalanga bible

2 Bomambo 5

¹Naamani wakabe ali ntungamili we ngwa ya mambo we Siriya, wakabe ali nlume nkulu mu mesho a tetshi uwe kakale etolegwa pezhugwi kwazo, ngoti ndiye, Yahwe bakabe bapa Siriya kukunda. Wakabe ali mbhayani wakasima, koga egwala mapele.

²Ipapo Basiriya bakatongobe banginilila Iziraela ngono mu kunginilila kwabo bakatapa mwanadi we Iziraela ngono kabe nlandakadzi we nkadzi wa Naamani.

³Ngono kadwa tetshikadzi uwe kati, “Tshene tetshi wangu banganobona nlebesambeli umu Samariya, wabe angabapodza mapele abo.”

⁴Ndizo Naamani kayenda kano budza tetshi uwe ngekwe tjalebgwa nge mwanadi we Iziraela.

⁵Ndizo mambo we Siriya kati, “Yenda ngwenu, ngono ndowotumila lukwalo kuna mambo we Iziraela.” Ndizo kayenda, katola talenta dzili gumi dze siliva ne zwiwulu zwili kutathatu zwe shekele ye golide ne zwiambalo zwibuyanana zwili gumi.

⁶Ngono kayisa lukwalo kuna mambo we Iziraela gwakabe gubalika guti, “Lukwalo igogu aguswika pakuli, ziba kuti ndatuma Naamani nlanda wangu kukuli, kuti umpodze bugwele gugwe gwe mapele.”

⁷Ngono kukati mambo we Iziraela ebala lukwalo, kapalula zwiambalo zwizwe kati, “Apa ndi Ndzimu imi kene? Apa ndinga bulaya kakale atjidza kene, kungayita kuti nlume iwoyu atumile ndaidzo kundili kuti ndipodze nthu mu mapele awe kene? Bonani koga sekwa anoshaka kukwebakwebana nami.”

⁸Koga Elisha nlume we Ndzimu wakati ehwa kuti mambo we Iziraela wapalula zwiambalo zwizwe, katumila dama kuna mambo eti, “Ini wapalula zwiambalo zwizo kene? Unletje azhe kundili kuti ndizo azibe kuti kuna nlebesambeli mu Iziraela.”

⁹Ndizo Naamani kayenda ne mbizi dzidze ne koloyi dze ngwa kanoma pa nkoba we ng'umba ya Elisha.

¹⁰Ngono Elisha katuma ntumwa kunli kati, “Yenda unongula mu gwizi gwe Jorodani katendeka, nyama inowobuyila mu mbili uwo, ngono unowotjenapala.”

¹¹Koga Naamani kayenda akagwadzamoyo eti, “Ndabe ndikumbula kuti nge malebeswa unowobhuda kazha kundili kama kadana zina la Yahwe Ndzimu uwe, kawuzwa nge luboko gugwe pathu pakakubala kapodza una mapele.

¹²Apa Abana ne Faripa ate njizi dze Damasiko dzinoyita pa vula dzose dze Iziraela kene? Apa andinga ngule mudzili ndikabe mbuyanana kene?” Ndizo kashanduka, kayenda akagwadzamoyo.

¹³Koga balanda babe bakasedzela panli bakati, “Tate, ha nlebesambeli angabe amudwa tjimwe tjikulukulu, mungabe musatjithama kene? Bukulu seni apa emudwa eti, ‘Ngulani mube mbuyanana kene?’ ”

¹⁴Ndizo kadeluka kanozwidubika katendeka mu gwizi gwe Jorodani, kuyendidzana nge dama le nlume we Ndzimu ngono mbili uwe ukalulwama, ganda lile likalingika sele mwana ngono katjenapala.

¹⁵Ipapo kabgwilila ku nlume we Ndzimu, iye ne goko lile lose ngono kabuya kama mbeli kukwe ngono kati, “Bonani, ndoziba kuti akuna Ndzimu mu shango yose kuzhe kwe Iziraela, ngwenu ndokumbila kuti uamutjile tjipo kudwa ku nlanda uwo.”

¹⁶Nlebesambeli kashandula eti, “Ha Yahwe batjatjila, ibo bandinoshingila, akuna tjandinoamutjila.” Ngono kankwekweredza kuti a amutjile koga kalamba.

¹⁷Naamani kati, “Ha kusingatubuke, ndomukumbila imi nlanda wenyu ndipiwe tjilizanyo tje mavu tje mitolo mibili ye mowulo, ngobe nlanda wenyu aatjowothama zwibhayilo zwinopisiwa kene kuli zwibhayilo ku midzimu ipoga kuzhe kwa Yahwe.

¹⁸Koga mu ndebo iyeyi, tshene Yahwe bangazwiibhatigwa nlanda uwo, ha tetshi wangu engina mu ng'umba ya Rimoni kunonamata, akanaila luboko gwangu ngono nami ndithigama mu ng'umba ya Rimoni, tshene Yahwe bangazwiibhatigwa nlanda uwo ngekwa ikoku.”

¹⁹Elisha kandwa kati, “Yenda nge mbakiso.” Ngono kwakati Naamani atjiyenda thambgwana,

²⁰Gehazi nlanda wa Elisha nlume we Ndzimu, kazwidwa kati, “Bona, tetshi wangu waletja Naamani we N'siriya nge kusaamutjila mu maboko awe tjaazhisa. Ha Yahwe batjatjila, ndowonlabukila ndikatola tjimwe mu nli.”

²¹Ndizo Gehazi katobela Naamani. Ngono Naamani wakati ebona nthu akanlabukila, kadeluka mu koloyi iye ye ngwa kunonshanganidza, kandwa kati, “Apa tjimwe ne tjimwe tjakalulwama kene?”

²²Ngono Gehazi kashandula eti, “Tjimwe ne tjimwe tjakalulwama, ngono tetshi wangu wandituma kuti nditi, ‘Kwazha bazhuzha badiyiwana be balebesambeli kudwa ku shango ye matombo ye Ifureimi. Ndokumbila ubape talenta ye siliva ne zwiambalo zwibili zwibuyanana.’ ”

²³Ngono Naamani kati, “Shatha uamutjile talenta mbili.” Kakwekweredza Gehazi kuzwiamutjila, ngono kasungila talenta mbili dze siliva mu womo mbili ne zwiambalo zwibili zwibuyanana. Kazwipa babili be balanda babe, ngono bakazwisenga bakatungamila Gehazi.

²⁴Ngono Gehazi wakati eswika pa duthu kazwitola mu maboko abo kazwilonga mu ng'umba, ngono kabawoneka bakayenda.

²⁵Kangina kama mbeli kwa tetshi uwe, ngono Elisha kandwa kati, “Wabe wayenda poni Gehazi?” Kashandula eti, “Nlanda wenyu akuna kwaatongo yenda.”

²⁶Ngono kandwa kati, “Apa ndabendisinawe mu meya ha nlume edeluka mu koloyi iye ye ngwa kukushanganidza kene? Apa nditjo tjibaka tjekuamutjila mari ne zwiambalo ne minda ye mitoba ne minda ye mizhambi ne pkhwizi ne mangabe ne balanda ne balandakadzi kene?

²⁷Mapele a Naamani anowokunamatila kose ne zwizekugwana zwizo tjatjose.” Ngono Gehazi kabhuda pana Elisha ana mapele, ali ntjena se kapuku.